«تالدىقورعان-ءۇشارال» گاز قۇبىرىنىڭ جەلىلىك بولىگىن سالۋ اياقتالدى
استانا. قازاقپارات - جەتىسۋ وبلىسىندا «تالدىقورعان-ءۇشارال» ماگيسترالدى گاز قۇبىرىنىڭ جەلىلىك بولىگىن سالۋ جۇمىستارى اياقتالدى. قازىر جەلى بويىندا كوگىلدىر وتىندى ەلدىمەكەندەرگە تاراتاتىن ستانسيالار سالىنىپ جاتىر.
124 مىڭ تۇرعىندى تابيعي گازبەن قامتيتىن اۋقىمدى جوبا، بىلتىر پرەمەر- مينيستر ولجاس بەكتەنوۆتىڭ قاتىسۋىمەن باستالدى. قىسى-جازى توقتاۋسىز جۇرگىزىلگەن جۇمىس بارىسىن «QazaqGaz» ۇلتتىق كومپانياسىنىڭ باسقارما ءتوراعاسى سانجار جاركەشوۆ تەكسەردى. ول پرەزيدەنت تاپسىرماسىمەن قولعا الىنعان جوبا مەرزىمىنەن بۇرىن اياقتالاتىنىن جەتكىزدى.
«تالدىقورعان- ءۇشارال» ماگيسترالدى قۇبىرىنىڭ بويىندا 6 اۆتوماتتى گاز تاراتۋ ستانسياسى سالىنىپ جاتىر. سونىڭ ءبىرى اقسۋ اۋدانى ءىلياس جانسۇگىروۆ اۋىلىنىڭ ماڭىندا تۇرعىزىلدى.
رۋسلان سۇيىندىكوۆ، «ينتەرگاز ورتالىق ازيا» ا ق فيليالىنىڭ ديرەكتورى:
- اۆگۋست، سەنتيابر ايىندا تولىق جۇمىستاردى ءبىتىرىپ، يسپىتانياعا كىرىسىپ، كۇزگى قىسقى مەرزىمگە دەيىن گاز بەرۋگە تىرىسامىز. بۇنىڭ قۋاتتىلىعى 11 مىڭ تەكشە مەتر ساعاتىنا ەسەپتەلگەن. جوبا بويىنشا قاجەتتىلىگىن تولىق جابادى.
سانجار جاركەشوۆ، «QazaqGaz» ۇ ك» ا ق باسقارما ءتوراعاسى:
- كەلىسىم-شارت بويىنشا بۇل جوبانىڭ اياقتالۋ كەزەڭى 2026 -جىلدىڭ سوڭى ەدى. الايدا جوبانىڭ الەۋمەتتىك ەكونوميكالىق ماڭىزدىلىعىن ەسكەرە وتىرىپ «قازاق گاز» ۇلتتىق كومپانياسى جۇمىستى ەكى ەسەگە قارقىنداتتى. جالپى جوبا كەزەكتەن تىس وسى كەستەدەن ءبىر جارىم جىلعا ەرتە تاپسىرىلاتىن بولادى.
قازىر ايماق تۇرعىندارىنىڭ 58 پايىزى تابيعي گاز تۇتىنادى. جىل سوڭىنا دەيىن اتالعان كورسەتكىش 71 پروتسەنتكە جەتكىزىلمەك.
اسەت قاناعاتوۆ، وبلىس اكىمىنىڭ ورىنباسارى:
- تالدىقورعاننان باستاپ، ءۇشارالعا دەيىنگى ماگيسترالدى گاز قۇبىرى بىتكەن كەزدە 84 ەلدى مەكەن 124 مىڭ حالىق كوگىلدىر وتىنعا قول جەتكىزەتىن بولادى. جەتىسۋ وبلىسىندا 84 ەلدى مەكەن گازداندىرىلعان. 2028 -جىلعا دەيىن كوگىلدىر وتىنعا قوسىلعان اۋىلدار سانىن 192 گە جەتكىزىپ، حالىقتىڭ تۇرمىس-تىرشلىگىن جاقسارتۋ جوسپارلانىپ وتىر.
شىڭعىس قاليدەن، ولجاس بايبوسىنوۆ
24.kz