ت م د جانە ورتالىق ازيادا رەفەرەندۋم وتكىزىپ جاتقان بىردەن-ءبىر ەلمىز - ەرلان قارين
استانا. KAZINFORM - مەملەكەتتىك كەڭەسشى ەرلان قارين ا ە س سالۋعا قاتىسى رەفەرەندۋمدا ەلورداداعى №164-داۋىس بەرۋ ۋچاسكەسىندە ءوز تاڭداۋىن جاسادى.
«كەز كەلگەن رەفەرەندۋمعا ماڭىزدى ماسەلە شىعارىلادى. سوندىقتان بۇگىنگى رەفەرەندۋمداعى ا ە س سالۋ ماسەلەسى دە وتە ماڭىزدى. بۇگىن قابىلدانعان شەشىمگە بايلانىستى ەلىمىزدىڭ ەكونوميكالىق دامۋ باعىتى ايقىندالادى. رەفەرەندۋمعا شىعارىلىپ وتىرعان ماسەلەدەن بولەك، رەفەرەندۋمدى وتكىزۋدىڭ ءوزى دە ماڭىزدى. ءبىز ت م د جانە ورتالىق ازيا ەلدەرى بويىنشا رەفەرەندۋم وتكىزىپ جاتقان بىردەن-ءبىر ەلمىز. مۇنىڭ ءوزى كوپ نارسەنى اڭعارتادى، ياعني مەملەكەت پەن قوعام اراسىندا جاڭا ساياسي مادەنيەتتىڭ قالىپتاسۋىنا ىقپالى بار»، - دەدى ەرلان قارين داۋىس بەرگەن سوڭ ب ا ق وكىلدەرىنىڭ ساۋالىنا جاۋاپ بەرە تۇرىپ.
ايتا كەتەيىك، استانادا ۇلتتىق اكادەميالىق كىتاپحانادا ورنالاسقان №164-ۋچاسكەسىندە داۋىس بەرۋ ساعات 7:00-دە باستالدى. اتالعان ۋچاسكەدە 2114 داۋىس بەرۋشى تىركەلگەن. سونىمەن قاتار 26 بايقاۋشى قاتىسىپ وتىر، ونىڭ ىشىندە حالىقارالىق بايقاۋشىلار دا بار. العاش بولىپ داۋىس بەرگەن ەلوردا تۇرعىنىنا كىشىگىرىم سىيلىق بەرىلدى.
ەسكە سالايىق، بۇگىن قازاقستاندىقتار اتوم ەلەكتر ستانسياسىن سالۋ ماسەلەسى بويىنشا جالپىۇلتتىق رەفەرەندۋمدا داۋىس بەرەدى.
رەسپۋبليكالىق رەفەرەندۋم بيۋللەتەنىندە ءبىر عانا ساۋال بولادى: «ءسىز قازاقستاندا اتوم ەلەكتر ستانسياسىن سالۋعا كەلىسەسىز بە؟» داۋىس بەرۋشى جاۋاپتىڭ ەكى نۇسقاسىنىڭ ءبىرىن تاڭدايدى: «ءيا، كەلىسەمىن» نەمەسە، «جوق، كەلىسپەيمىن».
وزدەرىنىڭ كونستيتۋتسيالىق قۇقىعىن كورەيا رەسپۋبليكاسىنداعى قازاقستان ازاماتتارى العاشقىلاردىڭ ءبىرى بولىپ جۇزەگە اسىردى.
1-شىلدەدەگى جاعداي بويىنشا ەل كولەمىندە 12176968 ادام رەفەرەندۋمدا داۋىس بەرۋگە حاقىلى.
اۆتور
داۋلەت ىزتىلەۋ