تالدىقورعاندا بۇرىنعى ءبىلىم ءبولىمىنىڭ باستىعى 11 جىلعا سوتتالدى

استانا. قازاقپارات - جەتىسۋ وبلىسى ءبىلىم ءبولىمىنىڭ بۇرىنعى باستىعى سوت شەشىمىمەن 11 جىلعا باس بوستاندىعىنان ايىرىلدى.

وبلىستىڭ مامانداندىرىلعان اۋدانارالىق قىلمىستىق سوتىنىڭ شەشىمىمەن، سوتتالۋشى ق ك-نىڭ 366-بابىنىڭ 4-بولىگى جانە 24-بابىنىڭ 3-بولىگى بويىنشا كىنالى دەپ تانىلدى.

«بۇرىنعى ءبىلىم ءبولىمىنىڭ باستىعى بۋحالتەر مەن ونىڭ ەكى سىبايلاسىنىڭ ءىرى مولشەردە بيۋدجەت قاراجاتىن جىمقىرعانىن انىقتاعان (ولارعا قاتىستى جىمقىرۋ فاكتىسى بويىنشا جەكە قىلمىستىق ءىس جۇرگىزىلۋدە). ءوزىنىڭ قىزمەتتىك جاعدايىن پايدالانا وتىرىپ، ول بۋحالتەردەن اتقارىپ وتىرعان لاۋازىمىن بوساتۋدى نەمەسە قامقورلىعى ءۇشىن 380 ميلليون تەڭگە پارا بەرۋدى تالاپ ەتكەن. بۋحالتەر مەن ونىڭ سىبايلاستارى 200 ميلليون تەڭگە جيناپ، ونى كولىك جۇرگىزۋشىسى ارقىلى ءبولىم باستىعىنا بەرگەن»، - دەلىنگەن اقپاراتتا.

كەيىنىرەك، باسشى پارانىڭ قالعان سوماسىن تالاپ ەتكەندە، بۋحالتەر قۇقىق قورعاۋ ورگاندارىنا جۇگىنىپ، باسشى 80 ميلليون تەڭگە پارا العان كەزدە ۇستالعان.

سوتتالۋشىنىڭ كىناسى كۋاگەرلەردىڭ ايعاقتارىمەن، سوت ساراپتامالارىنىڭ قورىتىندىلارىمەن، قىلمىستىق ءىس ماتەريالدارىمەن جانە ءىس بويىنشا جينالعان باسقا دا دالەلدەمەلەرمەن راستالادى.

پروكۋرور سوتتالۋشىنى 11 جىلعا باس بوستاندىعىنان ايىرۋدى سۇرادى. قورعاۋشى تاراپ اقتاۋ ۇكىمىن سۇرادى. سوتتالۋشى كىناسىن مويىندامادى.

«سوت جازا تاعايىنداۋ كەزىندە قىلمىستىق جاۋاپتىلىق پەن جازانى جەڭىلدەتەتىن ءمان-جايدى اسىراۋىندا جاس بالالاردىڭ بولۋىن ەسكەردى. اۋىرلاتاتىن ءمان-جاي - مەملەكەتتىك قىزمەتشىنىڭ انتىن بۇزۋ. سوتتالۋشى ق ك-نىڭ 366-بابىنىڭ 4-بولىگى جانە 24-بابىنىڭ 3-بولىگى بويىنشا كىنالى دەپ تانىلدى. ول 11 جىلعا باس بوستاندىعىنان ايىرىلدى»، - دەلىنگەن سوت ۇكىمىندە.