الماتىدا قوعامدىق كولىك جۇرگىزۋشىسىن پىشاقپەن قورقىتقان ەر ادام ۇستالدى

الماتى. KAZINFORM - الماتىدا قوعامدىق كولىك جۇرگىزۋشىسىن قورقىتقان بۇزاقى قولعا ءتۇستى. قالالىق پوليتسيا دەپارتامەنتىنىڭ مالىمەتىنشە، بۇل دەرەك الەۋمەتتىك جەلىلەرگە جۇرگىزىلگەن مونيتورينگ بارىسىندا انىقتالدى.

«كۋاگەرلەردىڭ ۆيدەوسىندا ەر ادامنىڭ اۋەلى اۆتوبۋستىڭ ەسىگىن تەۋىپ، سوسىن پىشاق سياقتى كورىنگەن زاتتى سىلتەپ، جۇرگىزۋشىنى قورقىتقانى كورىنەدى. اتالعان جاعداي نازاربايەۆ پەن رايىمبەك داڭعىلدارىنىڭ قيىلىسىنداعى قوعامدىق كولىكتەردىڭ سوڭعى ايالداماسىندا بولعاندىعى بەلگىلى بولدى. وسى قىلمىستى اشۋ جانە ونىڭ وبەكتيۆتى ءمان-جايلارىن انىقتاۋ ءۇشىن قالانىڭ بەينەباقىلاۋ جۇيەلەرىنە تالداۋ جۇرگىزىلىپ، ناتيجەسىندە قىلمىسقا قاتىسى بار ادام انىقتالدى»، - دەدى جەتىسۋ اۋداندىق پوليتسيا باسقارماسىنىڭ باستىعى، پوليتسيا پولكوۆنيگى جانىبەك شىناسىلوۆ.

كۇدىكتى ۇستالىپ، ۋاقىتشا ۇستاۋ يزولياتورىنا قامالدى.

«بۇزاقىلىق دەرەگى بويىنشا قىلمىستىق ءىس قوزعالدى. تەرگەۋ بارىسىندا كۇدىكتى مەن اۆتوبۋس جۇرگىزۋشىسى اراسىنداعى كيكىلجىڭ ايالداما ورنىندا تۇرعان كولىككە ءوتىپ بارا جاتقان ادامنىڭ ءمىنۋ نيەتىنەن تۋىنداعانى بەلگىلى بولدى. جۇرگىزۋشى وعان ەسكەرتۋ ايتتى، ال ءوتىپ بارا جاتقان ادام قۇرىلىس پىشاعىن شىعارعان. ەشكىم زارداپ شەككەن جوق»، - دەدى جانىبەك شىناسىلوۆ.

وسىعان دەيىن الماتىدا قوعامدىق كولىك جۇرگىزۋشىسى مەن جولاۋشى جول ۇستىندە جانجال شىعارعانى تۋرالى جازعان ەدىك.