تاليبان اۋعانستانداعى جالعىز كينوستۋديانى جاپتى

استانا. KAZINFORM - اۋعانستاندى بيلەۋشى «تاليبان» قوزعالىسى ەلدەگى جالعىز كينو ءوندىرىس ۇيىمى - مەملەكەتتىك Afghan Film كينوستۋدياسىن تاراتىپ جىبەردى. كينوستۋديا كەڭسەسى جابىلدى، دەپ حابارلايدى Amu.tv.

تاليبان بۇل ماسەلەگە قاتىستى رەسمي مالىمدەمە جاساعان جوق. الايدا مەكەمەنىڭ جابىلىپ، قىزمەتى توقتاعانىن قىزمەتكەرلەرگە حابارلاعان.

- اۋعانستاندا كوركەمونەر قۇلدىرادى. Afghan Film جاي عانا عيمارات ەمەس، ول ءبىزدىڭ كينەماتوگرافيالىق جادىمىزدىڭ ساقتاۋشىسى بولدى، - دەدى قاۋىپسىزدىك ماقساتىندا اتى-ءجونىن اتاماۋدى وتىنگەن كابۋلدا تۇراتىن ءبىر رەجيسسەر.

مەكەمەنىڭ جابىلۋى تاليباننىڭ اۋعانستانداعى مادەني جانە ويىن-ساۋىق ءومىرىن اۋقىمدى تۇردە باسىپ-جانشۋى، سونداي-اق ايەلدەردىڭ قۇقىقتارى مەن بوستاندىقتارىن شەكتەۋى اياسىندا ورىن الدى. 2021 -جىلدىڭ تامىز ايىندا توپ بيلىككە ورالعاننان بەرى كوپشىلىك الدىندا ءان ايتۋعا، مۋزىكالىق اسپاپتاردا ويناۋعا جانە ءتىرى جاندى بەينەلەۋگە تىيىم سالىندى، ال ونەر ادامدارى قۋعىن مەن قورقىتۋلارعا تاپ بولدى.

Afghan Film- ءنىڭ نەگىزى 1968-جىلى بيلەۋشى مۇحاممەد زاحير شاح كەزىندە قالانعان. ول 1970 -جىلدارداعى كينوحرونيكادان باستاپ رەسپۋبليكا داۋىرىندەگى تولىق مەتراجدى كوركەم فيلمدەرگە دەيىن ەلدىڭ كورنەكى تاريحىن ساقتاۋدا ماڭىزدى ءرول اتقاردى.

بۇل مەكەمەدە سونىمەن قاتار ازاماتتىق سوعىس كەزىندە جانە 1990-جىلدارداعى العاشقى تاليبان بيلىگى كەزىندە ونىڭ جويىلۋىنا جول بەرمەۋ ءۇشىن كوپ بولىگى جاسىرىلعان نەمەسە كونتراباندالىق جولمەن اكەلىنگەن قۇندى فيلمدەر مۇراعاتى ورنالاسقان.

2021 -جىلى رەسپۋبليكا قۇلاعانعا دەيىن Afghan Film اقپارات جانە مادەنيەت مينيسترلىگىنىڭ قاراماعىندا بولدى. كينوستۋديا جۇمىس ىستەگەن سوڭعى جىلدارى جاڭعىرتۋ جۇمىستارىن جۇرگىزىپ، كوللەكسياسىن سيفرلاندىرۋ بويىنشا جوبالاردى جۇزەگە اسىردى.

الدىڭعى ۇكىمەت كەزىندەگى Afghan Film- ءنىڭ سوڭعى باسشىسى ساحرا كاريمي بولدى، ول 2021 -جىلى تامىزدا تاليبان كابۋلدى باسىپ العان كەزدە ەلدەن قاشىپ كەتكەن. سودان بەرى كينوستۋديا ەشقانداي بەلسەندىلىكسىز نەمەسە جاڭا تۋىندىلارسىز ءومىر ءسۇردى.

Afghan Film مۇراعاتىنىڭ تاعدىرى قالاي بولاتىنى ءالى بەلگىسىز. مادەني مۇرانى قورعاۋشىلار ونىڭ ۇمىتىلۋ نەمەسە جويىلۋ قاۋپى بار دەپ قورقادى.

ەسكە سالا كەتەيىك، اۋعانستاندا سوڭعى 45 جىلدا العاش رەت ۇلتتىق حالىق ساناعى جۇرگىزىلەدى.

اۆتور

بەگابات ۇزاقوۆ