تاجىكستان باسشىسى باسپا ءسوز قىزمەتىنىڭ مالىمەتىنشە، ەمومالي راحمون ءوز سوزىندە قولايلى ەكونوميكالىق احۋال مەن ەكى ەلدىڭ ىسكەرلىك ورتالارى اراسىنداعى ساۋدا جانە ينۆەستيتسيالىق ىنتىماقتاستىقتىڭ نىعايۋىن اتاپ ءوتتى.
ول قىتايدى تاجىكستان ءۇشىن سەنىمدى جانە نەگىزگى سەرىكتەس دەپ اتاپ، رەسپۋبليكا ەكونوميكاسىنا قىتايلىق ينۆەستيتسيالار كولەمى شامامەن 6 ميلليارد دوللارعا جەتكەنىن، ونىڭ شامامەن 3,5 ميلليارد دوللارى - تىكەلەي ينۆەستيتسيا ەكەنىن اتاپ ءوتتى.
كەزدەسۋ بارىسىندا ول ەلدىڭ ينۆەستيتسيالىق مۇمكىندىكتەرىن تانىستىرىپ، قىتايلىق بيزنەستى تاجىكستانداعى جوبالارعا بەلسەندىرەك قاتىسۋعا شاقىردى. گيدروەنەرگەتيكالىق الەۋەت، مينەرالدى قورلار، كولىك دالىزدەرىن دامىتۋ، لوگيستيكالىق ورتالىقتار قۇرۋ جانە اۋىل شارۋاشىلىعى ونىمدەرىن وڭدەۋگە ەرەكشە نازار اۋدارىلدى.
— كەزدەسۋ مەن كەلىسسوزدەن كەيىن تاجىكستان مەن قىتاي كومپانيالارى اراسىندا 50-دەن استام ىنتىماقتاستىق قۇجاتىنا قول قويىلدى. ولار تاجىكستانعا 8 ميلليارد دوللاردان استام ينۆەستيتسيا تارتۋعا باعىتتالعان، - دەپ حابارلادى ت ر پرەزيدەنتىنىڭ باسپا ءسوز قىزمەتى.
وسىعان تاجىكستان قازاقستاننان 1,3 ميلليون تونناعا دەيىن استىق يمپورتتاۋدى كوزدەيتىنىن جازدىق.
سونداي-اق وتكەن ايدا «قازاقستان مەن تاجىكستان اراسىنداعى وداقتاستىق قاتىناستار تۋرالى شارتتى راتيفيكاتسيالاۋ تۋرالى» زاڭ ماقۇلدانعانى حابارلاندى.