تالعارداعى وقيعا: شەرزات پولاتتىڭ ولىمىنە قاتىستى قىلمىستىق ءىس بەس باپ بويىنشا تىركەلدى

استانا. KAZINFORM - الماتى وبلىسى تالعار قالاسىنداعى شەرزات پولاتتىڭ ولىمىنە قاتىستى قىلمىستىق ءىس اياسىندا قاساقانا كىسى ولتىرۋگە قاتىستى كۇدىكپەن 8 ادام جانە قىلمىس تۋرالى حابارلاماۋ بويىنشا 3 ادام سوتتىڭ سانكسياسىمەن قاماۋعا الىنعان. بۇل تۋرالى ىشكى ىستەر ءمينيسترى ەرجان سادەنوۆتىڭ ءماجىلىس دەپۋتاتتارىنا بەرگەن رەسمي جاۋابىندا ايتىلعان.

ءمينيستردىڭ جاۋابىندا كەلتىرىلگەن دەرەككە سەنسەك، شەرزات پولاتتىڭ ولىمىنە قاتىستى الماتى وبلىسى پوليتسيا دەپارتامەنتى قىلمىستىق كودەكستىڭ 99-بابىنىڭ 2-بولىگى (ادام ءولتىرۋ)، 293-بابىنىڭ 3-بولىگى (بۇزاقىلىق)، 115-بابى (قورقىتۋ)، 432-بابى (قىلمىستى جاسىرىپ قالۋ) جانە 434-بابىمەن (قىلمىس تۋرالى حابارلاماۋ) قىلمىستىق ىستەردى تىركەپ، تەرگەۋگە العان.

«تەرگەۋ بارىسى مەنىڭ جەكە باقىلاۋىمدا، وقيعا ورنىندا مينيسترلىكتىڭ ورتالىق اپپاراتىنىڭ قىزمەتكەرلەرى دە جۇمىس ىستەپ جاتىر. العاشقىدا وقيعانىڭ سەبەبىنە قاتىستى الەۋمەتتىك جەلىلەردە شىندىققا جاناسپايتىن ءار ءتۇرلى مالىمەتتىڭ كوپ تارالۋىنا بايلانىستى مينيسترلىك (قىلمىستىق- پروتسەستىك كودەكستىڭ 201-بابىنىڭ تالاپتارىنا ساي) 15-قازاندا بۇقارالىق اقپارات قۇرالدارى وكىلدەرىنىڭ قاتىسۋىمەن بريفينگ وتكىزىپ، كەي تەرگەۋ مالىمەتتەرىن جاريا ەتتى. بريفينگ قوعامدى الاڭداتقان كەيبىر ماسەلەلەردى قامتىدى»، - دەپ جازىلعان ەرجان سادەنوۆتىڭ جاۋابىندا.

ۆەدومستۆو باسشىسىنىڭ سوزىنشە، ءقازىر تەرگەۋ جالعاسىپ جاتىر، ونىڭ بارىسىندا وقيعا بولعان جەردە بولعان باسقا دا ادامداردىڭ قاتىسى بار-جوعى تەكسەرىلىپ، ارەكەتىنە قۇقىقتىق باعا بەرىلەدى.

ەسكە سالايىق، 4-قازاندا تالعار قالاسىنداعى توبەلەستەن ءبىر ادام قايتىس بولعانىن جازعانبىز.

اشۋلى تالعارلىقتار جاس ءوسپىرىم ولىمىنە بايلانىستى نارازىلىققا شىقتى.

الماتى وبلىسىنىڭ پروكۋراتۋراسى كىسى ءولتىرۋ تۋرالى بۇل ءىس ەرەكشە باقىلاۋعا الىنعانىن رەسمي تۇردە حابارلادى.

ىشكى ىستەر ءمينيسترى ەرجان سادەنوۆ الماتى وبلىسى تالعار اۋدانىنداعى جاسوسپىرىمنىڭ ولىمىنە قاتىستى ءىستى جەكە باقىلاۋىنا الدى.

سونداي- اق، قۇقىق قورعاۋشى ايتبەك امانگەلدى قازا تاپقان ءجاسوسپىرىمنىڭ وتباسىنا ادۆوكاتتار تاۋىپ بەردى.

الماتى وبلىستىق پوليتسيا دەپارتامەنتى باستىعىنىڭ مىندەتىن اتقارۋشى سەرىك شالقاروۆ بەينەباقىلاۋ كامەرالارىنان الىنعان جازبالار زەرتتەلىپ جاتقانىن جەتكىزدى.

12 قازان تۇندە قارا جامىلعان وتباسىنىڭ ءۇيى ورتەنىپ كەتتى. الماتى وبلىسىنىڭ پوليتسيا دەپارتامەنتى بوتەننىڭ مۇلكىن قاساقانا جويۋ فاكتىسى بويىنشا ءىس قوزعادى.

سونداي- اق باس پروكۋراتۋرا قىلمىستى اشۋ ءۇشىن ۆەدومستۆوارالىق جەدەل- تەرگەۋ توبى قۇرىلعانىن مالىمدەدى.

كەيىن ىشكى ىستەر ءمينيسترىنىڭ ءبىرىنشى ورىنباسارى باۋىرجان الەنوۆ ءورت قىلمىسى بويىنشا ايعاقتار الىنىپ، ءتيىستى ساراپتامالار جۇرگىزىلىپ جاتقانىن حابارلادى.

قوعامدىق ءتارتىپتى قاداعالاۋ ءۇشىن ۇلتتىق ۇلان اسكەرى جۇمىلدىرىلدى.

15-قازان كۇنى تالعار قالاسىنىڭ اكىمى باحىت قۋاتبەك ۇلى كۇرىشبەكوۆ، تالعار قالاسى اكىمىنىڭ ورىنباسارى ماتان ساعىندىق ءوز مىندەتتەرىن ءتيىستى دەڭگەيدە اتقارماعانى ءۇشىن لاۋازىمدارىنان بوساتىلدى.

ارتىنشا، تالعار اۋدانى اكىمى اپپاراتىنىڭ باسشىسى اسلان قاسىمبايەۆ قىزمەتىنەن قۋىلدى. ال، تالعار اۋدانىنىڭ اكىمى تانات ەسەنكەلدى ۇلى ايداربەكوۆ جانە ونىڭ ورىنباسارى ايبەك دۇيسەمبەك ۇلى بيدايەۆ سوگىس الدى.

ىشكى ىستەر مينيسترلىگىنىڭ وكىلدەرى باق قىزمەتكەرلەرىنە شەرزات بولات قازا تاپقان جەردە كامەراعا ءتۇسىپ قالعان ۆيدەونى كورسەتتى.

پروكۋراتۋرا سوتتىڭ اشىق ءوتۋىن سۇرايتىندارىن جەتكىزدى.

ارتىنشا مارقۇم شەرزات پولاتتىڭ ءىسى بويىنشا الماتى وبلىسىنىڭ بىرنەشە جوعارى لاۋازىمدى پوليتسيا قىزمەتكەرى قىزمەتىنەن بوساتىلدى.

پارلامەنت ءماجىلىسى زاڭناما جانە سوت-قۇقىقتىق رەفورما كوميتەتىنىڭ مۇشەسى قايرات بالابيەۆتەن تالعار وقيعاسىنا قاتىستى ءىستىڭ ۋشىعۋىنا باۋىرجان الەنوۆ تە جاۋاپتى ەكەنىن ايتقان بولاتىن.