تالعامسىزدىقتىڭ توعىز بەلگىسى

استانا. قازاقپارات - بۇگىن ايالدامادا ءبىر قىز ەرىكسىز نازارىمدى اۋداردى. جاسى جيىرمالارداما ەكەن، الدە ودان دا جاستاۋ ما... ايتەۋىر بەتىنە قاباتتاپ جاققان بوياۋىنىڭ ار جاعىنان جاس ادام ەكەنىن اڭعارۋعا بولادى. تابيعات بەرگەن سۇيكىمىن قالىڭ بوياۋمەن جاسىرىپ تاستاعانداي كورىندى ماعان.

ۇستىندە مىسىقتىڭ سۋرەتى ءبىر يىعى جوق جەيدەسى مەن كىشىگىرىم تەلەديدار سىيىپ كەتەتىن قورجىنى بار، بۇتىندا لوسينى.

تاپ وسى قىز قاراپايىم بولسا دا يىعى جابىق كويلەك، قولىندا كىشىلەۋ سومكە ۇستاپ تۇرسا، قانداي نازىك وبراز بولار ەدى دەپ ويلاپ كەتتىم. كوكتەمدە قىز-كەلىنشەكتەردىڭ ءبارى مىندەتتى تۇردە جاڭا كيىم الادى، شاشىن قيدىرادى نە بويايدى، ايتەۋىر وزگەرەدى، جازدى جارقىراپ قارسى الۋعا دايىندالادى.

قۇلپىرۋدا اسىرا سىلتەپ جىبەرگەندەر ءۇشىن، الەمنىڭ ۇزدىك ديزاينەرلەرى ۇنەمى ايتىپ جۇرەتىن مىنا كەڭەستەردى ەسكە سالۋدى ءجون كوردىم.

1. بىرنەشە تۇسكە بويالعان شاش. مۇنداي باستار ادەتتە ادەمى توتىقۇستىڭ قاۋىرسىندارىن ەسكە سالادى. شاشتى مەيلىنشە تابيعي تۇستەرمەن جانە بىرتەكتى ەتىپ بوياعان ءجون.

2. تاستارمەن كومكەرىلگەن ۇزىن تىرناق. وتە ورەسكەل كورىنەدى. ءار ءتۇرلى جازۋلار جازىپ، «كوبەلەك» قوندىرىپ، نە تەسىپ سىرعا تاعىپ قوياتىندار دا بار. تالعامپاز جان تىرناقتارىن ونەر تۋىندىسىنا اينالدىرمايدى.

3. تور نەمەسە ار جاق-بەر جاعى كورىنەتىن ماتادان تىگىلگەن كيىم. ونداي كويلەكتەر مەن جەيدەلەر ءىش كيىمىڭدەرىڭدى الەمگە پاش ەتەدى. جالاڭاش دەنەنىڭ ءبىلىنىپ تۇرۋى دا تالعامسىزدىق بەلگىسى.

4. تىم قىسقا، اشىق-شاشىق كيىمدەر. تەرەڭ دەكولتە، ارقاسى جوق جەيدەلەر، بالتىردى جاپپايتىن كويلەكتەر، اۋى جارتى قارىس شالبارلار.

5. جالبا-جۇلبا دجينسى. مىڭ جەردەن «مودا» بولسا دا، سۋرەتتەرى، تاستارى بار جىرتىق-جىرتىق دجينسى تالعامپازدىڭ تاڭداۋى ەمەس.

6. ارزان كورىنەتىن اياق كيىم. اسىرەسە «مەن ارزانمىن!» دەپ ايقايلاپ تۇراتىندار جانە لاكتالعان، الپىنساق-سالپىنشاقتارمەن بەزەندىرىلگەن، تابانى مەن وكشەسى ادام شوشىرلىقتاي بيىك ءارى دوبالداي اياق كيىمگە جولاماڭىز.

7. تىم ايشىقتى بوياۋ. كوكپەڭبەك كوز، قىپ-قىزىل ەرىن (ايتپاسا دا تۇسىنىكتى عوي).

8. شوشايىپ، تابيعاتىڭا تۇك ۇيلەسە الماي تۇارتىن جاساندى شاش پەن كىرپىك. اناداي شومەلەنى كوتەرىپ جۇرگەن باسقا جۇرتتىڭ جانى اشيدى.

9. توركوزدى شۇلىقتار. جانە ءارقانداي سۋرەتتى، الا-قۇلا شۇلىقتار اياقتى قيسىق ەتىپ كورسەتەدى، بيىك قونىشتى ەتىكپەن كيسەڭىز جەڭىل ءجۇرىستى بيكەشتەرگە ۇقساتادى.

blogtime.kz