تۋ كوتەرىپ شىعاتىن سپورتشى جاۋاپكەرشىلىكتى ەكى ەسە سەزىنۋى كەرەك - ەرماحان ىبرايىموۆ

استانا. KAZINFORM - وليمپيادا ويىندارىنىڭ سالتاناتتى اشىلۋ راسىمىندە ەلىمىزدىڭ كوك بايراعىن كوتەرىپ شىعاتىن سپورتشى مىندەتتى تۇردە ەكى ەسە جاۋاپكەرشىلىكتى سەزىنۋى كەرەك. مۇنداي پىكىردى Kazinform تىلشىسىنە ەكسكليۋزيۆ سۇحبات بەرگەن قازاقتىڭ داڭقتى بوكسشىسى، 2000 -جىلعى وتكەن وليمپيادا ويىندارىنىڭ چەمپيونى، 1996 -جىلعى وليمپيادا ويىندارىنىڭ جانە 1997، 1999 -جىلعى الەم چەمپيوناتتارىنىڭ جۇلدەگەرى ەرماحان ىبرايىموۆپەن ءبىلدىردى.

«ءتورت جىلدا ءبىر كەلەتىن وليمپيادا ويىندارىنىڭ اشىلۋ سالتاناتىندا ەلىمىزدىڭ كوك تۋىن الىپ شىعۋ قۇرمەتى كەز كەلگەن سپورتشىعا بۇيىرا بەرمەيدى. ونىڭ ءوزىن «بۇل قۇمەتكە كىم لايىق» دەپ الدىن الا تاڭدايدى. ال، سول تاڭدالعان سپورتشىعا ۇلكەن ءۇمىت ارتىلادى. سوندىقتان وليمپيادا ويىندارىندا مەملەكەتتىك تۋىمىزدى الىپ شىققان سپورتشى وزىنە ەكى ەسە جاۋاپكەرشىلىك ارتىلعانىن سەزىنۋى كەرەك. مەن، ءوز باسىم ۇلكەن سپورتتا جۇرگەندە قاتارىنان ەكى وليمپيادادا مەملەكەتتىك تۋىمىزدى الىپ شىقتىم. ەكەۋىندە دە جۇلدەمەن ورالدىم. قازىرگى تاڭدا جازعى وليمپيادا ويىندارىندا تۋدى كوتەرىپ بارىپ، جۇلدەمەن كوتەرىپ قايتقان جالعىز سپورتشىمىن. مىنە، بيىل تۋدى الىپ شىعۋ قۇرمەتى اسلانبەك شىمبەرگەنوۆكە بۇيىردى. وعان مەنىڭ جولىمدى بەرسىن دەپ تىلەيمىن. وسىعان دەيىن بۇل باۋىرىما ءبىر-ەكى رەت جولىعىپ، اقىل-كەڭەسىمدى ايتتىم. تاجىريبەلەرىممەن ءبولىستىم. تۋ الىپ شىعۋدىڭ قانشالىقتى جۇگى بارىن ەسىنەن شىعارماۋدى تاپسىردىم»، - دەدى ىبرايىموۆ.

ەستەرىڭىزگە سالا كەتەيىك، بوكستان ەرلەر اراسىندا ەل نامىسىن 7 بوكسشى قورعايدى. ولار - ساكەن بيبوسىنوۆ (51 كەلى)، ماحمۇد سابىرحان (57 كەلى)، مۇحاممەدسابىر بازارباي ۇلى (63,5 ك گ)، اسلانبەك شىمبەرگەنوۆ (71 كەلى)، نۇربەك ورالباي (81 كەلى)، ايبەك ورالباي (92 كەلى)، قامشىبەك قوڭقابايەۆتار (+92 كەلى).

ايتا كەتەيىك، قازاقستان قۇراماسى وليمپيادا ويىندارىنا سپورتتىڭ 25 تۇرىنەن 92 جولداما جەڭىپ الدى.

فرانسيا استاناسى پاريج قالاسىندا وتەتىن XXXIII جازعى وليمپيادا ويىندارى 26-شىلدە مەن 11-تامىز ارالىعىنا بەلگىلەنگەن.

ويىنعا الەمنىڭ 205 ەلىنەن 10500 سپورتشى قاتىسادى. وندا 32 سپورت تۇرىنەن 329 مەدال جيىنتىعى ساراپقا سالىنادى.

اۆتور
كۇنسۇلتان وتارباي