تانىمال فايتەر تاسقىن سۋدان زارداپ شەككەن حالىققا گۋمانيتارلىق كومەك جىبەردى

استانا. KAZINFORM - قازاقستاندىق مما شەبەرى قۋات (نايمان) حاميتوۆ (24-8-1) اتىراۋ وبلىسىندا تاسقىن سۋدان زارداپ شەككەن حالىققا گۋمانيتارلىق كومەك جىبەرىپ، قول ۇشىن سوزدى.

بۇل تۋرالى تانىمال جەكپە-جەك شەبەرى ءوزىنىڭ Instagram-پاراقشاسىندا مالىمدەدى.

«اللانىڭ رازىلىعى ءۇشىن، ءوزىمنىڭ اتىمنان اتىراۋ وبلىسىندا سۋ تاسقىنىنان زارداپ شەككەن تۇرعىندارعا گۋمانيتارلىق كومەك جىبەردىم. قاي ەلدە بولماسام دا، حالقىممەن ءار دايىم بىرگەمىن»، - دەپ جازدى سپورتشى.

ول ءوزىنىڭ ۆيدەو ۇندەۋىندە ەگەر ەلدە بولسا تاسقىن سۋدان زارداپ شەگىپ جاتقان وڭىرلەرگە بارىپ، قىزمەت ەتۋگە دايىن ەكەنىن دە اتاپ ءوتتى.

«ەلدە بولسام، قۇلسارىعا بارىپ قىزمەت ەتۋگە بولاتىن ەدى. وكىنىشكە قاراي، قازىر شەتەلدە دايىندىقتا ءجۇرمىن. سوندىقتان از بولسا دا حالقىما، ەلىمە پايدام ءتيسىن دەپ ءوز اتىمنان گۋمانيتارلىق كومەك جىبەرىپ جاتىرمىن»، - دەدى ق. حاميتوۆ.

سونداي-اق، ول تاسقىننان زارداپ شەككەن باسقا دا وبلىستارعا قولۇشىن بەرۋگە دايىن ەكەنىن ايتتى.

ايتا كەتەيىك، حاميتوۆ قازىرگى تاڭدا تايلاندتا كەزەكتى جەكپە-جەگىنە دايىندالىپ جاتىر. ول 11-مامىردا تانىمال رەسەيلىك فايتەر الەكساندر شلەمەنكومەن وكتاگونعا شىعادى.

حاميتوۆ - شلەمەنكو اراسىنداعى جەكپە-جەك ەكاتەرينبۋرگ قالاسىندا وتەدى.

الەكساندر شلەمەنكو سوڭعى جەكپە-جەگىن 15-جەلتوقساندا ەكاتەرينبۋرگتە وتكىزىپ، سەرب سپورتشىسى الەكساندر يليچتى نوكاۋتپەن جەڭگەن بولاتىن. قازىرگى ۋاقىتتا ورىس سپورتشىنىڭ قورجىنىندا 64 رەت جەڭىس بولسا، 15 رەت ەسە جىبەرگەن. تاعى ءبىر سىندا قارسىلاسىمەن تەڭ تۇسسە، ءبىر جەكپە-جەگى وتپەي قالدى.

36 جاستاعى قۋات حاميتتىڭ ەنشىسىندە 24 جەڭىس، 8 جەڭىلىس پەن 1 تەڭ ناتيجە بار.

اۆتور
كۇنسۇلتان وتارباي