تاۋداعى تازالىققا جاۋاپ بەرەتىن قۇس: الماتى وبلىسىندا ساقالتاي ۆيدەوعا ءتۇسىپ قالدى

قونايەۆ. KAZINFORM - شارىن مەملەكەتتىك ۇلتتىق تابيعي پارك ينسپەكتورلارى قازاقستاننىڭ قىزىل كىتابىنا ەنگەن ساقالتايدى كەزدەستىردى.

قازاقستاننىڭ قىزىل كىتابىنا ەنگەن قۇستىڭ ۆيدەوسىمەن ورمان شارۋاشىلىعى جانە جانۋارلار دۇنيەسى كوميتەتى الەۋمەتتىك جەلىدە ءبولىستى.

«شارىن مەملەكەتتىك ۇلتتىق تابيعي پاركىنىڭ اۋماعىندا ينسپەكتورلار رەيد بارىسىندا ساقالتايدى كەزدەستىردى. ول قازاقستاننىڭ قىزىل كىتابىنا 3-سانات بويىنشا ەنگىزىلگەن. بۇل جىرتقىش قۇستاردىڭ ەڭ ءىرى تۇرلەرىنىڭ ءبىرى، سالماعى 6 كەلىگە دەيىن جەتەدى، ال قاناتتارىنىڭ قۇلاشى 275 س م»، - دەپ حابارلادى كوميتەتتەن.

ساقالتاي - قوزىقۇماي، كوكجورە سەكىلدى كۇندىزگى جىرتقىش قۇستار وتريادىنىڭ قارشىعا تۇقىمداسىنا جاتاتىن ءىرى قۇس. ول جەتىسۋ، جوڭعار الاتاۋى مەن تيان- شاندا، التايدا كەزدەسەدى. تەڭىز دەڭگەيىنەن 2000-4000 مەتر بيىكتىكتەگى شىڭ- قۇزداردى مەكەندەيدى. ۇياسىن تاۋدىڭ جارتاستى- قۇزدى جەرلەرىنە سالادى.

اقسۋ-جاباعىلى جانە الماتى تاۋلى قورىقتارىندا 20 شاقتىسى قورعاۋعا الىنعان.

وسىعان دەيىن شارىن ۇلتتىق پارك ينسپەكتورلارى «تۇركىستان سىلەۋسىنىن» فوتوعا ءتۇسىرىپ العان ەدى.