تالعارداعى جاس ءوسپىرىمنىڭ ءولىمى: پوليتسيا بەينەباقىلاۋ كامەراسىنا قاتىستى مالىمدەمە جاسادى

قونايەۆ. KAZINFORM - الماتى وبلىسىنىڭ پوليتسيا دەپارتامەنتى كامەراعا ءتۇسىپ قالعان تالعارداعى جانجالدىڭ بەينەجازبالارى جويىلدى دەگەن اقپاراتتى جوققا شىعاردى.

«الەۋمەتتىك جەلىلەر مەن بۇقارالىق اقپارات قۇرالدارىندا تالعار اۋدانىنداعى قايعىلى وقيعا بولعان جەردەن بەينەباقىلاۋ كامەرالارىنىڭ جازبالارى ءوشىرىلدى دەگەن جالعان اقپارات تاراۋدا. سوتقا دەيىنگى تەرگەپ-تەكسەرۋ شەڭبەرىندە بارلىق قولدا بار بەينەجازبالار پوليتسيا تاراپىنان تاركىلەنىپ، قىلمىستىق ءىس ماتەريالدارىنا زاتتاي دالەل رەتىندە تىركەلگەنىن حابارلايمىز»، - دەپ اتاپ ءوتتى ۆەدومستۆودان.

قازىرگى ۋاقىتتا تەرگەۋ بارىسىندا بارلىق بەينەجازبا زەرتتەلىپ، وقيعاعا قاتىسۋشىلاردىڭ ارەكەتتەرىنە قۇقىقتىق باعا بەرىلەتىن بولادى.

«تەك رەسمي اقپاراتقا سەنۋگە شاقىرامىز جانە جالعان اقپاراتتى تاراتۋ قىلمىستىق جاۋاپكەرشىلىككە دەيىن اكەلۋى مۇمكىن ەكەنىن ەسكە سالامىز. بەينەنىڭ بار ەكەنى تۋرالى اقپاراتتى راستاۋ رەتىندە پوستقا سكرينشوت قوسا بەرىلەدى»، - دەلىنگەن حابارلامادا.

ەسكە سالايىق، 4-قازاندا تالعار قالاسىنداعى توبەلەستەن ءبىر ادام قايتىس بولعانىن جازعانبىز. كەيىن تالعارلىقتار جاس ءوسپىرىم ولىمىنە بايلانىستى نارازىلىققا شىقتى.

الماتى وبلىسىنىڭ پروكۋراتۋراسى كىسى ءولتىرۋ تۋرالى بۇل ءىس ەرەكشە باقىلاۋعا الىنعانىن رەسمي تۇردە حابارلادى.

ىشكى ىستەر ءمينيسترى ەرجان سادەنوۆ الماتى وبلىسى تالعار اۋدانىنداعى جاس ءوسپىرىمنىڭ ولىمىنە قاتىستى ءىستى جەكە باقىلاۋىنا الدى. سونداي-اق قۇقىق قورعاۋشى ايتبەك امانگەلدى قازا تاپقان جاس ءوسپىرىمنىڭ وتباسىنا ادۆوكاتتار تاۋىپ بەردى.

اۆتور
الما مۇقانوۆا