باۋىرىمەن جورعالاۋشى قاتتى توڭىپ، اۋىر جاعدايدا بولعان. قازىر قولتىراۋىن حايۋاناتتار باعىندا كارانتينگە ورنالاستىرىلدى، دەپ حابارلايدى Kazinform اگەنتتىگى.
بالىقشىلاردىڭ حابارىنان كەيىن ۇلتتىق ەكولوگيا جانە كليماتتىڭ وزگەرۋى كوميتەتى مەن تاشكەنت حايۋاناتتار باعىنىڭ ماماندارى وقيعا ورنىنا جەتتى. ولار قولتىراۋىندى قاۋىپسىز جەرگە شىعارىپ، حايۋاناتتار باعىنا جەتكىزدى.
سۋىق سۋدا ۇزاق جاتقاندىقتان، ونىڭ جاعدايى اۋىر بولعان. ماماندار قولتىراۋىننىڭ شامامەن ءبىر جاستا ەكەنىن انىقتادى.
بۇعان قوسا تاشكەنت حايۋاناتتار باعىنىڭ ماماندارى جاقىن ماڭدا باسقا باۋىرىمەن جورعالاۋشىلاردىڭ بار-جوعىن انىقتاۋ ءۇشىن اۋماقتى تەكسەرىپ شىقتى.
قازىر قولتىراۋىننىڭ وزبەكستانداعى سۋ ايدىنىنا قالاي تاپ بولعانى انىقتالىپ جاتىر.
وزبەكستاننىڭ ۇلتتىق ەكولوگيا جانە كليماتتىڭ وزگەرۋى كوميتەتى ەل زاڭناماسى جەكە تۇلعالارعا جابايى جانۋارلاردى، سونىڭ ىشىندە قولتىراۋىننىڭ بارلىق ءتۇرىن جارتىلاي ەركىن ورتادا، جاساندى جاعدايدا نەمەسە تۇتقىندا ۇستاۋعا تىيىم سالاتىنىن ەسكەرتتى. سونداي-اق ولاردى سيرك قويىلىمدارىنا پايدالانۋعا دا بولمايدى.
ءنىل قولتىراۋىنى - قولتىراۋىندار تۇقىمداسىنداعى ەڭ ءىرى ءارى قاۋىپتى جىرتقىشتاردىڭ ءبىرى. تابيعي مەكەنىندە افريكا قۇرلىعىنداعى تۇشى سۋلى وزەندەردە، كولدەر مەن باتپاقتى جەرلەردە تىرشىلىك ەتەدى.
بۇعان دەيىن ا ق ش-تىڭ فلوريدا شتاتىنداعى ۋينتەر-گاردەن قالاسىندا قولتىراۋىن بالىقشىعا شابۋىل جاساپ، ونى سۋ استىنا تارتىپ اكەتكەنى حابارلانعان بولاتىن.