تانىمال قازاقستاندىق بوكسشى 5 جىلدان سوڭ رينگكە قايتا ورالادى
08:37, 04 - قاڭتار 2024
قازاقستاندىق بوكسشى رۋسلان مىرساتايەۆ (7-0، 6 ك و) اراعا ۇزاق ۋاقىت سالىپ مانسابىن قايتا جالعاستىرۋ تۋرالى شەشىم قابىلدادى، دەپ حابارلايدى Kazinform اگەنتتىگى Sports.kz-كە سىلتەمە جاساپ.
ول 1-ناۋرىز كۇنى الماتىداعى بالۋان شولاق اتىنداعى سپورت سارايىندا وتەتىن بوكس كەشىندە ونەر كورسەتەدى. ازىرگە قارسىلاسىنىڭ ەسىمى ءالى جاريالانعان جوق.
سپورتتىق ءىس-شاراعا داۋلەت داۋكەنوۆ، ءالي بالويەۆ، بەكسۇلتان راۋشانوۆ، ساپارباي ايداروۆ جانە تاعى دا باسقا قازاقستاندىق بوكسشىلار قاتىسادى.
ايتا كەتەيىك، رۋسلان مىرساتايەۆ 2019 -جىلدىڭ قازان ايىندا الماتىدا بەلارۋس بوكسشىسى يۋري بىحوۆسيەۆتى جەڭگەننەن كەيىن كاسىپقوي بوكستاعى سپورتتىق مانسابىن اياقتاعان بولاتىن. سپورتشى اراعا 5 جىل سالىپ شارشى الاڭعا قايتا ورالماقشى.