تالعاردا اتىس بولعانى راس پا؟ پوليتسيا ءمان-جايدى ايتتى

استانا. KAZINFORM - پوليتسيا الەۋمەتتىك جەلىدە تاراعان، تالعار ماڭىندا اتىس بولعانى تۋرالى اقپاراتتى جوققا شىعاردى.

جەلىدە قانداي اقپارات تارادى؟

جەلى قولدانۋشىلارى وقيعا تالعار تراكتىنىڭ ماڭىندا ورنالاسقان تۇزدىباستاۋ اۋىلىندا بولعانىن جازعان ەدى. دەگەنمەن اتىس قالاي شىققانى جانە وقيعاعا قاتىستى ادامدار تۋرالى ناقتى اقپارات ايتىلمادى.

پوليتسيا پىكىرى

الماتى وبلىسى پوليتسيا دەپارتامەنتىنىڭ باسپا ءسوز قىزمەتىنىڭ وكىلى ءمان-جايدى ءتۇسىندىردى.

«الەۋمەتتىك جەلىلەردە تاراعان، تالعار اۋدانى تۇزدىباستاۋ اۋىلىنداعى كافەلەردىڭ ءبىرىنىڭ جانىندا اتىس بولعانى تۋرالى اقپارات شىندىققا جاناسپايدى. مەكەمە قوناقتارى سوزگە كەلىپ قالىپ، ارتى جانجالعا ۇلاسقانى بەلگىلى بولدى. سەنىپ تاپسىرىلعان ايماقتى پاترۋلدەپ جۇرگەن پوليتسەيلەر وقيعاعا جەدەل ارالاسىپ، جاعدايدى رەتتەدى»، - دەپ جازىلعان پوليتسيا جاۋابىندا.

بۇزاقىلىق دەرەگى بويىنشا قىلمىستىق ءىس قوزعالدى. وقيعاعا قاتىسى بارلار پوليتسياعا جەتكىزىلدى.

«زارداپ شەككەندەر جوق. قازىر وقيعانىڭ ءمان-جايى انىقتالىپ جاتىر»، - دەپ جازىلعان حابارلامادا.

ەسكە سالايىق، بۇعان دەيىن تالعار ماڭىندا اتىس بولعانى حابارلاندى.