سۋيتسيد جاساعان بالا اتا-اناسىن وسىلاي جازالاپ كەتەدى - پسيحولوگ
وسكەمەن. KAZINFORM - پسيحولوگ زارينا قاھارمان قىزى جاس وسپىرىمدەر سۋيتسيدكە نە ءۇشىن باراتىنىن، الدىن الۋ ءۇشىن نە ىستەۋ كەرەكتىگىن ايتىپ بەردى.
«اتا-اناسىنان ماحاببات كورمەگەن، ۇنەمى قورلانىپ وسكەن بالا ەرەسەك ومىرىندە اۋتواگرەسسياعا بەيىم بولادى. اۋتواگرەسسيا دەگەنىمىز - ءوز-وزىڭە زيان كەلتىرۋ، وزىڭە باعىتتالعان قاستاندىق. بالانىڭ اتا-اناسى جوعارى تالاپ قويىپ، ءجيى كىنالاپ، جۇرتتىڭ بالاسىمەن سالىستىرىپ، جازا رەتىندە سويلەسپەي قويۋ ءادىسىن كوپ قولدانعان بولسا بۇل وتە قاۋىپتى. اۋتواگرەسسيانىڭ ەڭ سوڭعى دەڭگەيى - سۋيتسيد. جاس وسپىرىمدەر سۋيتسيدتى دەمونستراتيۆتى تۇردە قولدانادى، ياعني ماقسات - ومىردەن ءوتۋ ەمەس، اتا-اناسىنىڭ نازارىن وزىنە اۋدارىپ، جانايقايىن جەتكىزۋ»، - دەيدى زارينا قاھارمان قىزى.
ونىڭ ايتۋىنشا، اۋتواگرەسسيا اشىق جانە جاناما تۇردە بولادى. اشىق ءتۇرى - سۋيتسيد جاساۋ، جاناما ءتۇرى - ماسكۇنەمدىك، ناشاقورلىق، تاماق كوپ جەۋ، تەمەكى شەگۋ، ەسترەمالدى سپورت تۇرىمەن اينالىسۋ.
«سۋيتسيد جاسايتىن ەرەسەك ادامداردىڭ p بۇل تۋرالى اشىق نە استارلى تۇردە، ءازىل تۇرىندە بولسىن ايتادى. ولاردىڭ ميىندا قانداي دا ءبىر تىعىرىقتان شىعۋدىڭ بىرنەشە جولى بولمايدى، تەك ءبىر جول بار، ول - وزىنە قول سالۋ. ال جاس وسپىرىمدەر بولسا قول جۇمساۋ ارەكەتىن جاساعانىمەن، قۇتقارىلىپ قالۋدى تىلەيدى. ول ومىرمەن ەمەس، ءوزىنىڭ كوپتەن بەرى جۇرگەن كۇيىمەن قوشتاسقىسى كەلەدى»، - دەيدى پسيحولوگ.
ينتەرنەت، موبيلدى ويىندار شەكتەن تىس كوپ قولدانىلسا وتە زيان. اتا-اناسىمەن ەموتسيالىق تۇردە جاقىن بايلانىستاعى بالا ومىرگە قاۋىپ توندىرەتىن ويىنعا اۋەس بولمايدى.
«اپتاسىنا ءبىر رەت، تىم بولماعاندا ەكى اپتادا ءبىر رەت بالاڭىزدان ونى رەنجىتىپ العان جوقسىز با، كوڭىلى توق پا - سۇراپ وتىرىڭىز. قانداي ويىندارعا اۋەس ەكەنىن بايقاپ كورىڭىز. مىسالى، تەك اتىسپاق ويىن ويناسا - بەيسانالى تۇردە كىمدى اتقىسى كەلەدى، كىمگە اشۋلى، كىمگە ىزالى، كىمدى جازالاعىسى كەلەدى؟ سۇراپ كورىڭىز. ويىننىڭ ىشىندە تەرەزەدەن سەكىرۋ تاپسىرماسى بەرىلسە، بالا ومىردە تەرەزەدەن سەكىرىپ كەتسە - بۇل نەنىڭ بەلگىسى؟ ويىن مەن شىنايى ءومىردى اجىراتا المايتىن بالانى مىندەتتى تۇردە پسيحولوگ، پسيحياتر مامانعا اپارۋ كەرەك»، - دەيدى زارينا قاھارمان قىزى.
پسيحولوگ ءوز سوزىندە جازالاۋشى، مەنسىنبەۋشى، كەمسىتۋشى اتا-انامەن كۇرەسۋ بالاعا قيىن ەكەندىگىن جەتكىزدى.
«سول سەبەپتى بالا سول اتا-انانى سيمۆوليكالىق تۇرعىدا ءوز ىشىنە كىرگىزىپ الىپ، ۇنەمى ىشتەي داۋ-دامايدا جۇرەدى. كۇندەردىڭ ءبىر كۇنىندە سول ىشتەگى اتا-انانى ءولتىرۋ ءۇشىن سۋيتسيد جاسايدى. ول ءوزى عانا ومىردەن وتپەي، اتا-اناسىن سولاي جازالاپ كەتەدى. بالاسى ومىردەن وزعان اتا-انا ءبىر-ءبىرىن كىنالاپ، ءاردايىم مارقۇم بالاسىن ويلاپ، «ءتىرى ولىككە» اينالادى. وسىنداي جاعدايعا تاپ بولماس ءۇشىن ءار اتا-انا بالاسىنىڭ قالاۋىنا قۇلاق ءتۇرىپ، اقىلداسىپ، ءجيى اڭگىمەلەسىپ، سەزىمدەرىن سۇراپ، رۋحاني بايلانىستا بولۋى كەرەك»، - دەيدى ول.
ەسكە سالساق، وسىعان دەيىن وقۋ-اعارتۋ مينيسترلىگى بالا قۇقىقتارىن قورعاۋ كوميتەتى وقۋشىلاردىڭ ينتەرنەتتەن تەرىس تاربيە الىپ، زيان شەگۋىنە جول بەرمەس ءۇشىن اتا-انالارعا ءبىرقاتار اقىل-كەڭەس بەرگەنى حابارلانعان.