تالدىقورعان تۇرعىنىنان 20 ميلليون تەڭگەنىڭ ەسىرتكىسى تاركىلەندى
تالدىقورعان. KAZINFORM - جەتىسۋ وبلىسى پوليتسيا دەپارتامەنتىنىڭ ەسىرتكى قىلمىسىنا قارسى باسقارماسىنىڭ قىزمەتكەرلەرى «قاراسورا-2024» جەدەل-پروفيلاكتيكالىق ءىس-شاراسى اياسىندا مەفەدروننىڭ ءىرى پارتياسىن تاركىلەدى.
وبلىستىق پروكۋراتۋرامەن بىرلەسە وتىرىپ اتقارىلعان جەدەل ءىس-قيمىلدىڭ ناتيجەسىندە تالدىقورعان قالاسىنىڭ 34 جاستاعى تۇرعىنى تۇتقىندالدى.
پوليتسيا دەپارتامەنتىنىڭ باسپا ءسوز قىزمەتى تاراتقان مالىمەت بويىنشا كۇدىكتىنىڭ كولىگىن تەكسەرۋ بارىسىندا ەرەكشە ءيىسى بار اق زاتتىڭ قاپشىعى تابىلعان. ساراپتاما قورىتىندىسىنا سايكەس ونىڭ «مەفەدرون» سينتەتيكالىق ەسىرتكىسى ەكەنى انىقتالدى. سالماعى 1 كەلى بولاتىن ەسىرتكى 2000 دوزاعا تەڭ، ال نارىقتىق قۇنى 20 ميلليون تەڭگەگە باعالانادى.
«وسى فاكت بويىنشا سوتقا دەيىنگى تەرگەۋ امالدارى باستالىپ كۇدىكتى ۋاقىتشا ۇستاۋ يزولياتورىنا قامالدى. جىل باسىنان بەرى جەتىسۋ وبلىستىق پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى زاڭسىز اينالىمنان 500 كەلىگە جۋىق ءتۇرلى ەسىرتكى زاتتارىن تاركىلەدى»، - جەتىسۋ وبلىستىق پوليتسيا دەپارتامەنتىنىڭ رەسمي وكىلى جانار حالىقوۆا.
پوليتسيا قىزمەتكەرلەرى ەسىرتكى زاتتارىن ءوندىرۋ، ساقتاۋ، تاسىمالداۋ جانە اسا ءىرى مولشەردە وتكىزۋ سياقتى زاڭسىز ارەكەت جاساعاندارعا مۇلكى تاركىلەنىپ، 10 جىلدان 15 جىلعا دەيىنگى مەرزىمگە باس بوستاندىعىنان ايىرۋ جازاسى قاراستىرىلعانىن ەسكەرتەدى.
ەسكە سالا كەتەيىك بۇعان دەيىن تالدىقورعان قالاسىندا 1284 دانا ۆەيپ ساتپاق بولعان ەكى جىگىتتىڭ ۇستالعانىن جازعانبىز.