تاكسي جۇرگىزۋشىلەرىنە الاياقتىق جاساپ جۇرگەن استانالىق ايەل ۇستالدى
استانا. قازاقپارات - استانادا پوليتسياعا ەكى تاكسي جۇرگىزۋشىسى ارىزدانىپ، وزدەرىن ءبىر ايەلدىڭ الداپ سوققانىن ايتقان.
ءىىم باسپا ءسوز قىزمەتىنىڭ حابارلاۋىنشا، تاكسي جۇرگىزۋشىلەرىنەن قاسكۇنەم قوڭىراۋ شالۋ ءۇشىن تەلەفوندارىن سۇراپ الىپ، سودان كەيىن تانىمال تاكسي قوسىمشاسىنداعى بونۋستارىن ءوزىنىڭ بانكتىك شوتىنا اۋدارىپ العان.
جەدەل- ىزدەستىرۋ ءىس-شارالارىن وتكىزۋ بارىسىندا پوليتسەيلەر بۇرىن وسىعان ۇقساس قىلمىستار ءۇشىن سوتتالعان 28 جاستاعى ايەلدى انىقتادى. سونىمەن قاتار ايەلدىڭ باسقا تاكسي جۇرگىزۋشىسىنەن بارسەتكانى ۇرلاعانى انىقتالدى. ونىڭ ىشىندە جابىرلەنۋشىنىڭ قۇجاتتارى، سىمسىز قۇلاققاپ، اقشا جانە ساعات بولعان. ۇرلىق پەن الاياقتىق فاكتىسى بويىنشا قىلمىستىق ءىس قوزعالدى. ۇستالعان ايەل استانا قالاسىنىڭ پ د ۋاقىتشا ۇستاۋ يزولياتورىنا قامالدى، - دەلىنگەن حابارلامادا.
جالپى كەلتىرىلگەن شىعىن كولەمى - 300 مىڭ تەڭگە.
استانا قالاسىنىڭ پوليتسيا دەپارتامەنتى ازاماتتارعا قىراعى بولۋدى، باعالى زاتتاردى قاراۋسىز قالدىرماۋدى جانە بەيتانىس ادامدارعا سەنبەۋدى ەسكەرتەدى.