تالدىقورعاندا ءابىلحان قاستەيەۆكە ەسكەرتكىش قويىلدى
تالدىقورعان. KAZINFORM - كەشە جەتىسۋ وبلىسىنىڭ تالدىقورعان قالاسىندا قازاقستاننىڭ حالىق سۋرەتشىسى ءابىلحان قاستەيەۆتىڭ ەسكەرتكىشى ورناتىلدى. سۋرەتشىنىڭ 120 جىلدىعىنا وراي قويىلعان قولا ءمۇسىن كوركەمونەر گالەرەياسىنىڭ اۋلاسىنا قويىلدى.
مەرەيتويلىق شاراعا جەتىسۋ وبلىسىنىڭ اكىمى بەيبىت يسابايەۆ، مەملەكەت جانە قوعام قايراتكەرى مىرزاتاي جولداسبەكوۆ، قازاقستاننىڭ حالىق جازۋشىسى بەكسۇلتان نۇرجەكەيەۆ، قازاقستان سۋرەتشىلەر وداعىنىڭ باسقارما ءتوراعاسى ومىربەك جۇبانيازوۆ پەن كورنەكتى قىلقالام شەبەرىنىڭ قىزى گۇلداريا قاستەيەۆا جانە وزگە دە زيالى قاۋىم وكىلدەرى مەن وبلىس جۇرتشىلىعى قاتىستى.
«ءابىلحان قاستەيەۆپەن ەتەنە ارالاسپاسام دا تىرىسىندە كوزىن كوردىم. قوي اۋزىنان ءشوپ المايتىن مومىن كىسىنىڭ تۇلا بويىندا ساف تالانتتىڭ تۇنىپ جاتقانى تاڭقالارلىق. ول - قازاقتىڭ رۋحىن كوتەرگەن، قازاقتى الەمگە تانىتقان ازامات. ءبىز مۇنداي ۇلى ونەر يەلەرىن قاستەرلەۋىمىز كەرەك. سوندا عانا بەرەكەلى ەل بولامىز. ءابىلحان اعا ەشقاشان ولمەيدى، حالىقتىڭ كوكەيىندە جارقىراپ قالا بەرەدى» - دەدى مەملەكەت جانە قوعام قايراتكەرى، ۇلتتىق عىلىم اكادەمياسىنىڭ اكادەميگى مىرزاتاي جولداسبەكوۆ.
ەسكەرتكىشتىڭ اشىلۋىنان كەيىن قوناقتار كوركەمونەر گالەرەياسىنىڭ ىشىندە ءا. قاستەيەۆتىڭ 120 جىلدىعىنا ارنالعان ەكسپوزيتسيالىق كورمەنى تاماشالادى. وندا سۋرەتشىنىڭ 9 كارتيناسىنىڭ تۇپنۇسقاسى قويىلعان. بۇدان ءارى مەرەيتويلىق جيىن ءى. جانسۇگىروۆ اتىنداعى مادەنيەت سارايىندا «تۇعىرى بيىك تاۋ تۇلعا» اتتى رەسپۋبليكالىق كونفەرەنتسيامەن جالعاستى. سونداي-اق ساحنا تورىندە مەرەيتويعا ارناپ شىعارىلعان قىلقالام شەبەرىنىڭ ءومىرى مەن ونەر جولىنا قاتىستى «ءابىلحان قاستەيەۆ»، «ءومىر مەكتەبى» كىتاپتارىنىڭ تۇساۋى كەسىلدى.
«ءبىز كىشكەنتايىمىزدان اتامىزدىڭ بارلىق كارتينالارىن كورىپ- ءبىلىپ وستىك. سونىڭ ىشىندە ماعان اكۆارەلمەن سالعان تاۋلاردىڭ كارتيناسى كەرەمەت ۇنايتىن. وسە كەلە سۋرەتشىلىك ونەرگە بەت بۇردىم. قازىر كەسكىندەمە، گرافيكا، يلليۋستراتسيا باعىتتارىندا جۇمىس جاسايمىن. ءابىلحان اتامىزدىڭ ەڭبەگى باعالانىپ، حالىقتىڭ قۇرمەتىنە بولەنىپ جاتقانى - ءبىز ءۇشىن ماقتانىش»، - دەيدى ساۋران قاستەيەۆ.
جەتىسۋ وبلىسى اكىمىنىڭ باسپا ءسوز قىزمەتىنىڭ مالىمەتىنشە ەرتەڭ قاستەيەۆتىڭ تۋعان جەرى پانفيلوۆ اۋدانى شەجىن اۋىلىندا سۋرەتشىلەردىڭ رەسپۋبليكالىق پلەنەرى باستالادى. وعان ەلىمىزدىڭ 20 عا جۋىق كاسىبي سۋرەتشىسى قاتىسادى. پلەنەر 10-قازانعا دەيىن جالعاسىپ، شارا جاركەنت قالاسىنداعى كوركەمونەر گالەرەياسىندا قاتىسۋشىلاردىڭ ەڭبەكتەرىنىڭ كورمەسىمەن قورىتىندىلانادى.
ەسكە سالا كەتەيىك، بۇعان دەيىن تالدىقورعاندا 20 جاستاعى جىگىتتى جۇك كولىگى باسىپ كەتكەنى تۋرالى جازعانبىز.
اۆتور
ايبەك قۇتتىبەك