تالدىقورعاندا دۇكەندەگى بانك تەرمينالىن ۇستاعان بالانى توق سوقتى

تالدىقورعان. KAZINFORM - دۇيسەنبى كۇنى تالدىقورعاندا بالا Kaspi تەرمينالىنا قولىن تيگىزگەن كەزدە توق سوقتى، دەپ حابارلادى Kazinform اگەنتتىگىنىڭ مەنشىكتى ءتىلشىسى.

بالانىڭ ساۋساقتارى كۇيىپ قالعان. قازىرگى ۋاقىتتا ونىڭ جاعدايى تۇراقتى، ول اۋرۋحانادا جاتىر.

تەرمينالعا قول تيگىزگەندە توك ۇرعان ءساتى بەينەلەنگەن ۆيدەو الەۋمەتتىك جەلىلەردە پايدا بولدى.

پوليتسيا قىلمىستىق ءىس قوزعادى، تەرگەۋ جۇرگىزىلىپ جاتىر.

- پوليتسيا قىزمەتكەرلەرى قاۋىپسىزدىك تالاپتارىنا سايكەس كەلمەيتىن تاۋارلاردى شىعارۋ نەمەسە ساتۋ، جۇمىستاردى ورىنداۋ نەمەسە قىزمەتتەردى كورسەتۋ فاكتىسى بويىنشا قىلمىستىق ءىس قوزعادى. كامەلەتكە تولماعان بالا زارداپ شەكتى. تەرگەۋ بارىسىندا قاۋىپسىزدىك نورمالارى مەن قۇرىلعىنى ورناتۋ ەرەجەلەرىنىڭ ساقتالۋى تەكسەرىلىپ جاتىر. ەگەر كىنالى تۇلعالار انىقتالسا، ولار زاڭمەن بەلگىلەنگەن تارتىپپەن جاۋاپكەرشىلىككە تارتىلادى، - دەپ حابارلادى جەتىسۋ وبلىسى پوليتسيا دەپارتامەنتى.

تەرگەۋ بارىسى وبلىستىق پوليتسيا دەپارتامەنتى باسشىلىعىنىڭ ەرەكشە باقىلاۋىندا ەكەنى حابارلاندى.

بانك وقيعاعا قاتىستى پىكىر ءبىلدىردى

- 21-ساۋىردە تالدىكورعاندا بالا تەمىر تورعا جانە ازىق- تۇلىك دۇكەنى اۋماعىندا ورنالاسقان Kaspi تەرمينالىنىڭ كورپۋسىنا قول تيگىزگەندە توق سوعىپ جاراقات الدى، - دەپ حابارلادى بانك وكىلدەرى.

بانك وكىلدەرى بالانىڭ ەمدەلۋىنە قاجەتتى بارلىق كومەك كورسەتىلىپ جاتقانىن، ونىڭ وتباسىمەن بايلانىستا ەكەنىن، ماماندار وقيعا سەبەپتەرىن تەكسەرىپ جاتقانىن مالىمدەدى.

ەسكە سالامىز، بۇعان دەيىن قىزىلوردادا مۇزداتقىش كامەراعا قول تيگىزگەننەن كەيىن توك سوعىپ قايتىس بولعان بالانىڭ وتباسى تەرگەۋدىڭ باياۋ جۇرگىزىلۋىنە نارازىلىق بىلدىرگەن بولاتىن.