تالعارداعى كىسى ءولىمى: پروكۋراتۋرا سوتتىڭ اشىق ءوتۋىن سۇرايتىن بولادى

قونايەۆ. KAZINFORM - الماتى وبلىسىنىڭ پروكۋرورى بەرىك اداموۆ شەرزات بولاتقا قاتىستى سوت پروتسەسىن ونلاين وتكىزۋ تۋرالى ءوتىنىش بەرەدى.

«جابىرلەنۋشىلەر تاراپىنان سوتتىڭ اشىق ءوتۋى تۋرالى كوپ ايتىلىپ جاتىر. تەرگەۋ ساتىسىندا زاڭبۇزۋشىلىقتارعا جول بەرىلمەدى. پروكۋراتۋرا اشىق سوت پروتسەسىن ونلاين رەجيمدە وتكىزۋ تۋرالى ءوتىنىش جاسايدى»، - دەدى پروكۋرور باسپا ءسوز ءماسليحاتىندا.

بۇعان دەيىن ىشكى ىستەر مينيسترلىگىنىڭ وكىلدەرى تالعارداعى 16 جاستاعى شەرزات بولات قازا تاپقان جەردە كامەراعا ءتۇسىپ قالعان ۆيدەونى كورسەتتى.

ال الماتى وبلىسىنىڭ پروكۋرورى بەرىك اداموۆ قىلمىستىق ءىس بويىنشا جۇرگىزىلىپ جاتقان تەرگەۋ ساتىسىندا ەشقانداي زاڭبۇزۋشىلىق انىقتالماعانىن ايتتى.

سونداي-اق، ورتەنگەن شەرزاتتىڭ اتا- اناسى تۇرعان ءۇيدىڭ سىرتىنان رەزەڭكە قولعاپ پەن كانيستر تابىلعانى تۋرالى ايتىلدى.

ىشكى ىستەر ءمينيسترىنىڭ ءبىرىنشى ورىنباسارى باۋىرجان الەنوۆ شەرزات بولاتتىڭ ولىمىنە جانە بۇزاقىلىققا قاتىستى 10 كۇدىكتى ۇستالعانىن مالىمدەدى.

ەسكە سالايىق، 4-قازاندا تالعار قالاسىنداعى توبەلەستەن ءبىر ادام قايتىس بولعانىن جازعانبىز.