تالعارداعى قاندى وقيعا: پوليتسەيلەر توبەلەستىڭ باستالۋى تاسپالانعان بەينەجازبانى كورسەتتى

قونايەۆ. KAZINFORM - ىشكى ىستەر مينيسترلىگىنىڭ وكىلدەرى تالعارداعى 16 جاستاعى شەرزات بولات قازا تاپقان جەردە كامەراعا ءتۇسىپ قالعان ۆيدەونى كورسەتتى.

كادرلاردا شەرزاتتى ءولتىردى دەگەن كۇدىكتىنىڭ ەكى بوتەلكە سىرا مەن ءتورت قوراپ تەمەكىنى قالاي ساتىپ العانى كورسەتىلگەن. تەلەفون ارقىلى اقشاسىن تولەيدى. كۇدىكتى كەيىن دۇكەنگە قايتا كەلىپ، تەلەفونىن قۋاتتاپ بەرۋىن سۇراعان. بىرنەشە مينۋتتان كەيىن ول تەلەفونىن الۋعا قايتا ورالعان.

جانجال دالادا باستالادى.

ەسكە سالايىق، 4-قازاندا تالعار قالاسىنداعى توبەلەستەن ءبىر ادام قايتىس بولعانىن جازعانبىز.

اشۋلى تالعارلىقتار جاس ءوسپىرىم ولىمىنە بايلانىستى نارازىلىققا شىقتى.

الماتى وبلىسىنىڭ پروكۋراتۋراسى كىسى ءولتىرۋ تۋرالى بۇل ءىس ەرەكشە باقىلاۋعا الىنعانىن رەسمي تۇردە حابارلادى.

ىشكى ىستەر ءمينيسترى ەرجان سادەنوۆ الماتى وبلىسى تالعار اۋدانىنداعى ءجاسوسپىرىمنىڭ ولىمىنە قاتىستى ءىستى جەكە باقىلاۋىنا الدى.

سونداي- اق، قۇقىق قورعاۋشى ايتبەك امانگەلدى قازا تاپقان ءجاسوسپىرىمنىڭ وتباسىنا ادۆوكاتتار تاۋىپ بەردى.

الماتى وبلىستىق پوليتسيا دەپارتامەنتى باستىعىنىڭ مىندەتىن اتقارۋشى سەرىك شالقاروۆ بەينەباقىلاۋ كامەرالارىنان الىنعان جازبالار زەرتتەلىپ جاتقانىن جەتكىزدى.

12-قازان كۇنى تۇندە قارا جامىلعان وتباسىنىڭ ءۇيى ورتەنىپ كەتتى. الماتى وبلىسىنىڭ پوليتسيا دەپارتامەنتى بوتەننىڭ مۇلكىن قاساقانا جويۋ فاكتىسى بويىنشا ءىس قوزعادى.

سونداي- اق، باس پروكۋراتۋرا قىلمىستى اشۋ ءۇشىن ۆەدومستۆوارالىق جەدەل- تەرگەۋ توبى قۇرىلعانىن مالىمدەدى.

ىشكى ىستەر ءمينيسترىنىڭ ءبىرىنشى ورىنباسارى باۋىرجان الەنوۆ مارقۇم شەرزات بولاتتىڭ ءۇيىن ورتەۋ وقيعاسىن تەرگەۋ توبىمەن تالعارعا باردى.

كەيىن ىشكى ىستەر ءمينيسترىنىڭ ءبىرىنشى ورىنباسارى باۋىرجان الەنوۆ ءورت قىلمىسى بويىنشا ايعاقتار الىنىپ، ءتيىستى ساراپتامالار جۇرگىزىلىپ جاتقانىن حابارلادى.

قوعامدىق ءتارتىپتى قاداعالاۋ ءۇشىن ۇلتتىق ۇلان اسكەرى جۇمىلدىرىلدى.

اۆتور
الما مۇقانوۆا