RBC Trends جازۋىنشا، ولاردىڭ ءبارى بىردەي عىلىمي تۇرعىدان دالەلدەنبەگەن. ەندەشە، سۋىق تيۋ مەن ج ر ۆ ي تۋرالى كەڭ تاراعان 10 ميفكە توقتالايىق.
1. سۋىقتاپ قالۋ ءۇشىن توڭىپ قالۋ جەتكىلىكتى
بۇل - ەڭ كوپ تاراعان تۇسىنىكتەردىڭ ءبىرى. الايدا ادامنىڭ توڭۋى وزدىگىنەن ج ر ۆ ي- ءدى تۋدىرمايدى. اۋرۋدىڭ نەگىزگى سەبەبى - ۆيرۋس.
دارىگەرلەردىڭ ايتۋىنشا، اعزانىڭ قاتتى توڭۋى ينفەكسياعا بەيىمدىلىكتى ارتتىرۋى مۇمكىن. ءبىراق اۋرۋدىڭ پايدا بولۋى ءۇشىن ءبارىبىر ينفەكسيالىق قوزدىرعىش قاجەت. ياعني، «اياعىم توڭدى، سوندىقتان تۇماۋ بولدىم» دەۋ دۇرىس ەمەس.
2. س دارۋمەنىن كوپ ىشسەڭ، سۋىق تيمەيدى
س دارۋمەنىن تۇماۋ مەن ج ر ۆ ي-دەن قورعانۋدىڭ سەنىمدى قۇرالى دەپ ساناۋ دۇرىس ەمەس.
ماتەريالدا كەلتىرىلگەن زەرتتەۋلەرگە سايكەس، سۋىق تيۋ ماۋسىمىندا س دارۋمەنىن كۇن سايىن قابىلداۋ اۋرۋدىڭ الدىن الاتىنىن كورسەتەتىن جەتكىلىكتى دالەل جوق. دەگەنمەن كەيبىر دەرەكتەر اۋرۋدىڭ ۇزاقتىعىن شامامەن ءبىر- ەكى كۇنگە قىسقارتۋى مۇمكىن ەكەنىن كورسەتەدى.
ال ادام اۋىرىپ قالعاننان كەيىن س دارۋمەنىن وتە جوعارى مولشەردە قابىلداۋ اۋرۋ بەلگىلەرىن ايتارلىقتاي جەڭىلدەتەتىنى نەمەسە اۋرۋدى تەز جازاتىنى دالەلدەنبەگەن. سوندىقتان «كوبىرەك ىشسەم، تەزىرەك جازىلامىن» دەگەن تۇسىنىككە ساق بولعان ءجون.
3. سۋىق تيگەندە انتيبيوتيك ءىشۋ كەرەك
انتيبيوتيكتەر باكتەريالارعا قارسى اسەر ەتەدى، ال ج ر ۆ ي-دىڭ نەگىزگى قوزدىرعىشتارى - ۆيرۋستار. سوندىقتان ۆيرۋستىق ينفەكسيا كەزىندە انتيبيوتيك قابىلداۋ اۋرۋدى ەمدەمەيدى.
كەرىسىنشە، انتيبيوتيكتەردى دارىگەردىڭ نۇسقاۋىنسىز جانە باقىلاۋسىز قولدانۋ جاعىمسىز اسەرلەرگە اكەلىپ، باكتەريالاردىڭ انتيبيوتيكتەرگە توزىمدىلىگىن ارتتىرۋى مۇمكىن. مۇنداي جاعدايدا كەيىن باكتەريالىق ينفەكسيالاردى ەمدەۋ قيىنداي تۇسەدى.
4. كەز كەلگەن تەمپەراتۋرانى بىردەن ءتۇسىرۋ قاجەت
دەنە قىزۋى كوتەرىلگەن سايىن بىردەن ءدارى ءىشۋ مىندەتتى ەمەس.
قىزۋدىڭ جوعارىلاۋى - اعزانىڭ ينفەكسياعا قارسى تابيعي قورعانىس رەاكسيالارىنىڭ ءبىرى. سوندىقتان ادامنىڭ جالپى جاعدايى قاناعاتتانارلىق بولسا، دەنە قىزۋىن ءار جاعدايدا بىردەن ءتۇسىرۋ قاجەت ەمەس.
ماتەريالدا ەرەسەكتەرگە قىزۋدى تۇسىرەتىن دارىلەردى ادەتتە 38 گرادۋستان جوعارى تەمپەراتۋرا كەزىندە، ال بالالارعا 38-39 گرادۋستان جوعارى بولعاندا قولدانۋ تۋرالى ۇسىنىمدار كەلتىرىلگەن. دەگەنمەن ناقتى جاعدايدا ادامنىڭ جاسى، دەنساۋلىق جاعدايى جانە قوسىمشا بەلگىلەرى ەسكەرىلۋى كەرەك.
5. بال قوسىلعان جىلى ءسۇت سۋىق ءتيۋدى ەمدەيدى
بال قوسىلعان جىلى ءسۇت تاماقتىڭ اۋىرعانىن جەڭىلدەتىپ، جوتەلدى جۇمسارتۋى مۇمكىن. ءبىراق ول ۆيرۋستى جويمايدى جانە ينفەكسيانى ەمدەيتىن ءدارى ەمەس.
زەرتتەۋلەردە بالدىڭ جوتەلدىڭ جيىلىگى مەن اۋىرلىعىن ازايتۋعا كومەكتەسۋى مۇمكىن ەكەنى كورسەتىلگەن. الايدا ونىڭ اسەرىن «سۋىق ءتيۋدى ەمدەيدى» دەپ تۇسىندىرۋگە بولمايدى. ياعني بال قوسىلعان جىلى سۋسىن - سيمپتومدى جەڭىلدەتەتىن قۇرال، ءبىراق نەگىزگى ەمنىڭ ورنىنا جۇرمەيدى.
