تالدىقورعاندا كوتتەدج سالامىز دەپ بيۋدجەت قارجىسىن جىمقىرعان شەنەۋنىكتەر سوتتالدى

 تالدىقورعان سوتىندا «بەرەكە» كوتتەدج قالاشىعىنىڭ ساپاسىز قۇرىلىسىندا كەمشىلىكتەرگە جول بەرگەن كىنالى تۇلعالارعا ۇكىم شىقتى، دەپ حابارلايدى Kazinform. 

وسىعان دەيىن حابارلانعانداي، جەتىسۋ وبلىسىنىڭ پروكۋرورلارى اتالعان نىساندى سالۋ كەزىندە جىمقىرۋ فاكتىسى بويىنشا قىلمىستىق ءىستى تىركەپ، تەرگەۋ جۇرگىزگەن.

كوتتەدج قالاشىعىنداعى ۇيلەرگە قاتىستى اكىمدىك قىزمەتكەرلەرى قاماۋعا الىنعان.

پروكۋرورلىق تەكسەرۋدى باستاۋعا بۇقارالىق اقپارات قۇرالدارىندا بىرنەشە رەت جاريالانعان قۇرىلىسى اياقتالماعان ۇيلەر تۋرالى ماقالالار سەبەپ بولدى.

قىلمىستىق ءىستى تەرگەۋ شەڭبەرىندە مەردىگەر كەلگەن زالالدى وتەدى، ونىڭ ىشىندە 36 ءۇيدى ءوز قاراجاتىنا سالدى.

30-قىركۇيەكتە جەرگىلىكتى اتقارۋشى ورگان 25 ءۇيدىڭ كىلتىن كوپبالالى وتباسىلارعا بەردى.

جاقىن ارادا تاعى 11 ءۇي بەرىلەدى.

سوت ۇكىمىمەن مەردىگەر ۇيىمنىڭ باسشىسى، قۇرىلىستى تەحنيكالىق قاداعالاۋدى جۇزەگە اسىراتىن كومپانيانىڭ جۇمىسكەرلەرى جانە تاپسىرىس بەرۋشى - تالدىقورعان قالاسى قۇرىلىس ءبولىمىنىڭ لاۋازىمدى تۇلعالارى قىلمىستىق كودەكستىڭ 189-بابىنىڭ 4-بولىگى، 361-باپتىڭ 4-بولىگى جانە 280-بابىنىڭ 1-بولىگى بويىنشا كىنالى دەپ تانىلىپ، ءارتۇرلى جازا ارقالادى.

ۇكىم زاڭدى كۇشىنە ەنگەن جوق.