«تاليبان» العاش رەت ب ۇ ۇ سامميتىنە قاتىسادى

استانا. قازاقپارات - اۋعانستاندى بيلەپ وتىرعان «تاليبان» قوزعالىسىنىڭ وكىلدەرى العاش رەت بىرىككەن ۇلتتار ۇيىمىنىڭ كليمات وزگەرىسى جونىندەگى سامميتىنە قاتىسادى. جيىن بۇگىن باكۋدە باستالادى.

اۋعانستان سىرتقى ىستەر مينيسترلىگىنىڭ حابارلاۋىنشا، تالىپتەردى حالىقارالىق جيىنعا ازەربايجان باقىلاۋشى رەتىندە شاقىرعان. دەلەگاتسيا پىكىرتالاستارعا قاتىسىپ، ەكىجاقتى كەزدەسۋلەر وتكىزەدى. ءبىراق «تاليبان» وكىلدەرىنە نەگىزگى وتىرىستاردا بوي كورسەتۋگە تىيىم سالىنعان. ويتكەنى بۇل ۇيىم اۋعانستاننىڭ رەسمي ۇكىمەتى رەتىندە حالىقارالىق دەڭگەيدە ءالى مويىندالماعان. بۇعان 2021 -جىلى كابۋلداعى ورتالىق بيلىكتى كۇشپەن باسىپ الۋى سەبەپ. سونداي-اق ەلدەگى قىز-كەلىنشەكتەردىڭ ەمىن-ەركىن ءجۇرىپ-تۇرۋى مەن قۇقىقتارىن شەكتەۋ دە تالىپتەرگە دەگەن تەرىس كوزقاراس قالىپتاستىرىپ وتىر.

24.kz