تانىمال سپورتشى قىسقى وليمپيادادان اياق كيىمىنىڭ ولشەمىنە بايلانىستى شەتتەتىلدى

استانا. KAZINFORM - بيىلعى وليمپيادا ويىندارى كوپشىلىكتىڭ ەسىندە جارقىن جەڭىسپەن عانا ەمەس، كۇتپەگەن وقيعالارمەن دە قالاتىنى ءسوزسىز. سونىڭ ءبىرى - تۇعىردان سەكىرۋشى اۋستريالىق دانيەل چوفەنيگتىڭ جارىستان شەتتەتىلۋى.

TNT Sports تاراتقان مالىمەتكە سۇيەنسەك، چوفەنيگتىڭ ديسكۆاليفيكاتسياسىنا اياق كيىمىنىڭ رەسمي تالاپتارعا ساي كەلمەۋى سەبەپ بولعان. بەلگىلى بولعانداي، ونىڭ ەتىگىنىڭ ولشەمى بەلگىلەنگەن نورمادان ءتورت ميلليمەترگە ۇلكەن بولىپ شىققان. سول ءۇشىن دە ۇيىمداستىرۋشىلار ونى ءتورتجىلدىقتىڭ باس دوداسىنان شەتتەتتى.

2025-جىلعى الەم كۋبوگىنىڭ چەمپيونى ميلان - كورتينادا وتەتىن وليمپياداعا باستى فاۆوريتتەردىڭ ءبىرى رەتىندە كەلگەن ەدى. ول سەكىرۋدەن ىرىكتەۋ بارىسىندا 137,7 مەتر ناتيجە كورسەتىپ، سەگىزىنشى ورىنمەن فينالعا جولداما الۋى ءتيىس ەدى. الايدا تورەشىلەردىڭ تەكسەرىسى ونىڭ ءۇمىتىن ءبىر ساتتە-اق ءسوندىردى.

چوفەنيگ ORF ارناسىنا بەرگەن سۇحباتىندا جاتتىعۋ كەزىندە جاڭا اياق كيىم كيگەنىن، ءبىراق قولايسىز بولا تۇرا، ونى اۋىستىرماعانىن مويىندادى.

ولشەمىن تەكسەرمەگەنىم ناعىز اقىماقتىق بولدى. ءبىراق ەرەجەنىڭ اتى - ەرەجە، - دەدى ول وكىنىشىن جاسىرماي.

سوعان قاراماستان، اۋستريا قۇراماسى بۇل وليمپيادادا وتە ءساتتى ونەر كورسەتىپ جاتىر. كوماندا قورجىنىندا ازىرگە 4 التىن، 6 كۇمىس جانە 3 قولا مەدال بار.

اۋستريا ساپىندا العاشقى التىندى سنوۋبوردشى بەنيامين كارل يەلەندى. ول پاراللەل الىپ سلالومدا جەڭىسكە جەتىپ، وليمپيادا چەمپيونى اتاعىن راستادى. سونان سوڭ سنوۋبوردتان ەرلەر اراسىنداعى كروسس سايىسىندا الەسساندرو حەممەرلە چەمپيون اتاندى.

تاۋ شاڭعىسىندا اريانە رەدلەر مەن كاتارينا گۋبەر كوماندالىق كومبيناتسيادا ۇزدىك شىقتى.