6. قىزۋ بولماسا، ادام جۇقپالى ەمەس
رەسپيراتورلىق ينفەكسيا كەزىندە ادام العاشقى بەلگىلەر پايدا بولعانعا دەيىن- اق ۆيرۋستى تاراتا باستاۋى مۇمكىن. ماتەريالدا ۆيرۋس ءبولىنۋى سيمپتومدار باستالعانعا دەيىن شامامەن ءبىر كۇن بۇرىن باستالاتىنى، ال اۋرۋ باستالعاننان كەيىن تاعى بىرنەشە كۇن جالعاسۋى مۇمكىن ەكەنى ايتىلادى.
سوندىقتان دەنە قىزۋى قالىپتى بولعان ادامنىڭ ءوزى ينفەكسيا تاراتۋى ىقتيمال. اسىرەسە جوتەل، تۇشكىرۋ جانە مۇرىننان كوپ ءبولىندى شىعۋى كەزىندە جۇقتىرۋ قاۋپى جوعارى بولادى.
7. سۋىق ءتيۋ - تۇك ەمەس، اۋرۋدى «جاتىپ» وتكىزۋگە بولمايدى
ج ر ۆ ي-دى جەڭىل اۋرۋ دەپ قابىلداپ، جۇمىسقا نەمەسە كۇندەلىكتى تىرشىلىككە ادەتتەگىدەي ارالاسۋ دۇرىس ەمەس.
اسىرەسە دەنە قىزۋى كوتەرىلگەن كەزدە اعزاعا قوسىمشا كۇش تۇسەدى. مۇنداي جاعدايدا فيزيكالىق بەلسەندىلىكتى شەكتەپ، كوبىرەك دەمالعان ءجون.
توسەك رەجيمى مىندەتتى تۇردە كۇنى بويى قيمىلسىز جاتۋ دەگەن ءسوز ەمەس. ونىڭ ءمانى - اعزاعا ينفەكسيامەن كۇرەسۋگە مۇمكىندىك بەرۋ جانە فيزيكالىق جۇكتەمەنى ايتارلىقتاي ازايتۋ.
8. سۋىق تيگەندە سارىمساق جەسەڭ، اۋرۋ بىردەن كەتەدى
سارىمساقتىڭ قۇرامىندا بيولوگيالىق بەلسەندى زاتتار بار، ولاردىڭ كەيبىرى قابىنۋعا قارسى اسەر كورسەتۋى جانە بەلگىلى ءبىر باكتەريالاردىڭ ءوسۋىن تەجەۋى مۇمكىن.
الايدا سارىمساقتىڭ ج ر ۆ ي مەن تۇماۋدىڭ الدىن الاتىنىن دالەلدەيتىن جەتكىلىكتى عىلىمي بازا جوق. سوندىقتان ونى ۆيرۋستىق ينفەكسياعا قارسى ءدارى رەتىندە قاراستىرۋعا بولمايدى.
9. ءبىر رەت ج ر ۆ ي-مەن اۋىرساڭ، بارلىق ۆيرۋسقا يممۋنيتەت قالىپتاسادى
ج ر ۆ ي - ءبىر عانا اۋرۋ ەمەس. ونى ءارتۇرلى ۆيرۋستار تۋدىرۋى مۇمكىن.
اعزا ينفەكسيامەن كۇرەسكەننەن كەيىن بەلگىلى ءبىر قوزدىرعىشقا قارسى يممۋندىق جاۋاپ قالىپتاستىرادى. ءبىراق بۇل بارلىق رەسپيراتورلىق ۆيرۋستاردان قورعانىس بەرەدى دەگەندى بىلدىرمەيدى.
ءتىپتى ءبىر توپقا جاتاتىن ۆيرۋستاردىڭ وزىنە قارسى يممۋنيتەت ءاردايىم تولىق قالىپتاسا بەرمەۋى مۇمكىن. سەبەبى ولاردىڭ انتيگەندىك قۇرامى ءارتۇرلى، ال اعزا ناقتى قوزدىرعىشقا باعىتتالعان قورعانىس جاسۋشالارى مەن انتيدەنەلەرىن قالىپتاستىرادى.
10. اۋىرماۋ ءۇشىن ناۋقاس ادامدارمەن مۇلدە بايلانىسپاۋ
بۇل ءىس جۇزىندە ءاردايىم مۇمكىن ەمەس. ونىڭ ۇستىنە ادام اۋرۋ بەلگىلەرى پايدا بولعانعا دەيىن دە ۆيرۋستى تاراتۋى مۇمكىن.
سوندىقتان تەك ناۋقاس ادامداردان قاشۋ جەتكىلىكسىز. ج ر ۆ ي ماۋسىمىندا بولمەنى ءجيى جەلدەتۋ، قولدى سابىنمەن جۋۋ، بەتكە لاس قولمەن تيمەۋ، ادامدار كوپ جينالاتىن جەردە ماسكا تاعۋ جانە اۋرۋ بەلگىلەرى انىق ادامدارمەن اراقاشىقتىق ساقتاۋ پايدالى. ياعني پروفيلاكتيكا ءبىر عانا ەرەجەدەن تۇرمايدى - بىرنەشە قاراپايىم ادەتتىڭ جيىنتىعى ينفەكسيا جۇقتىرۋ قاۋپىن ازايتۋعا كومەكتەسەدى.