تامارا دۇيسەنوۆا جاقسى مۇعالىمنىڭ ءۇش نەگىزگى قاسيەتىن اتادى

استانا. قازاقپارات - WALS 2024 حالىقارالىق كونفەرەنسياسىنىڭ اشىلۋ راسىمىندە پرەمەر-ءمينيستردىڭ ورىنباسارى تامارا دۇيسەنوۆا جاقسى مۇعالىمنىڭ ءۇش نەگىزگى قاسيەتىن اتادى.

«بۇگىندە ءبىلىم الۋشىلاردىڭ نە ويلايتىنىن ءتۇسىنۋ، ولاردى مۇقيات باقىلاۋ، نەمەن اينالىسىپ جاتقانىن، قالاي ءوزارا ارالاساتىنىن، بىلىمگە دەگەن قىزىعۋشىلىعى قانداي ەكەنىن بايقاۋ ماڭىزدى. ويلاۋ داعدىسى مەن ۇزدىك بولۋعا دەگەن ۇمتىلىسىن ۇنەمى ارتتىرىپ وتىرۋ قاجەت. ەندەشە، ەڭ الدىمەن، پەداگوگتەر ءبىلۋى كەرەك جاقسى مۇعالىمنىڭ ءۇش نەگىزگى قاسيەتىن ەسكە تۇسىرەيىك. بىرىنشىدەن، بۇل وقۋشىلارعا بىرلەسە وقۋ مەن دامۋعا كومەكتەسۋگە اسا دەن قويۋ. مۇعالىم مەكتەپكە نە ءۇشىن جانە قانداي ماقساتتا كەلگەنىن تۇسىنگەنى ماڭىزدى»، - دەدى ول.

ەكىنشىدەن، ۆيتسە-پرەمەردىڭ ايتۋىنشا، مۇعالىم ءوز ءپانىن جاقسى كورىپ، ادامي قاسيەتتەرگە، ياعني ادامنىڭ جەكە باسىن قۇرمەتتەپ، مەيىرىمدى ءارى ديالوگكە دايىن بولۋ كەرەك.

ساباقتى قالاي تابىستى وتكىزۋگە، وقۋشىلاردىڭ قالاي ءبىلىم الاتىنىنا، بالالاردىڭ قانداي داعدىلارىن دامىتۋ كەرەكتىگىنە ءمان بەرۋ قاجەت.

«سونداي-اق ءۇشىنشىسى - پوزيتيۆتى وي. مۇعالىمنىڭ مىندەتى - وقۋشىنى قولداۋ، ىنتالاندىرۋ، پروبلەمانىڭ شەشىمىن تابۋعا كومەكتەسۋ. سوندىقتان وقىتۋدا ىنتىماقتاستىق پروتسەسى وتە ماڭىزدى. ءبىز وقۋشىنىڭ دۇنيەتانىمى مەن الەم تۋرالى كوزقاراسى مەكتەپ كەزەڭىندە قالىپتاساتىنىن ەستەن شىعارماۋىمىز كەرەك. سوندىقتان ەلىمىزدىڭ ەرتەڭى وقۋشىلاردى تاربيەلەۋ جۇيەسىن قانداي نەگىزدە قۇراتىنىمىزعا بايلانىستى بولماق. ءبىز بالا بويىنا ادامي قاسيەتتەردى ءسىڭىرىپ، ءوزى مەن ەلىنە، اتا-اناسىنا ادال بولۋعا تاربيەلەپ، قۇندىلىقتاردى دارىتۋىمىز قاجەت. بۇگىنگى ءبىزدىڭ كونفەرەنسيامىز پەداگوگيكا عىلىمىن دامىتۋداعى ماڭىزدى قادامداردىڭ ءبىرى بولىپ وتىر. ءتۇرلى ەلدەردىڭ جاس ءارى تاجىريبەلى عالىمدارىمەن پىكىر الماسۋعا سەپ بولىپ، عىلىم مەن پراكتيكانى ۇشتاستىرۋعا ىقپال ەتۋدە. مەن وسىنداعى اربىرىڭىزدەن زور الەۋەت پەن جاسامپاز ەنەرگيانى بايقاپ وتىرمىن»، - دەدى تامارا دۇيسەنوۆا.

ايتا كەتەيىك، «ساباقتى زەرتتەۋ: ۇزدىك وقۋ مەن وقىتۋعا ۇمتىلۋ» تاقىرىبىمەن ءوتىپ جاتقان WALS-2024 كونفەرەنتسياسىنا 30 عا جۋىق ەلدەن ماماندار كەلگەن.

نەگىزگى سپيكەرلەر قاتارىندا الەمدىك ءبىلىم بەرۋدىڭ ەڭ بەدەلدى ساراپشىلارى: نورۆەگيادان ويستەين كريستيانسەن، ليتۆادان داريۋس رادكيەۆيچيۋس، ۇلى بريتانيادان سارا سەلەزنيەۆ، جاپونيادان شيرلي تان، گەرمانيادان كلارا كاگەر بار.

جالپى، ءىس-شاراعا 850 دەن استام ادام قاتىسۋدا.