تالدىقورعاندا بەيسەن قۇرانبەكتى ەسكە الۋعا ارنالعان تۋرنير ءوتتى

جەتىسۋ وبلىسىندا شاعىن فۋتبولدان بەيسەن قۇرانبەكتى ەسكە الۋعا ارنالعان تۋرنير ءوتتى. جۋرناليستەر اراسىنداعى رەسپۋبليكالىق جارىس بيىل ءۇشىنشى رەت ۇيىمداستىرىلدى، دەپ حابارلايدى Kazinform.

بەلگىلى تەلەجۋرناليست بەيسەن قۇرانبەكتى ەسكە الۋعا ارنالعان ءىس-شارانى وتكىزۋ جەتىسۋ وبلىسىندا داستۇرگە اينالعان. بيىل ءۇشىنشى رەت جالاۋى كوتەرىلگەن جۋرناليستەر اراسىنداعى اياقدوپ جارىسى سونىڭ ءبىر مىسالى. جىل سايىن 9-جەلتوقسان - بەيسەن قۇرانبەكتىڭ تۋعان كۇنى قارساڭىندا وتەتىن شاعىن فۋتبول جارىسىنا ءار وبلىستان كەلگەن 8 كوماندا قاتىستى.

ەكى كۇن بويى تالدىقورعانداعى ءسۇيىنباي اتىنداعى جاستار سپورت سارايىندا جۇلدەلى ورىنداردى ساراپقا سالعان كوماندالار اراسىنان «Qaz365.kz» كومانداسى سۋىرىلىپ شىعىپ، ءبىرىنشى ورىندى يەلەندى.

ەكىنشى ورىن تالدىقورعاندىق «قارەكەت» كومانداسىنا بۇيىرسا، ءۇشىنشى ورىندى «الماتى- سانىك» كومانداسى قانجىعاعا بايلادى. ال ءتورتىنشى ورىن «J-19» كومانداسىنا بۇيىردى.

تۋرنيردە ۇزدىك ونەر كورسەتكەن جەكەلەگەن ويىنشىلار دا ماراپاتتالدى. مۇنان بولەك، جۋرناليست نۇرتىلەۋ يمانعالي ۇلى اتىنداعى ارنايى جۇلدە - اراي ەسەنبەككە، ال سايىن تۇرسىنوۆ اتىنداعى تاعى ءبىر ارنايى جۇلدە - جاندوس ايتباي ۇلىنا تابىستالدى.

اۆتور

قالماحانبەت مۇقامەتقالي