تانىمال قازاقستاندىق انشىلەر تاشكەنت تورىندە كونسەرت بەردى
بەلگىلى قازاقستاندىق ەسترادا انشىلەرى وزبەكستانداعى قازاقتارعا ارناپ تاشكەنت تورىندە كونسەرت بەردى، دەپ حابارلايدى Kazinform مەنشىكتى ءتىلشىسى.
كونسەرتتە مارحابا ءسابي، ءمادي سىزدىقوۆ، Yenlik اتىمەن تانىمال ەڭلىك قۇراربەك سياقتى وتاندىق انشىلەر، اعايىندى كومپوزيتورلار عالامات جانە ءنۇرالى بەيسەقوجالار ونەر كورسەتتى.
«قانداستارعا ونەرىمىزدى كورسەتۋ مۇمكىندىگىن العانىمىزعا قۋانىشتىمىز. سەبەبى، ءبىز ءوزىمىزدىڭ كىم ەكەنىمىزدى ۇمىتپاۋىمىز كەرەك. بۇل كونسەرتكە تەك تاشكەنتتەگى قازاقتار عانا ەمەس، سونداي-اق وزبەكستاننىڭ باسقا وڭىرلەرىندە تۇراتىن ازاماتتار دا كەلدى. ونەرگە عاشىق كورەرمەندى كورىپ، كەۋدەمىزدى ماقتانىش سەزىمى كەرنەدى»، - دەپ توقتالدى قازاقستاندىق ءانشى، رەپ ورىنداۋشىسى ەڭلىك قۇراربەك.
مادەني شارا اياسىندا شىرقالعان ءان مەن شەرتىلگەن كۇيدەن بولەك، «وتانداستار» قورى وزبەكستانداعى قازاقتارعا ارناپ اكەلگەن كادەسىيلارىن تابىس ەتتى.
«وتانداستار» قورى ۇيىمداستىرىپ جاتقان «قورجىن» جوباسىنىڭ كەزەگى بىزگە، ياعني وزبەكستاندىق قازاق مادەني ورتالىقتارىنا كەلىپتى. ولار قازاقتىڭ ۇلتتىق اسپاپتارىن، كيىمدەر، تۋ جانە كىتاپتار الا كەلگەن ەكەن. سونى بىزگە تارتۋ ەتتى. ونى ءبىز بۇحارا وبلىسىنا الىپ كەتەمىز، كەيىن كورمەگە قويامىز. ونەر ۇجىمىنىڭ شەتتەگى قازاقتاردى ىزدەپ كەلگەندەرىنە وتە قۋانىشتىمىز. وسى ورايدا، وزبەكستاندا جۇرگەن، كوتەرىلە الماي جاتقان ونەرلى قازاق جاستارى بار ەكەنىن ايتا كەتكىم كەلەدى. سولاردى تانىتۋ ماقساتىندا ءتۇرلى سايىستار ۇيىمداستىرىلسا، ونەر بايقاۋلارىنا شاقىرسا دەگەن ۇسىنىسىمز بار»، - دەدى بۇحارا وبلىسىنداعى مادەنيەت ورتالىعىنىڭ ءتورايىمى نازاكات بورانبايەۆا.
اۆتور:
ءاليحان اسقار