«تاۋارلى نەسيە» باعدارلاماسىن قابىلداۋ قاجەت - سايروۆ

استانا. KAZINFORM - «تاۋارلى نەسيە» باعدارلاماسىن قابىلداپ، ىسكە اسىرۋ قاجەت. بۇل تۋرالى پرەمەر-ءمينيستردىڭ ورىنباسارى سەرىك جۇمانعارينگە ساۋال جولداعان ءماجىلىس دەپۋتاتى ەرلان سايروۆ ايتتى.

- بىزگە شەكارالىق اۋدانداردان اۋىل شارۋاشىلىعىن قولداۋ، دامىتۋ ماسەلەلەرى بويىنشا ازاماتتار ءجيى حابارلاسادى. ش ق و، اباي، جەتىسۋ وبلىستارىنىڭ شەكارالىق اۋدانداردىڭ فەرمەرلەرى پرەزيدەنت قاسىم-جومارت توقايەۆ تاپسىرما بەرگەن اۋىل شارۋاشىلىعىنا «تاۋار نەسيەسى» جونىندە ءوتىنىش ءبىلدىردى. بۇگىنگى كۇنى ۇكىمەت مەملەكەت باسشىسىنىڭ جولداۋىندا ايتىلعان «تاۋارلى نەسيە» تۋرالى باعدارلاما ازىرلەمەگەن، - دەدى دەپۋتات.

وسى ورايدا ول اۋىل شارۋاشىلىعىن نەسيەلەۋگە قاتىستى تومەندەگىدەي پروبلەمالاردى اتادى:

- پايىزدىق ۇستەمەسى مەن تولەم كەستەسىنىڭ قولايلىعىنان باسقا كوپتەگەن جاسىرىن تالاپتاردىڭ بولۋى؛

- كەپىلگە قويىلاتىن تالاپتاردىڭ جوعارىلىعى (اۋىلداعى ۇيلەرمەن قورا-قوپسىلاردىڭ كەپىلگە الىنباۋى نەمەسە تومەن باعالانۋى)؛

- مەملەكەت تاراپىنان سۋبسيديالاناتىن پايىزدىق ۇستەمەلەردىڭ بيۋدجەت تاپشىلىعىنا بايلانىستى شارۋالاردىڭ وزدەرىنە تولەتتىرىلۋى؛

- ايتالىق، ەلىمىزدەگى ەكىنشى دەڭگەيلى بانكتەر ءۇشىن نەسيە بەرۋ بۇل تابىس كوزى بولسا، مەملەكەتتىڭ بەرەتىن جەڭىلدەتىلگەن نەسيەلەرىنىڭ نەگىزگى ماقساتى - بۇل بەلگىلى ءبىر سالانىڭ دامۋىنا، اياعىنان تۇرۋىنا ىقپال ەتۋ. ۇكىمەت ەكونوميكانىڭ ناقتى سەكتورىن اۋقىمدى قارجىلاندىرۋعا كىرىسەتىندىگى تۋرالى جاريالادى. 2025 -جىلى «دامۋ» قورى 1,7 تريلليون تەڭگەنى قۇرايتىن ش و ب- تىڭ كەمىندە 30 مىڭ جوباسىنا قولداۋ كورسەتەتىندىگىن ايتقانىمەن ناقتى قارجىلاندىرۋ باعدارلامالارى ايقىندالماعان. «AMANAT» فراكسياسى بۇل باعدارلامالار شەكارالىق اۋداندار فەرمەرلەرىنە دە قولجەتىمدى بولۋى قاجەت دەپ ەسەپتەيدى. ۇكىمەت دامۋ ينستيتۋتتارىنىڭ قارجىلاندىرۋ كوزدەرىن شەكارالىق اۋدانداردىڭ فەرمەرلەرىنە قول جەتىمدىلىگىن قامتاماسىز ەتۋى قاجەت. بۇل - 3,4 ميلليون ادام تۇراتىن 65 اۋداننىڭ حالقىنىڭ تاعدىرى، - دەدى ەرلان سايروۆ.

سوندىقتان دەپۋتات مەملەكەت باسشىسى قاسىم-جومارت توقايەۆتىڭ تاپسىرماسىن جۇيەلى ىسكە اسىرۋ، اۋىل ەكونوميكاسىنا باعىتتالاتىن شاعىن نەسيەلەر كولەمى مەن سانىن، قولجەتىمدىلىگىن ۇلعايتۋ ماقساتىندا «تاۋارلى نەسيە» باعدارلاماسىن قابىلداۋ، ىسكە اسىرۋ قاجەت دەپ سانايدى.

مەملەكەت باسشىسى قاسىم- جومارت توقايەۆ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى جولداۋىندا «اۋىل اماناتى» جوباسى اياسىندا تاعى ءبىر جاڭا ءتاسىلدى، ياعني «تاۋار نەسيەسىن» بەرۋ ماسەلەسىن قاراستىرۋ قاجەتتىگىن ايتقان ەدى.

اۆتور

مارلان جيەمباي