شەبەردىڭ قولىندا قاراپايىم بۇتاققا دا جان ءبىتىپ، ومىرگە ەرەكشە دۇنيە كەلەدى. رۋسلاننىڭ نەگىزگى ماماندىعى - قارجىگەر-ەكونوميست. قازىر ول پەتروپاۆلداعى كولىك كومپانيالارىنىڭ بىرىندە ايماقتىق وكىل بولىپ ەڭبەك ەتەدى. بوس ۋاقىتى دەرلىك شاعىن شەبەرحانادا وتەدى. ونىڭ ايتۋىنشا، بۇل قىزىعۋشىلىق ءبىر ساتتە پايدا بولعان جوق، ونىڭ تامىرى بالالىق شاقتا جاتىر.
- مەكتەپتە ەڭبەك - سۇيىكتى پاندەرىمنىڭ ءبىرى بولاتىن. ەڭ ءبىرىنشى جاساعان بۇيىمىم - اعاشتان جاسالعان كيىم ىلگىش. قىزىعۋشىلىق ۇشقىنى سول كەزدە تۇتاندى. ءبىراق تۇرمىس قامى بۇل اۋەستىكتى كەيىنگە ىسىرىپ تاستادى. مەكتەپتى ءبىتىرىپ جوعارى وقۋ ورنىنا ءتۇستىم، مەملەكەتتىك قىزمەتتە بولدىم، كەيىن ماماندىعىم بويىنشا جۇمىس ىستەدىم. وتباسىن قۇردىم. سۇيىكتى ىسپەن اينالىسۋعا مۇلدەم ۋاقىت بولمادى. تەك جاسىم 30-دان اسقاننان كەيىن عانا قولىما قۇرالداردى الۋدىڭ ءساتى ءتۇستى. باسىندا بۇل قاراپايىم قاجەتتىلىكتەن تۋىندادى: ساياجايعا قورا سالدىم، ورىندىقتار جاساۋ كەرەك بولدى، - دەيدى رۋسلان بايازيتوۆ.
كەيىن ارنايى كۋرستان ءوتىپ، اعاش ۇستالىعىنىڭ قىر-سىرىن كاسىبي مەڭگەرەدى. قازىر اعاشپەن جۇمىس ىستەۋ قاجەتتىلىكتەن گورى شىعارماشىلىققا اينالعان.
- مەنىڭ اتام اعاش ۇستاسى بولعان ەكەن. ول تۇرمىسقا قاجەتتى زاتتاردى - قول جۋعىشتار، ورىندىقتار جانە باسقا دا بۇيىمداردى تاپسىرىسپەن جاساعان. بۇل ونەر ماعان وسى اتامنان دارىعان شىعار، - دەيدى شەبەر.
رۋسلان دا اعاشتان ءتۇرلى بۇيىمدار جاسايدى. سونىڭ ىشىندە ويىنشىقتار - قۋىرشاققا ارنالعان ءۇي، ءتۇرلى پازلدار، جانۋارلاردىڭ مۇسىندەرى دە بار. ءاربىر جاڭا بۇيىم - جاڭا يدەيا، تاجىريبە، ىزدەنىس.
- وزدىگىمنەن ۇيرەنەمىن. ينتەرنەتتەگى بەينەساباقتاردى، باسقا شەبەرلەردىڭ تاجىريبەسىن قولدانامىن. قاتەلىكتەن قورىقپاۋ كەرەك. ءار جاساعان ىستەن ساباق الىپ، شەبەرلىكتى شىڭداي بەرۋ كەرەك. كىلتسالعىشتار، گۇل سورەلەرى سياقتى زاتتاردان باستاسام، قازىر جيھاز جاساۋدى ۇيرەنىپ جاتىرمىن. ۇيدەگى كىرەبەرىستەگى شكافتى ءوزىم ىستەدىم، - دەيدى رۋسلان بايازيتوۆ.
رۋسلان ءۇشىن اعاش - ءتىرى، تابيعي، وزىندىك مىنەزى بار ماتەريال. شەبەر كوبىنە قاراعايدى پايدالانادى، سەبەبى ول قولجەتىمدى ءارى جۇمىس ىستەۋگە ىڭعايلى.
- اعاشتان جاسالعان بۇيىمدار ەكولوگيالىق تازا، قاۋىپسىز، ۇزاققا شىدايدى جانە ەڭ باستىسى - قول ەڭبەگىنىڭ ەنەرگياسى بار. سوندىقتان تابيعي ماتەريالعا دەگەن سۇرانىس ەشقاشان جوعالمايدى. دەگەنمەن، بۇل ىسپەن تابىس تابۋ وڭاي ەمەس. ءونىمنىڭ وزىندىك قۇنى جوعارى، ال نارىقتا ارزان بالامالار كوپ. سوندىقتان جاساعان بۇيىمدارىمدى ساتۋدان گورى، جاقىندارىما سىيلاعاندى ءجون كورەمىن، - دەيدى شەبەر.
بولاشاقتا رۋسلان شەبەرحانا اشىپ، ءىرى جوبالارمەن اينالىسۋدى جوسپارلاپ وتىر. مىسالى، اعاشتان جيھازدار - ۇستەلدەر مەن شكافتار جاساماق.
اۆتورلار
اقەركە داۋرەنبەك قىزى