تاكسي جۇرگىزۋشىسى، كۋرەر، ريەلتور: جەكە كاسىپكەر رەتىندە تىركەلۋ ءتيىمدى مە

استانا. KAZINFORM - مەملەكەتتىك كىرىستەر كوميتەتى ينتەرنەت پلاتفورمالار ارقىلى قىزمەت ۇسىناتىن جانداردىڭ سالىق تولەۋ ەرەجەلەرىن ءتۇسىندىردى.

تولىعىراق اتالعان كوميتەتتىڭ ارناۋلى سالىق رەجيمدەرىن اكىمشىلەندىرۋ باسقارماسىنىڭ باسشىسى ەرقانات شىمبەرگەن ايتىپ بەردى.

«ەلىمىزدە ءبىرقاتار ازامات قىزمەتىن ينتەرنەت پلاتفورمالاردىڭ كومەگىمەن جۇزەگە اسىرادى. ول دەگەنىمىز تاكسي جۇرگىزۋشىلەرى، كۋرەر، پاتەردى جالعا بەرۋمەن اينالىسۋ تاعى سول سياقتى قىزمەت تۇرلەرى. اتالعان قىزمەتتەردى ۇسىنۋشىلاردىڭ سالىق تولەۋ جانە ولاردى الەۋمەتتىك تۇرعىدان قامتۋ، قورعاۋ تۇرعىسىنان ماسەلەلەر تۋىنداپ وتىر. وسى ورايدا وتكەن جىلى الەۋمەتتىك كودەكستە اتالعان ماسەلەلەر بويىنشا انىقتاما بەرىلىپ، ناقتىلاندى. ءبىزدىڭ كوميتەت بۇل جوبانى تاكسي پلاتفورماسىمەن كەلىسىم جاساپ، پيلوتتىق جوبا تۇرىندە ىسكە قوستى. بۇگىندە 23 مىڭ جەكە كاسىپكەردەن (تاكسي جۇرگىزۋشىلەرى) 700 ميلليون تەڭگەگە جۋىق تەڭگە سالىق ءتۇستى. پيلوتتىق جوبا اياسىندا جەكە كاسىپكەر رەتىندە تىركەۋدە جانە سالىق مولشەرلەمەسى (%1) بويىنشا جەڭىلدىك قاراستىرىلعان. ودان بولەك تاكسي جۇرگىزۋشىلەرى تاكسوپارككە تولەيتىن قوسىمشا كوميسسيادان بوساتىلۋى مۇمكىن»، - دەدى ەرقانات شىمبەرگەن كوميتەتتە وتكەن باسپا ءسوز ءماسليحاتىندا.

ونىڭ سوزىنشە، جاڭا جوبا ارقىلى سالىق تولەۋ پروتسەسىن تولىقتاي اۆتوماتتاندىرۋ كوزدەلىپ وتىر.

«پيلوتتىق جوبانى جۇزەگە اسىرۋ ناتيجەلەرى بويىنشا سالىق كودەكسىنە وزگەرىستەر ەنگىزىلىپ، بيىل 1-قىركۇيەكتەن باستاپ زاڭدى كۇشىنە ەندى. الدىمەن سالىق مولشەرلەمەسىن %1 ەتۋ، ياعني تابىسىنىڭ الەۋمەتتىك تولەمدەرگە %1 سالىق، م ءا م س- كە %1، زەينەتاقى جيناعىنا %1 جانە %1 الەۋمەتتىك جارنا سالىعىن تولەيدى. ينتەرنەت پلاتفورمالار يەلەرىنە تالاپ قويىلادى، ياعني تاكسي جۇرگىزۋشىلەرى نەمەسە كۋرەرلەر ءۇشىن سالىق اگەنتى مىندەتىن اتقارادى. ينتەرنەت پلاتفورمالار ارقىلى قىزمەت ۇسىناتىندار جەكە كاسىپكەر رەتىندە تىركەلسە، تابىسىنىڭ %1 سالىق تولەيدى، ال تىركەلمەگەن جاعدايدا  تولەۋگە ءماجبۇر»، - دەيدى سپيكەر.

بۇعان دەيىن قازاقستاندا قوسىلعان قۇن سالىعىن سيفرلىق تەڭگەمەن تولەۋگە بولاتىنىن حابارلاعانبىز.