تامىز سامميتىنە 500 مىڭنان استام ءبىلىم بەرۋ قىزمەتكەرى قاتىستى
استانا. KAZINFORM - جاڭا وقۋ جىلىنىڭ باستالۋىنا ارنالعان ءداستۇرلى تامىز باسقوسۋى ءوز مارەسىنە جەتتى. تالقىلاۋدىڭ نەگىزگى تاقىرىبى وقۋ پروتسەسىن سيفرلاندىرۋعا جانە جاساندى ينتەللەكتتى ەنگىزۋ ەرەكشەلىكتەرىنە ارنالدى.
وقۋ-اعارتۋ ءمينيسترى عاني بەيسەمبايەۆ وتاندىق ءبىلىم بەرۋ جۇيەسىندە جاساندى ينتەللەكتى ەنگىزۋدىڭ العىشارتتارى قالىپتاسقانىن اتاپ ءوتتى. بۇگىندە مەكتەپتەردە جوعارى جىلدامدىقتى ينتەرنەتپەن قامتۋ � قۇرايدى، ينتەرنەتتىڭ ورتاشا جىلدامدىعى وتكەن جىلعى 4 مبيت/س-تەن بيىل 75 مبيت/س-كە جەتتى. ەلىمىزدىڭ 1731 مەكتەبىندە Starlink جەرسەرىگى ورناتىلعان.
«جاساندى ينتەللەكت تەحنولوگيالارىن بىلىمگە ساۋاتتى ەنگىزۋ - وقىتۋدىڭ تيىمدىلىگىن، جەكە وقۋشىعا باعىتتىلىعىن قامتاماسىز ەتەدى، ال بۇل ءوز كەزەگىندە ءبىلىم ساپاسىن جاقسارتۋعا مۇمكىندىك بەرەدى. زاماناۋي تەحنولوگيالار پەداگوگتەردەن ءبىلىم بەرۋ پروتسەسىن ۇيىمداستىرۋدا جاڭا ۇستانىمدى تالاپ ەتەدى جانە ونى ءتيىمدى قولدانۋعا ءبىلىم بەرۋدىڭ بارلىق دەڭگەيلەرى دايىن بولۋى كەرەك»، - دەدى مينيستر نازاربايەۆ ۋنيۆەرسيتەتىندە وتكەن تامىز سامميتىندە.
سونىمەن بىرگە، مينيستر ءبىلىم بەرۋ وردالارىنىڭ ينفراقۇرىلىمى جاقسارعانىن اتاپ ءوتتى. بۇگىندە ەلىمىزدە 3 مىڭعا جۋىق مەكتەپ ءبىر اۋىسىمدا ءبىلىم بەرۋدە. قوسىمشا 536 وقۋشى ورنىنا ارنالعان 302 مەكتەپتىڭ قۇرىلىسى جۇرۋدە. 1,7 ميلليوننان استام وقۋشى ىستىق تەگىن تاماقپەن قامتىلعان.
سونداي-اق، عاني بەيسەمبايەۆ كادرلىق الەۋەتتى ارتتىرۋ ماسەلەسىنە توقتالدى. ونىڭ ايتۋىنشا، جىل سايىن ءمۇعالىم ماماندىعىنا قىزىعۋشىلىق بىلدىرۋشىلەردىڭ قاتارى ارتىپ كەلەدى. بيىل 1797 «التىن بەلگى» يەگەرى پەداگوگيكا ماماندىعىن تاڭداعان، بۇل وتكەن جىلمەن سالىستىرعاندا 269 ادامعا كوپ.
مينيستر كەلەسى وقۋ جىلىندا باسىمدىق بەرىلەتىن ماڭىزدى مىندەتتەردى اتاپ كورسەتتى. بۇل - بالالاردىڭ قاۋىپسىزدىگىن قامتاماسىز ەتۋ، مەكتەپتەردىڭ ىشكى رەگلامەنتى مەن جارعىسىنىڭ ساقتالۋى، ءبىلىم الۋشىلاردىڭ وقۋ ۇلگەرىمى.
پلەنارلىق وتىرىس حالىقارالىق ساراپشىلاردىڭ قاتىسۋىمەن ديسكۋسسيالىق فورماتتا جالعاستى. سونىمەن بىرگە، تاقىرىپتىق باعىتتار بويىنشا پلەنارلىق سەكتسيالىق وتىرىستار ءوتتى.
سامميت اياسىندا ءبىلىم بەرۋ سالاسىن جەتىلدىرۋ مەن دامىتۋ بويىنشا سيفرلىق شەشىمدەردىڭ ساندىق كورمەسى ۇيىمداستىرىلدى. «الەم مۇعالىمى» جاھاندىق پرەمياسىنىڭ (Global Teacher Prize) ۇلتتىق كەزەڭىنىڭ جەڭىمپازدارى تانىستىرىلدى.
سامميت سوڭىندا وقۋ-اعارتۋ ءمينيسترى ءبىلىم بەرۋ سالاسىنىڭ دامۋىنا ۇلەس قوسقان ۇزدىك پەداگوگتەردى ۆەدومستۆولىق ناگرادالارمەن ماراپاتتادى.
اۆتور
ايجان سەرىكجان قىزى