سۋيتسيدكە دەيىن جەتكىزگەن: ەكى وبلىستا بوپسالاپ اقشا تالاپ ەتەتىن قىلمىستىق توپتار ۇستالدى

 استانا. KAZINFORM - جاستار اراسىندا پايداكۇنەمدىك پيعىلمەن عانا ەمەس، سونىمەن قاتار ەرەكشە دورەكىلىكپەن، مەنمەندىكپەن جاسالاتىن، كەيدە قوعامدىق رەزونانس تۋدىراتىن بوپسالاۋ فاكتىلەرى پوليسيانىڭ ەرەكشە باقىلاۋىندا، دەپ حابارلايدى Polisia.kz.

- ۇلىتاۋ وبلىسىندا ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى 18-20 جاس ارالىعىنداعى جاستار توبىن ۇستادى. ولار جەرگىلىكتى كوللەدجدىڭ كامەلەتكە تولماعان ستۋدەنتتەرىن قورقىتىپ، اقشا بوپسالاعان. كۇدىكتىلەر وزگەلەردى قورقىتۋ جانە وزدەرىنىڭ كۇشتىلىگىن كورسەتۋ ءۇشىن زورلىق-زومبىلىق ارەكەتىن بەينەجازباعا تۇسىرگەن. بوپسالاۋ جانە بۇزاقىلىق فاكتىلەرى بويىنشا قىلمىستىق ىستەر سوتقا جولداندى، - دەدى ق ر ءى ءى م ۇيىمداسقان قىلمىسقا قارسى كۇرەس دەپارتامەنتىنىڭ وكىلى قۋاندىق الپىس.

پاۆلودار وبلىسىنىڭ پوليتسيا دەپارتامەنتى ۇيىمداسقان قىلمىسقا قارسى كۇرەس باسقارماسى پروكۋراتۋرانىڭ ۇيلەستىرۋىمەن مامىر ايىندا جاستاردى بوپسالاۋمەن اينالىسقان توپتىڭ ارەكەتىنە توسقاۋىل قويدى.

توپ مۇشەلەرىنە وسىنداي 10 فاكتىگە قاتىسى بار دەگەن ايىپ تاعىلىپ وتىر. ولار جابىرلەنۋشىلەردى قورقىتىپ، 2 ميلليون تەڭگەگە دەيىن العان.

جابىرلەنۋشىلەر قىلمىسكەرلەردەن قورقىپ، قۇقىق قورعاۋ ورگاندارىنا جۇگىنبەگەن.

زاڭسىز ارەكەتتىڭ سالدارىنان جابىرلەنۋشىلەر سۋيتسيد جاساۋعا دەيىن بارعانىن اتاپ وتكەن ءجون.

وسىنداي وقيعالاردىڭ بىرىندە قورلىق پەن سوققىعا شىداماعان 22 جاستاعى جىگىت ءوزىن-ءوزى ولتىرۋگە وقتالعان.

توپ مۇشەلەرىن ۇستاۋ كەزىندە ولاردان تراۆماتيكالىق جانە سۋىق قارۋ، سونداي-اق سينتەتيكالىق ەسىرتكى تاركىلەندى. بارلىق كۇدىكتى قاماۋعا الىندى.

جابىرلەنۋشىلەرگە قاتىستى قاۋىپسىزدىك شارالارى قابىلداندى. قىلمىستىق كودەكستىڭ بىرنەشە بابى بويىنشا سوتقا دەيىنگى تەرگەپ-تەكسەرۋ جۇرگىزىلىپ جاتىر.