تامارا دۇيسەنوۆا «اۋىل اماناتى» جوباسىنىڭ اقمولا وبلىسىندا ىسكە اسىرىلۋ بارىسىن تەكسەردى
استانا. KAZINFORM – ق ر پرەمەر-ءمينيسترىنىڭ ورىنباسارى تامارا دۇيسەنوۆا «اۋىل اماناتى» جوباسىنىڭ اقمولا وبلىسىندا ىسكە اسىرىلۋ بارىسىن تەكسەرىپ، ءبىرقاتار الەۋمەتتىك نىساندى ارالادى.
بۇل تۋرالى ق ر ۇكىمەتىنىڭ باسپا ءسوز قىزمەتى ءمالىم ەتتى.
مەملەكەت باسشىسى قازاقستان حالقىنا جولداۋىندا «اۋىل اماناتى» جوباسىنا وڭ باعا بەردى. اۋىل تۇرعىندارىنىڭ تابىسىن ارتتىرۋ باعدارلاماسى ءوز كاسىبىن اشۋعا، جۇمىسسىز ازاماتتاردى جۇمىسقا ورنالاستىرۋعا ىقپال ەتەدى. وسى ماقساتتا %2,5 بەن شاعىن نەسيەلەر بەرىلەدى. تامارا دۇيسەنوۆا اتباسار اۋدانىندا تۇرعىندار بيزنەس-يدەيالارىن جۇزەگە اسىرۋ بارىسىمەن تانىستى.
«اۋىل اماناتى» جوباسىنا قاتىسۋشىلاردىڭ ءبىرى، اتباسار اۋدانىنىڭ تۇرعىنى ۆيتالي دۋبينين 3,5 ملن تەڭگەگە كولىك جوندەۋ ستانساسىن اشتى. ال، ايدا مەيراموۆا ناۋبايحانا جۇمىسىن ۇيىمداستىرىپ، 8,6 ميلليون تەڭگەگە جەڭىلدىگى بار نەسيە العان. قازىرگى تاڭدا ناۋبايحانا 16 ادامدى جۇمىسپەن قامتىپ وتىر.
«جۇمىستى نولدەن باستادىق، بۇگىندە حالىق اراسىندا سۇرانىسقا يە وندىرىسكە اينالىپ وتىرمىز. نەسيەلىك قاراجاتقا قامىر يلەگىش پەن 120 توقاشتىق پەش ساتىپ الىندى. ءبىز نان ونىمدەرىنىڭ 20 تۇرىنە دەيىن پىسىرەمىز»، - دەپ، ايدا مەيراموۆا ويىمەن ءبولىستى.
تامارا دۇيسەنوۆاعا «اۋىل اماناتى» جوباسىنا قاتىسۋشىلار شىعارعان ونىمدەردىڭ وڭىرلىك كورمەسى ۇسىنىلدى. ۆيتسە- پرەمەر باعدارلاما قاتىسۋشىلارىمەن اڭگىمەلەسۋ بارىسىندا وندىرىستە تەرەڭ وڭدەۋدى دامىتۋدىڭ ماڭىزدى ەكەنىن اتاپ ءوتتى.
پرەمەر-ءمينيستردىڭ ورىنباسارى ءوڭىر باسشىسى مارات احمەتجانوۆپەن بىرلەسىپ وبلىستىڭ اۋداندارى مەن اۋىلدىق وكرۋگتەرى اكىمدەرىنىڭ قاتىسۋىمەن باعدارلامانى ىسكە اسىرۋ جونىندە كەڭەس وتكىزدى. وندا باسقا دا سالالاردا جۇزەگە اسقان ۇزدىك جوبالار قارالدى. قىزىلوردا وڭىرىنەن كەلگەن «بايقوڭىر» اكك باسقارما ءتوراعاسى عيزات ءابىلتاي جوبانى جەرگىلىكتى الەۋمەتتىك- كاسىپكەرلىك كورپوراتسيالار ارقىلى قولداۋ جونىندەگى تاجىريبەنى ايتتى. كووپەراتسيا باعىتىنداعى ۇلگىلى اۋىل رەتىندە بقو قاراتوبە اۋدانىنداعى قوسكول اۋىلى تانىستىرىلدى. سونداي- اق كەڭەسكە قاتىسۋشىلار مەكتەپتەردى ازىق-تۇلىكپەن ءتيىمدى قامتاماسىز ەتۋ، ءونىمدى وڭدەۋ جانە ەكسپورت بويىنشا كەيستەرمەن تانىستى.
«جەرگىلىكتى جەرلەردە اۋىل اكىمدەرى حالىقپەن تىعىز جۇمىس ىستەيدى. ولار ازاماتتارعا مەملەكەتتىك قولداۋدىڭ نەعۇرلىم ءتيىمدى شارالارىن ۇسىنۋعا ءتيىس. تەك وسى جاعدايدا عانا ءبىز باستى ماقسات - اۋىل تۇرعىندارىنىڭ ءال-اۋقاتىن ارتتىرۋعا قول جەتكىزەمىز. مەملەكەت جەڭىلدىگى بار نەسيەلەردەن باسقا، بيزنەستى باستاۋ ءۇشىن گرانتتار، سۋبسيديالانعان جۇمىس ورىندارىن ۇسىنادى. وسى مۇمكىندىكتەردىڭ بارلىعىن پايدالانا وتىرىپ، جاقسى ناتيجەلەرگە قول جەتكىزۋگە بولادى»، - دەپ اتاپ ءوتتى تامارا دۇيسەنوۆا.
