تاجىكستانمەن دوستىققا قۇرىلعان قاتىناستاردى جوعارى باعالايمىز - پرەزيدەنت
استانا. KAZINFORM - قاسىم-جومارت توقايەۆ استاناعا رەسمي ساپارمەن كەلگەن تاجىكستاننىڭ سىرتقى ىستەر ءمينيسترى سيرودجيددين مۋحريدديندى قابىلدادى.
كەزدەسۋدە پرەزيدەنت قازاقستان مەن تاجىكستان اراسىنداعى قارىم-قاتىناس بارلىق باعىت بويىنشا وڭ قارقىنمەن دامىپ كەلە جاتقانىن اتاپ ءوتىپ، ستراتەگيالىق سەرىكتەستىكتى ودان ءارى نىعايتۋدىڭ ءمانى زور ەكەنىن ايتتى.
مەملەكەت باسشىسى بىلتىر قول قويىلعان وداقتاستىق قاتىناستار تۋرالى شارت استانا مەن دۋشانبەنىڭ سان قىرلى جانە تابىستى ىنتىماقتاستىعىنىڭ ماڭىزدى كەزەڭى بولعانىن ەسكە سالدى.
- ءبىز تاجىكستانمەن دوستىققا قۇرىلعان قاتىناستاردى جوعارى باعالايمىز. ەكى ەلدىڭ اراسىندا شەشىمىن تاپپاعان ەشقانداي ماسەلە جوق. قازاقستان جۇرتشىلىعى باۋىرلاس تاجىك حالقىنا ەرەكشە ىقىلاس تانىتادى. ەلدەرىمىز ءاردايىم ءبىر-بىرىنە قولداۋ كورسەتىپ كەلەدى. بۇل ەكىجاقتى بايلانىستى بەلسەندى دامىتۋعا ۇمتىلىسىمىزدان دا بايقالادى، - دەدى پرەزيدەنت.
قاسىم-جومارت توقايەۆ تاجىكستان پرەزيدەنتى ەمومالي راحموننىڭ قازاق- تاجىك ىنتىماقتاستىعىن ارتتىرۋعا قوسقان تەڭدەسسىز ۇلەسىنە ايرىقشا نازار اۋداردى.
سيرودجيددين مۋحريددين تاۋەلسىزدىك جىلدارىندا قازاقستان مەن تاجىكستان ءوزارا ءتيىمدى ىقپالداستىق ورناتقانىن، ول باۋىرلاس حالىقتاردىڭ مۇددەسى ءۇشىن دوستىق پەن وداقتاستىق رۋحىندا ۇدايى دامىپ كەلە جاتقانىن جەتكىزدى.
- تاجىكستان قازاقستانمەن اراداعى باۋىرلاستىق ءارى تىعىز بايلانىستى ەرەكشە قۇرمەت تۇتادى. ءسىزدىڭ ەل ءبىزدىڭ ماڭىزدى سەرىكتەسىمىز. ەكىجاقتى ىنتىماقتاستىقتىڭ بارلىق باعىتى بويىنشا ءوزارا تۇسىنىستىك بار. ەكى ەل قاتىناستارى ءۇشىن بىلتىر ايتۋلى جىل بولدى، ىقپالداستىعىمىز وداقتاستىق دەڭگەيىنە كوتەرىلدى، - دەدى مينيستر.
تاجىك ديپلوماتى قاسىم- جومارت توقايەۆقا پرەزيدەنت ەمومالي راحموننىڭ سالەمىن جەتكىزىپ، تاجىك تاراپىنىڭ قازاقستانمەن جان- جاقتى ىنتىماقتاستىقتى ودان ءارى تەرەڭدەتۋگە بەيىل ەكەنىن راستادى.
اڭگىمەلەسۋ بارىسىندا بۇعان دەيىن جوعارى دەڭگەيدە قول جەتكىزىلگەن ۋاعدالاستىقتاردى جۇزەگە اسىرۋ ماسەلەلەرى قاراستىرىلدى. اسىرەسە، ەكونوميكا، ساۋدا، ترانزيت، سيفرلاندىرۋ، ءبىلىم جانە مادەنيەت سالالارىنداعى ىقپالداستىقتى نىعايتۋ پەرسپەكتيۆاسىنا ايرىقشا ءمان بەرىلدى.
قاسىم-جومارت توقايەۆ پەن سيرودجيددين مۋحريددين وڭىرلىك قاۋىپسىزدىك، سۋ-ەنەرگەتيكا سالاسىنداعى سەرىكتەستىك، سونىمەن قاتار ورتالىق ازيانىڭ ورنىقتى دامۋىن قامتاماسىز ەتۋدى كوزدەيتىن بىرلەسكەن شارالاردىڭ جاي-كۇيىن تالقىلادى.
بۇعان دەيىن قازاقستان مەن تاجىكستان اراسىندا بىلتىر ساۋدا-ساتتىق كولەمى قانشا پايىز ارتقانىن جازعان ەدىك.
اۆتور
نازىم بولەسوۆا