سىياقى ساياساتىن قايتا قارامايمىز - «سامۇرىق-قازىنا» وكىلى ە. سايروۆتىڭ دەپۋتاتتىق ساۋالىنا پىكىر ءبىلدىردى

«سامۇرىق-قازىنا» اكسيونەرلىك قوعامىنىڭ كووپەراتيۆتى باسقارۋ، الەۋمەتتىك-ەڭبەك قاتىناستارى جانە ەڭبەكتى قورعاۋ جونىندەگى باسقارۋشى ديرەكتورى عيبرات اۋعانوۆ ءماجىلىس دەپۋتاتى ەرلان سايروۆتىڭ قورعا تيەسىلى ەنشىلەس كومپانيالاردىڭ باسشىلىق قۇرامعا سىياقى تولەۋ ساياساتى تۋرالى ساۋالىنا پىكىر ءبىلدىردى، دەپ حابارلايدى قازاقپارات ءتىلشىسى.

عيبرات اۋعانوۆ جازدا عانا قوعامدا رەزونانس تۋعىزىپ، تۇسىندىرمە جۇمىستارى جۇرگىزىلگەن مالىمەتتىڭ كۇزدە ءماجىلىس مىنبەرىنەن قايتا كوتەرىلگەنىنە تاڭعالىپ وتىر.

«بۇل ماسەلە شىلدە ايىندا ايتىلىپ، بۇكىل ب ا ق- قا تۇسىندىرمە رەتىندە اقپارات بەرگەنبىز. ءتىپتى KASE الاڭىندا وسى ماسەلەگە بايلانىستى باسپا ءسوز ءماسليحاتىن دا وتكىزدىك.

نەلىكتەن بۇگىن قويىلعانىن بىلمەيمىن. ەكى اي بولدى. ە. سايروۆ مىرزا قوعامدىق كەڭەستىڭ وتىرىسىنا كەلگەن جوق. وزىنەن سۇرايتىن ەدىك. قوعامدىق وتىرىستاردا دا جاۋاپ بەرگەنبىز»، - دەيدى ول.

اكسيونەرلىك قوعام وكىلى دەپۋتات ساۋالىندا اتالعان كومپانيا قىزمەتكەرلەرىنىڭ ايلىعى مەن سىياقىلارىن تومەندەتۋگە بولمايدى دەگەن پايىم ايتتى.

«نەگە تومەندەتۋگە بولمايدى؟ ءبىزدىڭ كومپانيالارىمىز - ۇلتتىق كومپانيالار. جالپى «سامۇرىق- قازىنادا» 270 تەن استام ەنشىلەس كومپانيا بار. ءار كومپانيا - نارىق. مىسالى، ءبىر كومپانيانىڭ باسشىسىن الايىق. ول لاۋازىمعا تاعايىندالۋ ءۇشىن ءتيىستى ءبىلىمى بولۋ كەرەك. جاۋاپكەرشىلىك الادى. 5 مىڭ، 10 مىڭ جۇمىسشىعا جاۋاپتى بولادى. ونىڭ ءبارىنىڭ بيزنەس كورسەتكىشتەرىن، قارجىلىق كورسەتكىشتەرىن ورىنداۋ كەرەك. قازاقستاننىڭ دامۋىنا ۇلەس قوساتىن، سوعان ناقتى لايىقتى باسشى بولۋ كەرەك. ناقتى لايىقتى باسشى بولۋ ءۇشىن، ناقتى لايىقتى جالاقى بولۋ كەرەك»، - دەيدى اكسيونەرلىك قور ديرەكتورى.

ايتۋىنشا، باسشىلار مەن مەنەدجەرلەردىڭ ايلىعى مەن سىياقىسىن تومەندەتسە، قازىرگى قىزمەتتەرىندە تۇراقتاپ قالماۋى مۇمكىن.

«بىزدەگى پروبلەمانىڭ ءبىرى مىناداي: ءبىزدىڭ جاقسى مەنەدجەرلەرىمىزدى ىشكى نارىق، ىشكى بيزنەس باسەكەلەستىك جولمەن تارتىپ الادى. جالاقىسىن بىزدەگىدەن كوتەرىپ ۇسىنادى دا، ءبىز دايىنداعان مامانداردى الىپ كەتەدى. سول سەبەپتى باسشىلارعا تولەيتىن سىياقىنى تومەندەتۋ ماسەلەسىن كوپوراتيۆتىك رەگلامەنتتەر شەشەدى. ءار كومپانيانىڭ شارتتارى، ەرەجەلەرى بار. ءبىز وپەراتسيالىق ماسەلەلەرگە كىرە المايمىز. ءار كومپانياعا «باسشىلارعا مىنانشا تولە» دەپ مىندەت قويا المايمىز. سەبەبى ليميت بار. ليميتتەردى قايتا قاراپ جاتقان جوقپىز. ءبىراق ءبىز 2022-جىلدان باستاپ ەڭ تومەن جالاقى الاتىن جۇمىسشىلاردىڭ ايلىعىن قازاقستانداعى ورتاشا جالاقىعا دەيىن كوتەرۋ باعىتىندا ۇلكەن جۇمىس اتقارىپ جاتىرمىز»، - دەدى عيبرات اۋعانوۆ.

ەسكە سالساق، ءماجىلىس دەپۋتاتى «سامۇرىق-قازىنا» قورى قۇرىلىمىنداعى كومپانيالاردىڭ قارجىلىق وپەراتسيالارىن تەكسەرۋدى سۇراعان بولاتىن.