وزبەكستان رەسپۋبليكاسى باس پروكۋراتۋراسىنىڭ حابارلاۋىنشا، 1-قاراشادا تاشكەنتتەگى قوناقۇيلەردىڭ بىرىندە تاڭعى اس كەزىندە بالالار مەن ولاردى ەرتىپ بارعان تۋىستارى شالا پىسكەن جۇمىرتقا مەن شۇجىق جەگەن. ارادا كوپ ۋاقىت وتپەي، 13 ادامنىڭ دەنساۋلىعى ناشارلاپ، ولاردان قۇسۋ، ءىش ءوتۋ، ءىشتىڭ اۋىرۋى جانە دەنە قىزۋىنىڭ كوتەرىلۋى سياقتى بەلگىلەر بايقالعان.
ۋلانۋ بەلگىلەرى بار بالالار مەن اتا-انالار جەدەل جاردەم بريگادالارى ارقىلى ەپيدەميولوگيا، ميكروبيولوگيا، جۇقپالى جانە پارازيتتىك اۋرۋلار جونىندەگى رەسپۋبليكالىق مامانداندىرىلعان عىلىمي-پراكتيكالىق مەديتسينالىق ورتالىققا جەتكىزىلگەن.
وسى وقيعاعا بايلانىستى چيلانزار اۋدانىنىڭ پروكۋراتۋراسى وزبەكستان قىلمىستىق كودەكسىنىڭ 276¹³- بابىندا كوزدەلگەن سانيتاريالىق زاڭناما تالاپتارىن نەمەسە ەپيدەمياعا قارسى كۇرەس قاعيدالارىن بۇزۋ دەرەگى بويىنشا قىلمىستىق ءىس قوزعاعان.
قازىرگى ۋاقىتتا چيلانزار اۋدانىنىڭ ىشكى ىستەر باسقارماسى جانىنداعى تەرگەۋ ءبولىمى وقيعانىڭ ءمان-جايىن انىقتاۋ ءۇشىن العاشقى تەرگەۋ امالدارىن جۇرگىزىپ جاتىر.
ەسكە سالايىق، قاراعاندى وبلىسىنىڭ جاس فۋتبولشىلارى تاشكەنتكە Dostlik Cup 2026 حالىقارالىق تۋرنيرىنە قاتىسۋ ءۇشىن بارعان. ءوڭىر نامىسىن Jas Batir ،Nomad Akademiya جانە Skaut اتتى ءۇش جەكەمەنشىك فۋتبول مەكتەبىنىڭ تاربيەلەنۋشىلەرى قورعاعان.
قازاقستاننىڭ وزبەكستانداعى ەلشىلىگىنىڭ مالىمەتىنشە، مەديتسينالىق كومەككە بارلىعى 19 ادام جۇگىنگەن. ولاردىڭ 17 سى، ونىڭ ىشىندە 11 بالا مەن التى ەرەسەك ادام اۋرۋحاناعا جاتقىزىلعان.