تاماقتى جىلىتپاي جەۋ جۇرەك اۋرۋلارىنا شالدىقتىرۋى مۇمكىن
اش قارىنعا سالقىن سۋ ىشكەندە اسقازاندا ىڭعايسىزدىق سەزىنگەن كەزىڭىز بولدى ما؟ تەراپيەۆت پولينا شۋبينا مۇنىڭ سەبەبى سالقىن سۋ اسقازان-ىشەك بۇلشىقەتتەرىنىڭ جيىرىلۋىن ىنتالاندىرعانىنان ەكەنىن ايتتى، - دەپ حابارلايدى doctorpiter.
دارىگەر سالقىن سۋدى ءىش قاتۋدان زارداپ شەگەتىن ادامدار ىشكەنى ءجون ەكەنىن ءبولىستى. ال جىلى تاعام ىشەك جيىرىلۋىن باسەڭدەتەتىندىكتەن، قابىنۋ مەن ديارەياسى بارلارعا وڭ اسەر ەتەدى. دەگەنمەن مامان تاماقتى تىم قاتتى سالقىن نە ىستىق كۇيدە تۇتىنۋعا بولمايتىنىن دا ەسكەرتتى.
«تىم ىستىق تاعام شىرىشتى قابىققا تەرىس اسەر ەتەدى. تەمپەراتۋراسى 60 گرادۋستان جوعارى سۋسىنداردى كۇنىنە ەكى رەتتەن ءجيى قابىلداۋ وڭەش ونكولوگياسىنىڭ دامۋ قاۋپىن ەكى ەسە ارتتىرۋى مۇمكىن»، - دەدى تەراپەۆت.
ونىڭ ايتۋىنشا، بۇل جوعارى تەمپەراتۋرا شىرىشتى قابىقتى كۇيدىرىپ، قابىنۋدى تۋدىراتىنىنىڭ اسەرى.
«تەمپەراتۋراسى 60 گرادۋستان جوعارى تاعامدار مەن سۋسىنداردى گاستروەزوفاگيالدى رەفليۋكس اۋرۋى، ەوزينوفيلدى ەزوفاگيت جانە وڭەش اۋرۋلارى بار ناۋقاستار ءجيى تۇتىنباعانى ابزال»، - دەپ تۇسىندىرەدى پولينا شۋبينا.
سونىمەن قاتار، پولينا شۋبينا «سۋىق ديەتا» اتتى سالماق تاستاۋعا كومەكتەسەتىن تاماقتانۋ ءتۇرىنىڭ بار ەكەنىن ايتتى.
«اسقازان-ىشەك جولىنداعى فەرمەنتتەردىڭ بەلسەندىرىلۋى بەلگىلى ءبىر تەمپەراتۋرادا جۇرەدى. ەگەر تاعامنىڭ تەمپەراتۋراسى جەتپەسە، ماي، اقۋىز جانە كومىرسۋلار بولىنبەي، ىشەك ارقىلى باستاپقى پىشىنىندە وتەدى. بۇل ءوز كەزەگىندە ومىرلىك ماڭىزدى زاتتاردىڭ جەتىسپەۋشىلىگىن تۋدىرادى، سونىمەن قاتار بۇكىل اسقازان-ىشەك جولدارىنىڭ ميكروفلوراسىنىڭ وزگەرۋىنە اكەپ سوقتىرادى»، - دەپ ءتۇسىندىردى گاستروەنتەرولوگ.
سونىمەن قاتار، ءتىپتى جىلىتپايتىن جەمىس-جيدەك، كوكونىس سەكىلدى تاعامداردى دا توڭازىتقىشتان شىعارعاننان كەيىن بىردەن جەمەگەن دۇرىس.
بۇدان بولەك، سالقىن تاعام جۇرەك-قان تامىرعا دا قاۋىپ توندىرەدى.
«سالقىن تاماق بۇلشىق ەتتىڭ عانا ەمەس، تامىرلار مەن جۇرەكتىڭ دە جيىرىلىپ قالۋىنا اسەر ەتۋى مۇمكىن. وعان قوسا، تومەن تەمپەراتۋراداعى تاماقتان ستەنوكارديا ءورشيدى. بۇعان جۇرەك-قان تامىر اۋرۋلارى، اسىرەسە جۇرەكتىڭ يشەميالىق اۋرۋى بار ناۋقاستاردىڭ نازارىن اۋدارۋدى ۇسىنامىز»، - دەدى پولينا شۋبينا.