تالدىقورعان ماڭىنان ەرتە تەمىر داۋىرىنە جاتاتىن قورعان تابىلدى
جەتىسۋ وبلىسىنىڭ تاريحي-مادەني مۇرانى قورعاۋ جونىندەگى ورتالىعىنىڭ مۇرىندىق بولۋىمەن تالدىقورعان قالاسىنىڭ ماڭىنداعى داۋىلباي قورىمىنا زەرتتەۋ جۇرگىزىلدى. اۋماقتى قازعان ءال-فارابي اتىنداعى قاز ۇ ۋ ارحەولوگيالىق ەكسپەديتسياسى قورعاننان ەرتە تەمىر داۋىرىنە جاتاتىن ايعاقتار تاپتى، دەپ حابارلايدى Kazinform.
وبلىستىق مادەنيەت، ارحيۆتەر جانە قۇجاتتاما باسقارماسىنىڭ مالىمەتىنە قاراعاندا، دالالىق زەرتتەۋلەر بارىسىندا قورعاننىڭ بىرنەشە رەت تونالعاندىعى جانە سوڭعى رەت وتكەن جىلى عانا توناۋعا ۇشىراعانى انىقتالدى. وسىعان بايلانىستى جەتىسۋ وبلىسىنىڭ تاريحي-مادەني مۇرانى قورعاۋ جونىندەگى ورتالىعى ارحەولوگتاردىڭ كۇشىمەن اتالعان تاريحي ەسكەرتكىشتى زەرتتەۋدى ءجون دەپ تاپتى.
ارحەولوگ مامانداردىڭ پىكىرىنشە، قورعان ەليتالىق بولىپ سانالادى. قورعاننىڭ بيىكتىگى - 3,4 م، ديامەترى - 40 م. اينالاسى ورمەن قورشالعان. توناۋشىلار باتىس جاعىنان قازبا ءتۇسىرىپ، بىرتىندەپ ورتالىق بولىگىنە قاراي وتكەن. دالالىق زەرتتەۋلەر توناۋشىلار اشىپ كەتكەن ۇڭعىما- شۇڭقىر ورنىنداعى قورعاننىڭ ورتالىق بولىگىندە جۇرگىزىلدى. باستاپقىدا قازبا 5x5 م كولەمدە بولدى جانە ەسكەرتكىش كونسترۋكسياسىنا وراي كەڭەيتىلدى. قازبا بارىسىندا تاس ساۋىت جانە وزگە دە كونسترۋكسيالار، سونداي-اق توناۋشىلاردان قالعان شاشىلىپ جاتقان ءىرى تاستار، تاستاقتايشالار تابىلعان.
- قورعاننىڭ توبەسىنەن ەسەپتەگەندە شامامەن 5 م تەرەڭدىكتەن ەكى مولا شۇڭقىرى انىقتالدى. ءبىرىنشى قابىر شۇڭقىرى تولىقتاي تونالىپ كەتكەن. بۇل جەردەن قويدىڭ جاۋىرىنىن عانا تابۋ مۇمكىن بولدى. ءسىرا، عۇرىپتىق اس قالدىعى بولسا كەرەك. ەكىنشى قابىر شۇڭقىرىنان ەر ادامنىڭ سۇيەك قالدىقتارى، ەكى كەراميكالىق ىدىس، مال سۇيەكتەرى، قىزعىلت ءتۇستى اعاش قىنابى بار اكيناك- سەمسەر تابىلدى. اكيناك تۇسىندا مەتالل جانە سۇيەك قاپسىرمالار جاتتى. سونىمەن قاتار قولادان جاسالعان قورامساق ىلگەگى، قولا وقشانتاي مەن ينە، التىنان دايىندالعان ىلمەكشەلەر تابىلدى. تابىلعان التىن بۇيىمدار قاتارىندا بەلدىك ىلمەشەگى، تۇتىكشە، سونداي-اق مىسىق تۇقىمداسىنا جاتاتىن اڭ بەينەلى ايىلباستار بار، - دەيدى ارحەولوگيالىق ەكسپەديتسيا جەتەكشىسى، تاريح عىلىمدارىنىڭ دوكتورى، پروفەسسور دوسبول بايقوناقوۆ.
جالپى، قازىلعان قورعاندى بۇدان ەكى مىڭ جىلداي بۇرىن جەتىسۋدى مەكەندەگەن يۋەچجي نەمەسە ۋسۋن (ءۇيسىن) مادەنيەتتەرىمەن بايلانىستىرۋعا بولادى. ەندى ارحەولوگتار زەرتحانالىق جۇمىستاردى ارى قاراي جۇرگىزۋدى جوسپارلاپ وتىر. بارلىق دەتالدار زەرتتەلىنىپ، ماتەريالدار تالداناتىن بولادى. كەيبىر ولجالار «وستروۆ كرىم» عىلىمي-رەستاۆراتسيالىق لابوراتورياسىندا قالپىنا كەلتىرىلەدى دەپ كۇتىلۋدە.
اۆتور
قالماحانبەت مۇقامەتقالي