مەملەكەت باسشىسى قاسىم-جومارت توقايەۆتىڭ تاپسىرماسىنا سايكەس ەلىمىزدە جەتەكشى شەتەلدىك جوعارى وقۋ ورىندارىنىڭ فيليالدارىن اشۋ جونىندەگى ماڭىزدى باستاما جەتىسۋ وڭىرىندە كەزەڭ-كەزەڭىمەن جۇزەگە اسىرىلىپ كەلەدى. ءوڭىردىڭ الەۋمەتتىك-ەكونوميكالىق ەرەكشەلىكتەرى ەسكەرىلە وتىرىپ، ءى. جانسۇگىروۆ اتىنداعى جەتىسۋ ۋنيۆەرسيتەتى بازاسىندا يتاليانىڭ بەدەلدى جوعارى وقۋ ورنى - Marche Polytechnic University فيليالى اشىلعان بولاتىن. اتالعان فيليال كامپۋسىنىڭ رەسمي اشىلۋ سالتاناتى 2025-جىلعى 16-شىلدەدە تالدىقورعان قالاسىندا ءوتتى.
- جوبانى ىسكە اسىرۋدىڭ ماڭىزدى كەزەڭدەرىنىڭ ءبىرى رەتىندە ءى. جانسۇگىروۆ اتىنداعى جەتىسۋ ۋنيۆەرسيتەتى بازاسىندا اشىلعان Marche Polytechnic University فيليالى ق ر ادىلەت مينيسترلىگىندە 2026-جىلعى 2-ساۋىردە رەسمي تۇردە تىركەلىپ، ونىڭ تولىق زاڭدى مارتەبەسىن راستايتىن قۇجات تابىستالدى. قۇجاتتا فيليالدىڭ زاڭدى مەكەنجايى ايقىندالىپ، باسشىسى تاعايىندالدى. قازىر فيليالدا 31 ستۋدەنت ءبىلىم الادى: ءبىرىنشى كۋرستا – 19، ەكىنشى كۋرستا – 7، ءۇشىنشى كۋرستا - 5 ستۋدەنت. وقىتۋ «اگرونوميا» - «اۋىل شارۋاشىلىعى عىلىمدارى مەن تەحنولوگيالارى» باعىتىنداعى باكالاۆرياتتىڭ قوس ديپلومدى ءبىلىم بەرۋ باعدارلاماسى اياسىندا جۇزەگە اسىرىلادى، - دەلىنگەن حابارلامادا.
فيليال ينفراقۇرىلىمى زاماناۋي تالاپتارعا تولىق سايكەس كەلەدى. كامپۋستا Speed breeding ورتالىعى (جىلىجاي)، سونداي-اق ءتورت زاماناۋي زەرتحانانى قامتيتىن عىلىمي-زەرتتەۋ ينستيتۋتى جۇمىس ىستەيدى. اتاپ ايتقاندا، وسىمدىكتەردى ميكروكلونالدى كوبەيتۋ، مولەكۋلالىق گەنەتيكا جانە گەنوميكا، بيوتەحنولوگيا جانە ەكولوگيا باعىتتارى بويىنشا زەرتحانالار قىزمەت اتقارادى.
ءبىلىم بەرۋ ۇدەرىسى 3 1 مودەلى نەگىزىندە ۇيىمداستىرىلعان. ستۋدەنتتەر العاشقى ءۇش جىلدى جەتىسۋ ۋنيۆەرسيتەتىندە وقىپ، سوڭعى وقۋ جىلىن يتاليانىڭ انكونا قالاسىنداعى Marche Polytechnic University بازاسىندا جالعاستىرادى. بۇل كەزەڭدە ولار ۋنيۆەرسيتەتتىڭ زاماناۋي زەرتحانالارى مەن عىلىمي ورتالىقتارىندا كاسىبي قۇزىرەتتەرىن تەرەڭدەتەدى.
قوس ديپلومدى ءبىلىم بەرۋ باعدارلاماسىن ءتيىمدى ىسكە اسىرۋ ماقساتىندا 2025-جىلعى جەلتوقسان ايىنان باستاپ جەتىسۋ ۋنيۆەرسيتەتىنىڭ قولداۋىمەن يتاليان ءتىلىن وقىتۋ كۋرستارى ۇيىمداستىرىلدى. بۇل ستۋدەنتتەردىڭ يتاليادا ءبىلىم الۋ بارىسىندا پاندەردى ساپالى مەڭگەرۋىنە مۇمكىندىك بەرەدى.
الداعى كەزەڭدە قوس ديپلومدى ءبىلىم بەرۋ باعدارلامالارىن كەڭەيتۋ جوسپارلانعان. اتاپ ايتقاندا، «ەكونوميكا» - «الەمدىك ەكونوميكا جانە كوممەرتسيا» (باكالاۆريات جانە ماگيستراتۋرا)، «اقپاراتتىق تەحنولوگيالار» - «IT- ينجەنەريا» (باكالاۆريات جانە ماگيستراتۋرا)، «ەكولوگيا» - «قورشاعان ورتانى قورعاۋ جانە ورمان شارۋاشىلىعى» (ماگيستراتۋرا) باعىتتارىن ىسكە قوسۋ كوزدەلەدى. بۇل باستامالار جەتىسۋ ءوڭىرىن دامىتۋدىڭ باسىم باعىتتارىنا جانە قازاقستان رەسپۋبليكاسىنىڭ جاڭا ماماندىقتار اتلاسىنا سايكەس كەلەدى.
اتالعان فيليالدىڭ قىزمەتى ءوڭىردىڭ عىلىمي-ءبىلىم بەرۋ الەۋەتىن ارتتىرۋعا، حالىقارالىق اكادەميالىق ينتەگراتسيانى نىعايتۋعا جانە باسەكەگە قابىلەتتى كادرلاردى دايارلاۋعا ەلەۋلى ۇلەس قوسادى دەپ كۇتىلەدى.
وسىعان دەيىن تالدىقورعاندا قىلمىستىق توپ ادامدارعا پسيحولوگيالىق قىسىم جاساپ، اقشا تالاپ ەتكەنىن جازدىق.