ت ر ك قىزمەتكەرلەرى ءداستۇر بويىنشا قان تاپسىردى
استانا. KAZINFORM – ق ر پرەزيدەنتى تەلەراديوكەشەنىنىڭ قىزمەتكەرلەرى جىل سايىن «دونور بول» ەرىكتى قان تاپسىرۋ اكسياسىنا قاتىسادى، دەپ حابارلايدى Kazinform.
بۇگىن ءداستۇر بويىنشا ونداعان جۋرناليس، وپەراتور مەن تەحنيكالىق قىزمەتكەرلەر ەلوردانىڭ قان قورىن تولىقتىرۋ ءۇشىن جىلجىمالى پۋنكتتە قان تاپسىردى.
بىرەر ساعاتتىڭ ىشىندە جىلجىمالى پۋنكتتە 41 ادام قان تاپسىردى - بارلىعى 18 ليتر قان قابىلداندى. مۇنداي ناۋقان اۋرۋحانالاردى قولداۋعا كومەكتەسەدى. سونداي-اق دونور بولۋ ماڭىزدى ەكەنىن ەسكە سالادى.
دەنساۋلىق ساقتاۋ مينيسترلىگىنىڭ ترانسفۋزيولوگيا عىلىمي-وندىرىستىك ورتالىعىنىڭ حابارلاۋىنشا، استاناداعى 23 مەديتسينالىق ۇيىم دونورلىق قانمەن قامتاماسىز ەتىلگەن. جىل سايىن ەلوردادا 30 مىڭعا جۋىق دونوردىڭ ارقاسىندا شامامەن 60-70 مىڭ دوزا قان قۇيىلادى - بۇل كۇنىنە شامامەن 120 ادام. حالىقتى قايىرىمدىلىققا تارتۋ ءۇشىن ورتالىق قىزمەتكەرلەرى كۇنىنە مىڭعا دەيىن قوڭىراۋ سوعادى.
- ءبىر قان تاپسىرۋ بىردەن ءۇش ادامنىڭ ءومىرىن ساقتاپ قالۋى مۇمكىن. دونور قانى اۋىر وپەراتسيالار، بوسانۋ، جاراقاتتار، قاتەرلى ىسىك جانە باسقا دا اۋرۋلار كەزىندە قاجەت. ءسىز يگىلىك تىزبەگىنىڭ ءبىر بولىگىنە اينالاسىز. تۇراقتى قان تاپسىرۋ اعزانى جاڭارتۋعا، زات الماسۋدى جاقسارتۋعا جانە جۇرەك-قان تامىرلارى اۋرۋلارىنىڭ قاۋپىن ازايتۋعا كومەكتەسەدى، - دەدى ورتالىق وكىلى بۇلبۇل سەرمەنوۆا.
پروتسەدۋرادان بۇرىن دونورلار مىندەتتى مەديتسينالىق تەكسەرۋدەن وتەدى: ولاردىڭ قان توبى انىقتالادى، جالپى دەنساۋلىعى تەكسەرىلەدى، مۇمكىن بولاتىن قارسى كورسەتكىشتەردى بولدىرماۋ ءۇشىن انامنەز جينالادى. ال قان تاپسىرعاننان كەيىن قاتىسۋشىلارعا ءشاي مەن تاتتىلەر بەرىلەدى.
جىلجىمالى قان تارسىرۋ پۋنكتتەرى قالاداعى كاسىپورىندار مەن ۇيىمدارعا بارادى. ال 2025-جىلدان باستاپ مولداعۇلوۆا كوشەسى، 33 مەكەنجايى بويىنشا اشىلعان قان ورتالىعىنىڭ ەكىنشى بولىمشەسى قالا تۇرعىندارى ءۇشىن قان تاپسىرۋدى بۇرىنعىدان دا قولجەتىمدى ەتتى.
ايتا كەتۋ كەرەك، بۇگىنگە دەيىن دەنساۋلىق ساقتاۋ سالاسىن دامىتۋعا قوسقان ۇلەسى ءۇشىن استانانىڭ 29 تۇرعىنى «قازاقستاننىڭ قۇرمەتتى دونورى» توسبەلگىسىمەن ماراپاتتالعان. «قازاقستاننىڭ قۇرمەتتى دونورى» اتاعىنا تاعى بەس ۇمىتكەردىڭ قۇجاتتارى دەنساۋلىق ساقتاۋ مينيسترلىگىنە جولدانىپ، قارالىپ جاتىر.