تابيعي رەسۋرستارعا تاۋەلدىلىكتەن بىرتىندەپ ارىلۋىمىز قاجەت - پرەزيدەنت ماقالاسى

استانا. KAZINFORM - پرەزيدەنت قاسىم- جومارت توقايەۆ «ەگەمەن قازاقستان» گازەتىنە جاريالاعان «ورتالىق ازيا رەنەسسانسى: ورنىقتى دامۋ جانە وركەندەۋ جولى» اتتى ماقالاسىندا وڭىردەگى ىقپالداستىقتى تەرەڭدەتۋدىڭ تىڭ باعىتتارىن اتايدى.

«ەلدەرىمىزدىڭ جالپى اۋماعى - 3882000 شارشى شاقىرىم، حالقىنىڭ سانى 80 ميلليوننان اسادى. ال ىشكى جالپى ءونىمى 450 ميلليارد دوللارعا جۋىقتايدى. الەمدەگى ۋران قورىنىڭ شامامەن 20، مۇنايدىڭ 17،2، تابيعي گازدىڭ 7 پايىزى - ءبىزدىڭ ايماقتىڭ ەنشىسىندە. ورتالىق ازيا كومىر وندىرۋدەن الەمدە 10-شى، ەلەكتر ەنەرگياسىن وندىرۋدەن 19-ورىندا تۇر. ءبىزدىڭ ەكونوميكالارىمىز ءبىرىن-ءبىرى تولىقتىرىپ وتىرادى. بۇل جاعداي ەلدەرىمىزدىڭ سىرتقى فاكتورلارعا لايىقتى توتەپ بەرۋىن قامتاماسىز ەتىپ، ساۋدا-ءوندىرىس سالاسىنداعى سيكلدەردى ءارتاراپتاندىرۋعا مۇمكىندىك بەرەدى. بىرلەسكەن ەكونوميكالىق جوبالاردى ءتيىمدى ىسكە اسىرۋ وسى ۇدەرىسكە وڭ ىقپال ەتە الادى»، - دەپ جازادى قاسىم- جومارت توقايەۆ.

مەملەكەت باسشىسى ەكونوميكانى تەحنولوگيالىق جاعىنان دامىتۋ ءوڭىر ەلدەرىنىڭ باستى مىندەتى دەپ ەسەپتەيدى.

«ءبىز تابيعي رەسۋرستارعا تاۋەلدىلىكتەن بىرتىندەپ ارىلۋىمىز قاجەت. وسى رەتتە مەديا، كينو، مۋزىكا، ديزاين، ءبىلىم بەرۋ جانە اقپاراتتىق تەحنولوگيالار سالاسىن قامتيتىن كرەاتيۆتى يندۋستريا مەن سيفرلاندىرۋ ءىسى ەكونوميكاعا تىڭ سەرپىن بەرەتىن كۇشكە اينالا الادى. ءوڭىر ەلدەرىنىڭ وسى باعىتتا بىرلەسكەن جوبالار ازىرلەۋگە الەۋەتى دە جەتەدى. سيفرلىق جانە كرەاتيۆتى يندۋستريانىڭ جاپپاي قارقىن الۋى شيكىزاتقا سۇيەنگەن ەكونوميكادان زياتكەرلىك سيپاتتاعى وندىرىسكە دايەكتى تۇردە كوشۋگە ىقپال ەتەتىن بولادى. ورتالىق ازيانىڭ ىقپالداستىعى ءبىزدىڭ ەلدەرىمىزدىڭ ۇلتتىق ەكونوميكالىق ءوسىمىنىڭ باستى سەبەپشىسى بولماعانىمەن، ونىڭ نەگىزگى قاينار كوزىنىڭ ءبىرى بولا الاتىنىنا سەنىمدىمىن»، - دەيدى پرەزيدەنت.

ورتالىق ازياداعى بەس مەملەكەت قاتىناستار ناقتى مازمۇنعا يە بولىپ، تەرەڭ ستراتەگيالىق ارىپتەستىك پەن وداقتاستىق دەڭگەيگە كوتەرىلدى.

