ت م ۇ- عا مۇشە ەلدەر لوگيستيكالىق جوبالاردى بىرلەسە دامىتاتىن اليانس قۇردى

تاشكەنت. KAZINFORM - تۇركى مەملەكەتتەرى ۇيىمى (ت م ۇ) اياسىندا لوگيستيكالىق ورتالىقتار مەن جۇك تاسىمالداۋشىلار اليانسى قۇرىلدى.

جاڭا قۇرىلىمدى جاساقتاۋ جونىندەگى قۇجاتقا بۇگىن وزبەكستاندا قول قويىلدى، دەپ حابارلايدى Kazinform اگەنتتىگىنىڭ تاشكەنتتەگى مەنشىكتى ءتىلشىسى ءاليحان اسقار.

اليانس تۇركى مەملەكەتتەرى ۇيىمىنا مۇشە ەلدەر اراسىندا جۇك تاسىمالى مەن لوگيستيكالىق ورتالىقتاردى دامىتۋعا جاردەمدەسەتىن بولادى. ونى قۇرۋ جونىندەگى قۇجاتقا قول قويۋ ءراسىمى بارىسىندا اليانستىڭ باس حاتشىسى جانە حاتشىلىق مۇشەلەرى تاعايىندالدى.

«كوپتەگەن حالىقارالىق كولىك-لوگيستيكالىق قۇرىلىمدارعا ءتان ماسەلە - ول تەك مەملەكەتتىك ورگاندار اراسىنداعى ىنتىماقتاستىقپەن شەكتەلۋ. بۇل جەردە جوبالارعا جەكە سەكتوردى تارتۋ نازاردان تىس قالىپ جاتادى. سوندىقتان وسى ماسەلەلەردى ەسكەرە وتىرىپ، ءبىز اتالعان اليانستى قۇرىپ وتىرمىز. ول لوگيستيكا سالاسىنداعى ت م ۇ- عا مۇشە ەلدەردىڭ مەملەكەتتىك ورگاندارىمەن قوسا، جەكە سەكتوردى دا بايلانىستىراتىن كوپىر بولماق»، - دەپ اليانستىڭ قىزمەت باعىتىن ءتۇسىندىردى ت م ۇ- نىڭ جوبالىق ديرەكتورى شوكيرجون راحماتوۆ.

ساراپشىلاردىڭ پايىمىنشا، اليانستى قۇرۋ تۇركى مەملەكەتتەرى ۇيىمىنا مۇشە ەلدەر اراسىنداعى ساۋدا-ساتتىقتى ارتتىرۋعا ىقپال ەتەدى. ياعني، ونىڭ اياسىندا كەدەندىك باجدىڭ باعاسىن تومەندەتۋ، جۇرگىزۋشىلەرگە بەرىلەتىن رۇقسات بلانكالارىن ەلەكتروندىق فورماتقا كوشىرۋ جانە سيفرلىق جۇيەلەردى ينتەگراتسيالاۋعا باسا نازار اۋدارىلادى.

«ءبىز سيفرلاندىرۋ پروتسەسىن جەدەلدەتۋ ارقىلى كەدەن بەكەتتەرىندەگى ۇزىن-سونار كەپتەلىس ماسەلەسىن شەشە الامىز. سول ءۇشىن دە العاشقى قادام جاساپ جاتىرمىز. كەدەندىك راسىمدەردى وڭتايلاندىرۋ ەسەبىنەن ءبىز ۋاقىت ۇنەمدەپ، پايدانى ەكى ەسەلەۋگە مۇمكىندىك الامىز. سونىڭ ناتيجەسىندە ت م ۇ اياسىنداعى ساۋدا-ساتتىق كولەمى ارتادى جانە ونى جەتكىزۋ قۇنى ارزاندايدى»، - دەپ توقتالدى كولىك جانە لوگيستيكانى دامىتۋ ماسەلەلەرىن زەرتتەۋ ورتالىعىنىڭ ديرەكتورى بەكزود حولماتوۆ.

ەسكە سالساق، بۇگىندە ت م ۇ- عا قازاقستان، تۇركيا، ازەربايجان، قىرعىزستان جانە وزبەكستان مۇشە. سونىمەن قاتار ۆەنگريا مەن تۇرىكمەنستان ۇيىمعا باقىلاۋشى ەل مارتەبەسىندە.