تاماق ىشكەننەن كەيىن ءتىستى بىردەن تازالاۋعا بولمايدى - ستوماتولوگ

تىستەرىڭىزدى تاماق ىشكەننەن كەيىن بىردەن تازالايتىن بولساڭىز وعان وراسان زيان كەلتىرۋىڭىز مۇمكىن. ءتىس دارىگەرى نەگە تاماقتان كەيىن بىردەن اۋىز قۋىسىن تازالاۋ ءتۇرلى پروبلەما تۋدىراتىنىن ايتادى. وندايدا تىسكە قاڭعۇرت ءتۇسىپ، ەمال بۇزىلىپ، تىستەردىڭ سەزىمتالدىعى ارتادى، دەپ جازادى turkystan.kz.

ءتىس دارىگەرلەرى ءتىستى كۇنىنە ەكى رەت - تاڭەرتەڭ جانە كەشكە تازالاۋ كەرەك دەيدى. ءبىراق كوپ ادام تازالاۋ ۋاقىتىنىڭ دا ماڭىزى بار ەكەنىن ەسكەرە بەرمەيدى. اسىرەسە، ءتاتتى تاماقتان كەيىن ءتىستى بىردەن تازالاماۋ كەرەك.

بريتاندىق ءتىس دارىگەرى تارۋن ناگپالدىڭ ايتۋىنشا، شوكولاد، جەمىستەر نەمەسە باسقا تاتتىلەردەن كەيىن ءتىستى بىردەن تازالاۋ - ەمالدىڭ زاقىمدانۋىنا اكەلۋى مۇمكىن.

«قۇرامىندا قانت بار ونىمدەردى جەگەن كەزدە اۋىزداعى باكتەريالار قىشقىلدار شىعارا باستايدى. بۇل قىشقىلدار ەمالدى - ءتىستىڭ قورعانىش قاباتىن - ۋاقىتشا جۇمسارتادى. ەگەر سول ساتتە ءتىستى تازالاساڭىز، جۇمسارعان ەمالدى سىلىپ تاستايسىز. بۇل ۋاقىت وتە كەلە تىستەردى السىرەتەدى»، - دەيدى دارىگەر.

ءتاتتى جەگەننەن كەيىن بىردەن ءتىس تازالاۋدىڭ قاۋپى

مامان مۇنداي ارەكەت ءتىستىڭ سەزىمتالدىعىنا، كاريەسكە جانە ەمالدىڭ بۇزىلۋىنا الىپ كەلۋى مۇمكىن ەكەنىن ەسكەرتەدى. ۋاقىتىن دۇرىس تاڭداماسا ءتىس تازالاۋ - تىستەردى قورعاعاننىڭ ورنىنا، كەرىسىنشە، ولارعا زيان كەلتىرۋى مۇمكىن. بۇل اسىرەسە ءەمالى السىرەگەن نەمەسە سەزىمتالدىعى جوعارى ادامدارعا قاۋىپتى.

مامان تاماقتان كەيىن كەم دەگەندە 30 مينۋت كۇتۋگە كەڭەس بەرەدى. وسى ۋاقىت ىشىندە سىلەكەي باكتەريالار بولەتىن قىشقىلداردى بەيتاراپتاندىرىپ، ەمال ءوزىنىڭ بەرىكتىگىن قايتا قالپىنا كەلتىرەدى. سول كەزدە ءتىستى تازالاۋ شىن مانىندە ءتيىمدى ءارى ءقاۋىپسىز بولادى.

«سىلەكەي - اۋىز قۋىسىنىڭ تابيعي قورعانىسى. ول تاماق قالدىقتارىن شايىپ، قىشقىلدى ازايتىپ، ەمالدىڭ قالپىنا كەلۋىنە كومەكتەسەدى. ەگەر اسىعىس ارەكەت ەتسەڭىز، زيان كەلتىرۋىڭىز مۇمكىن»، - دەيدى دارىگەر.

تاماقتان كەيىن ءتىس تازالاۋدىڭ ورنىنا نە ىستەۋ كەرەك؟

ەگەر ءسىز شوكولاد، جەمىس نەمەسە باسقا تاتتىلەر جەگەن بولساڭىز، ءتىس دارىگەرى شەتكانىڭ ورنىنا مىنالاردى ۇسىنادى:

اۋىزدى سۋمەن شايىڭىز؛

قانتسىز ساعىز شايناڭىز؛

جارتى ساعات كۇتىپ، سودان كەيىن عانا ءتىس تازالاۋعا كىرىسىڭىز.

تىستەردى دۇرىس كۇتۋ - مامان كەڭەستەرى:

تىستەرىڭىزدى تاڭەرتەڭ جانە كەشكە فتور بار ءتىس پاستاسىمەن تازالاڭىز؛

ءتىس ءجىبىن قولدانىڭىز؛

ءتىس دارىگەرىنە جارتى جىلدا كەمىندە ءبىر رەت بارىڭىز؛

ءتاتتى جانە قىشقىل ونىمدەردەن كەيىن 30 مينۋت ىشىندە ءتىس تازالاماڭىز.

ەسىڭىزدە بولسىن:

ءتاتتى جەگەننەن كەيىن بىردەن ءتىس تازالاماڭىز.

30 مينۋت كۇتىڭىز.

ساعىز نەمەسە سۋدى پايدالانىڭىز.

تىستەرىڭىزدى كۇنىنە ەكى رەت تازالاڭىز.