«وڭىردەگى مەملەكەتارالىق قاتىناستار دا تۇبەگەيلى وزگەرىسكە ۇشىرادى. ەلدەرىمىزدىڭ اراسىندا بارلىق دەڭگەيدە سىندارلى ەكىجاقتى جانە كوپجاقتى ديالوگ جولعا قويىلدى، ءوزارا ءتيىمدى ىنتىماقتاستىق دامىپ كەلەدى. وسىعان دەيىن ايماقتاعى قارىم-قاتىناستى جان-جاقتى دامىتۋعا كەدەرگى كەلتىرىپ، قايشىلىق تۋعىزعان ماسەلەلەردى شەشۋ جولىنداعى جەتىستىكتەرىمىزدىڭ ءمان- ماڭىزى زور. سۋ- ەنەرگەتيكا سالاسىندا ءوزارا ءتيىمدى شەشىم تابۋعا قاتىستى تابىستارىمىزدى جوعارى باعالاۋعا بولادى. مەملەكەتتىك شەكارالاردى دەليميتاتسيالاۋعا، شەكاراداعى وتكىزۋ بەكەتتەرىنىڭ جۇمىسىن جەتىلدىرۋگە، كولىك قاتىناسىن كەڭەيتۋگە، جاڭا باعىتتاردى ىسكە قوسۋعا جانە ازاماتتاردىڭ بارىس- كەلىسىن جەڭىلدەتۋگە قاتىستى ماسەلەلەردى كەزەڭ- كەزەڭىمەن شەشۋگە قولايلى جاعداي جاسالىپ وتىر. ءوڭىردىڭ ۇزاقمەرزىمدى قاۋىپسىزدىگىن جانە وركەندەۋىن قامتاماسىز ەتۋ ءۇشىن كۇش بىرىكتىرۋ جولىنداعى ءىس- قيمىلدار دا تۇراقتى تۇردە جۇزەگە اسىرىلىپ كەلەدى. بۇل باعىتتان اينىماسىمىز انىق»، - دەلىنگەن مەملەكەت باسشىسى ماقالاسىندا.

قاسىم- جومارت توقايەۆتىڭ جازۋىنشا، بۇگىنگى تاڭدا بەس مەملەكەت اراسىنداعى ساياسي، ساۋدا- ەكونوميكالىق جانە مادەني- گۋمانيتارلىق قاتىناستار ناقتى مازمۇنعا يە بولىپ، تەرەڭ ستراتەگيالىق ارىپتەستىك پەن وداقتاستىق دەڭگەيگە كوتەرىلدى. ورتالىق ازيا مەملەكەتتەرى سىرتقى ساياسي قارىم- قاتىناستا ءوزىنىڭ ساليقالى ستراتەگياسىن جاساي الدى. بۇل قادام ەلارالىق جانە ءوڭىرارالىق مۇددەلەر تەپە- تەڭدىگىن ساقتاپ، ەلدەرىمىزدىڭ جاھاندىق ۇدەرىستەرگە تولىققاندى قاتىسۋىنا جول اشتى.

«ورتالىق ازيا ەلدەرى تابىستى ءارى ىقپالدى ۇيىمداردىڭ قۇرىلتايشىسى رەتىندە بەيبىتشىلىكتى جاقتايتىن مەملەكەتتەر ەكەنىن دالەلدەي وتىرىپ، ءوزىنىڭ يدەيالارى مەن جوبالارىن كوپجاقتى قۇرىلىمداردا بەلسەندى تۇردە ىلگەرىلەتىپ كەلەدى. مىنە، وسىنىڭ ءبارى «ورتالىق ازيا بەستىگىن» ەۋرازيا قۇرلىعىنىڭ تورىندە تۇراقتى دامىپ كەلە جاتقان باقۋاتتى ەلدەر دەپ سەنىممەن ايتۋعا مۇمكىندىك بەرەدى. ورتاق تاريحىمىز، عاسىرلار بويى جالعاسىپ كەلە جاتقان دوستىعىمىز بەن تاتۋ كورشىلىك ءداستۇرىمىز باۋىرلاس حالىقتاردى بۇرىنعىدان دا جاقىنداستىرا تۇسەتىن مىزعىماس تۇعىر بولىپ قالا بەرەتىنى انىق»، - دەدى قاسىم-جومارت توقايەۆ.

اۆتور

رۋسلان عابباسوۆ