ت ج م تاسقىنمەن كۇرەسكە قوسىمشا ۇشاق پەن تىكۇشاقتار ساتىپ الماقشى

استانا. KAZINFORM - توتەنشە جاعدايلار ءمينيسترى شىڭعىس ءارىنوۆ ۇكىمەت وتىرىسىندا تاسقىنمەن كۇرەسكە قوسىمشا ۇشاق پەن تىكۇشاقتار ساتىپ الۋ قاجەتتىگىن ءمالىم ەتتى.

ۆەدومستۆو باسشىسى كوكتەمدەگى تاسقىن سالدارىن تالقىلاي كەلە بىرنەشە كەشەندى شارانى قولعا العاندارىن ايتتى.

«ءبىرىنشى، قۇتقارۋشىلاردى ارنايى كيىم-كەشەكپەن جانە قۇرال-جابدىقتارمەن قامتاماسىز ەتۋ تاسىلدەرى قايتا قارالۋدا. ساتىپ الىناتىن كيىم ساپالى جانە تاپسىرمالاردى ورىنداۋعا ىڭعايلى قيمىل قوزعالىسقا قولايلى بولۋى كەرەك. ەكىنشى، ساپالى ارنايى اۆتوموبيلدەر مەن ينجەنەرلىك تەحنيكالار، ونىڭ ىشىندە ءجۇزۋ قۇرالدارىن، ۇشاقتار مەن تىكۇشاقتار ساتىپ الىنادى. ءبىز ۇشقىشتاردى تۇندە جانە قولايسىز اۋا رايى جاعدايىندا ۇشۋعا وقىتىپ ۇيرەتۋدى جوسپارلاپ وتىرمىز»، - دەدى شىڭعىس ءارىنوۆ.

ونىڭ ايتۋىنشا، بۇگىنگە دەيىن نازاردان تىس قالىپ، قولايلى جاعداي جاسالماعان قۇتقارۋ بولىمشەلەرىنە ەرەكشە كوڭىل بولىنە باستاعان.

«وسىعان بايلانىستى، جاڭا تاسىلگە بوي بۇرىپ، ءورت سوندىرۋشىلەر، مەديتسينا قىزمەتكەرلەرى مەن قۇتقارۋشىلار ءبىر جەرگە ورنالاسقان بىرەگەي ءورت ءسوندىرۋ دەپوسى قۇرىلۋدا. بۇل شۇعىل ارەكەت ەتۋدى ارتتىرۋعا جانە ازاماتتاردى دەر كەزىندە قۇتقارۋ شارالارىن قابىلداۋ مۇمكىندىگىن بەرەدى»، - دەدى مينيستر.

 توتەنشە جاعدايلار ءمينيسترى شىڭعىس ءارىنوۆ ۇكىمەت وتىرىسىنان كەيىن وتكەن باسپا ءسوز ءماسليحاتىندا بيۋدجەت ەسەبىنەن قانداي اۋە تەحنيكالارىن ساتىپ الۋدى جوسپارلاپ وتىرعانىن ايتتى.

«توتەنشە جاعدايلار مينيسترلىگىنە ءالى ءبىرتالاي تىكۇشاق پەن شاعىن فيۋزەلياجدى ۇشاقتار كەرەك. ءبىزدىڭ ويىمىز - كەلەشەكتە 20 وڭىردە 20 اۋە وتريادىن جاساقتاۋ. سونىڭ ارقاسىندا ول وڭىرلەردە قاۋىپسىزدىك قامتاماسىز ەتىلىپ، جاس ماماندار دايارلانادى. قازىرگى تاڭدا ءبىز ليزينگ ارقىلى 3 م ي-8 ا م ت تىكۇشاعى، 4 كا-32 تىكۇشاعىن الامىز. سونداي-اق، تاۋەلسىزدىك تاريحىندا تۇڭعىش رەت ۇشاق الىپ جاتىرمىز. چەحيانىڭ 4 دانا L - 410 ۇشاعىن ساتىپ الامىز. ولاردى باتىس، شىعىس، سولتۇستىك جانە وڭتۇستىك قازاقستان وڭىرلەرىنە قويامىز. سونىڭ ارقاسىندا ءوز مىندەتتەرىمىزدى ورىندايمىز دەپ ويلايمىن»، - دەدى شىڭعىس ءارىنوۆ.

اۆتور

ەسىمجان ناقتىباي