تانىمال وزبەكستاندىق ءانشى كىسى قولىنان قازا تاپتى

تاشكەنت. KAZINFORM - حالىققا Zeboyi Jahon ەسىمىمەن تانىمال بولعان وزبەكستاندىق ءانشى زەبينيسو نوسيروۆا 26-شىلدەدە سامارقاند وبلىسىنا قاراستى تايلاك اۋدانىندا كوز جۇمدى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

باس پروكۋراتۋرانىڭ باسپا ءسوز حاتشىسى حايەت شامسۋتدينوۆ 33 جاستاعى كۇدىكتى ۇستالعانىن جانە ونىڭ ۇستىنەن «قاساقانا كىسى ءولتىرۋ» بابى بويىنشا قىلمىستىق ءىس قوزعالعانىن راستادى. دەگەنمەن ۆەدومستۆو وكىلى وقيعانىڭ ءمان-جايىن اشىپ ايتپادى.

بۇل رەتتە جەرگىلىكتى بۇقارالىق اقپارات قۇرالدارى زەبينيسو نوسيروۆانىڭ ولىمىنە قاتىستى ىستە باستى كۇدىكتى مارقۇمنىڭ جۇبايى ەكەنىن جازىپ جاتىر. «Milliy TV» تەلەارناسىنىڭ مالىمەتىنشە، ءانشىنىڭ كۇيەۋى بالالارىن كورۋ ءۇشىن ۇيىنە بارعان. كەيىن ەرلى-زايىپتى اراسىنداعى اڭگىمە جانجالعا ۇلاسىپ، جۇبايى زەبينيسو نوسيروۆانى قىلعىندىرعان. ءانشى وقيعا ورنىندا كوز جۇمدى. مارقۇمنىڭ ارتىندا 3 بالاسى قالدى.

قوسا كەتسەك، بىلتىر 10 ايدا وزبەكستان سوتتارى تۇرمىستىق زورلىق-زومبىلىق جاساعان 15826 ادامدى جاۋاپقا تارتتى.

سونداي-اق، 2024 -جىلى كوپ ايەل الۋدى ناسيحاتتاعان جانە ادامدى جىنىسىنا بايلانىستى كەمسىتكەن 21 وزبەكستاندىق جاۋاپقا تارتىلدى.

بۇعان قوسا، بىلتىر وزبەكستاندا بالاعا قاتىستى جاسالعان تۇرمىستىق زورلىق- زومبىلىق ءۇشىن جازا ەنگىزىلدى.

اۆتور

ءاليحان اسقار