تاليباندار بيلىكتى العاندا اۋعانستاننان ۇشىپ شىققان ۇشاقتار وزبەكستاندا قالاتىن بولدى

استانا. Kazinform - ۆاشينگتون-تاشكەنت كەلىسىمىنە سايكەس، «تاليبان» كابۋلدى باسىپ العان كەزدە اۋعانستاننان وزبەكستان اۋماعىنا ۇشىپ وتكەن ءبىرقاتار اسكەري ۇشاقتار، تىكۇشاقتار جانە باسقا دا تەحنيكالار وزبەكستاندا قالاتىن بولدى. بۇل تۋرالى The Khaama Press حابارلادى.

اۋعانستانداعى «تاليباننىڭ» ۋاقىتشا ۇكىمەتىندەگى قورعانىس مينيسترلىگى ا ق ش پەن وزبەكستان اراسىنداعى بۇل كەلىسىمدى «قيسىنسىز» دەپ اتادى.

«تاليبان» ا ق ش- پەن جاسالعان بۇل كەلىسىمدى قولدامايتىنىن، وزبەكستاننان بۇرىنعى ۇكىمەتتىڭ ۇشاقتارىن اۋعانستانعا قايتارۋدى تالاپ ەتەتىنىن ايتقان. تاليباندار بيلىكتى قولعا العانعا دەيىن اۋعانستاندا 164 جاۋىنگەرلىك ۇشاق بولعان، قازىر ولاردىڭ سانى 81. ويتكەنى اۋعانستان اۋە كۇشتەرىنىڭ ۇشقىشتارى ۇشاقتار مەن تىكۇشاقتاردىڭ ءبىر بولىگىن وزبەكستان مەن تاجىكستانعا الىپ ءوتىپ ۇلگەرگەن. وسى كەزدە ا ق ش- تىڭ تاشكەنتتەگى ەلشىسى دجوناتان حەنيك اۋعانستاننىڭ بۇرىنعى اسكەري ۇشاقتارىنىڭ تاعدىرى تۋرالى وزبەكستانمەن كەلىسىمگە كەلىپ، ولاردىڭ ۆاشينگتونعا تيەسىلى ەكەنىن مالىمدەدى. ۆاشينگتون-تاشكەنت كەلىسىمى بويىنشا، بۇرىنعى اۋعانستان ۇكىمەتىنىڭ ۇشاقتارى وزبەكستاندا قالدى.

حەنيك ۇشاقتاردىڭ ەشقاشان اۋعاندىقتاردىكى بولماعانىن، اۋعاندىق اسكەريلەردىڭ ولاردى پايدالانعانىن، ءبىراق مەنشىك قۇقىعى ءارقاشان ا ق ش- تا قالعانىن اتاپ ءوتتى.

بۇعان جاۋاپ رەتىندە «تاليبان» ۋاقىتشا ۇكىمەتىندەگى قورعانىس مينيسترلىگى بۇل كەلىسىمدى قابىلدامايتىنىن ايتىپ، كورشىلەستىك قارىم-قاتىناستىڭ ماڭىزدىلىعىنا توقتالىپ، وزبەكستاننان اۋعانستان اسكەري-اۋە كۇشتەرىنىڭ ۇشاقتارىن تاليبان اكىمشىلىگىنە بەرۋدە ىنتىماقتاسۋدى سۇرادى.