اقمولا وبلىسىنىڭ اكىمى مارات احمەتجانوۆ مەملەكەتتىك قولداۋ شاراسى اۋىل شارۋاشىلىعى بيزنەسىن دامىتۋدىڭ ءتيىمدى قۇرالى سانالاتىنىن اتاپ ءوتتى.
«وڭىردە «اۋىل اماناتى» باعدارلاماسى بويىنشا ءتۇرلى باعىتتاعى جوبالار - مال شارۋاشىلىعى، تىگىن جانە بىلعارى ءوندىرىسى، ءسۇت پەن شۇجىق ونىمدەرىن دايىنداۋ جانە باسقا دا سالالارعا قاراجات بەرىلدى. ەندى تۇتىنۋدان وندىرىسكە كوشۋ كەرەك. بۇل جۇمىس ورنىن اشىپ، تابىس اكەلەدى. بيۋجەت حالىقتىڭ يگىلىگى ءۇشىن جۇمىس ىستەۋى كەرەك»، - دەدى مارات احمەتجانوۆ.
قازاقستاندا دارىلىك زاتتاردى تاڭبالاۋ جانە باقىلاۋ جۇيەسى ەنگىزىلدى. بۇل شارا ەلگە اكەلىنگەن نەمەسە وندىرىلگەن ساتتەن باستاپ پاتسيەنتتىڭ ستاتسيوناردا پايدالانۋىنا نەمەسە ءدارىحانالاردا ساتىپ الۋىنا دەيىن پرەپاراتتار قوزعالىسىنىڭ اشىقتىعىن قامتاماسىز ەتۋگە ارنالعان. تامارا دۇيسەنوۆا كوكشەتاۋ قالاسى ءدارىحانالارى ءبىرىنىڭ بازاسىندا جۇيەنىڭ جۇمىسىمەن تانىستى. سونداي-اق وبلىستىق اۋرۋحانادا ءدارى-دارمەكتەردى قابىلداۋ جانە بوساتۋ پروتسەدۋراسى كورسەتىلدى.
دەنساۋلىق ساقتاۋ سالاسىن دامىتۋدىڭ وزەكتى ماسەلەلەرى وڭىردەگى مەديتسينالىق مەكەمەلەردىڭ باس دارىگەرلەرىنىڭ قاتىسۋىمەن وتكەن كەڭەستە قارالدى. تالقىلاۋدىڭ نەگىزگى تاقىرىبى - پرەزيدەنتتىڭ تاپسىرمالارىن ورىنداۋ. بۇگىنگى تاڭدا كەپىلدەندىرىلگەن بازالىق جانە ساقتاندىرۋ بولىكتەرىنەن تۇراتىن مەديتسينالىق كومەكتىڭ ءبىرىڭعاي پاكەتىن قالىپتاستىرۋ مىندەتى وزەكتى. بارلىق وڭىردە ساقتاندىرىلماعان ازاماتتاردى جۇيەگە تارتۋ بويىنشا جۇمىس بەلسەندى جۇرگىزىلىپ جاتىر.
«ءاربىر ساقتاندىرىلعان ازامات اۋدارىمدار كولەمىنە قاراماستان، ەرەسەكتەردىڭ ستوماتولوگياسى مەن كوسمەتولوگياسىنا بايلانىستى قىزمەتتەردى قوسپاعاندا، ساقتاندىرۋ شەڭبەرىندە بارلىق قاجەتتى مەديتسينالىق كومەكتى الۋى ءتيىس. اۋرۋدى ەرتە انىقتاۋ بويىنشا جۇمىستى كۇشەيتۋ قاجەت»، - دەدى تامارا دۇيسەنوۆا.
اقمولا وبلىسىنا جۇمىس ساپارى اياسىندا سپورتتى دامىتۋ ماسەلەلەرى بويىنشا كەڭەس وتكىزىلىپ، سپورتتىق ۇيىمدار مەن مەكتەپ باسشىلارى قاتىستى. تۋريزم جانە سپورت ۆيتسە- ءمينيسترى سەرىك جاراسبايەۆ ءوز بايانداماسىندا ۇسىنىلىپ وتىرعان نەگىزگى وزگەرىستەرگە توقتالىپ ءوتتى. ولار سپورت تۇرلەرىنە باسىمدىق بەرۋ، جان باسىنا شاققانداعى قارجىلاندىرۋ تەتىگىن ەنگىزۋ، سپورتشى دايىنداۋدىڭ كوپ دەڭگەيلى، ساباقتاس جۇيەسىن ءتۇزۋ، سالانى سيفرلاندىرۋعا قاتىستى بولدى. كەڭەس بارىسىندا سپورت مەكتەپتەرىنىڭ باسشىلارى وزدەرىن مازالاعان ساۋالداردى جولداپ، سپورت سالاسىن دامىتۋعا قاتىستى پىكىرلەرىن ايتتى.
ۆيتسە-پرەمەر ۇسىنىلعان نورمالار بارلىق مۇددەلى تاراپتارمەن تالقىلاناتىنىنا باسا ءمان بەردى. كەزدەسۋ كەزىندە كوتەرىلگەن ماسەلەلەر مەن ۇسىنىستار جان-جاقتى قاراستىرىلىپ، ەسكەرىلەتىن بولادى.