سيريادا قوعامنىڭ بارلىق سالاسىن قامتيتىن ۇكىمەت قۇرىلادى

استانا. KAZINFORM - سيريا سىرتقى ىستەر ءمينيسترى اساد اش- شايباني ساۋد ارابياسىنىڭ رەسمي وكىلدەرىنە داماسكتەگى جاڭا باسشىلىق باشار اساد بيلىكتەن كەتكەننەن كەيىن سيريا قوعامىنىڭ بارلىق سالاسىن قامتيتىن ۇكىمەت قۇرعىسى كەلەتىنىن ايتتى. بۇل تۋرالى Kazinform اگەنتتىگىنىڭ مەنشىكتى ءتىلشىسى حابارلادى.

جاقىندا سيريا سىرتقى ىستەر ءمينيسترى جوعارى دارەجەلى دەلەگاتسيانى ساۋد ارابياسىنا باستاپ باردى، بۇل سيريانىڭ جاڭا اكىمشىلىگىنىڭ رەسمي دەلەگاتسياسىنىڭ العاشقى شەتەلدىك ساپارى بولدى.

بەيسەنبى كۇنى اساد اش- شايباني سيريانىڭ قورعانىس مينيسترىمەن بىرگە ەر- ريادتا ساۋد ارابياسىنىڭ قورعانىس ءمينيسترى حانزادا حاليد بەن سالمانمەن، سونداي- اق كورولدىكتىڭ سىرتقى ىستەر ءمينيسترى فەيسال بين فارحانمەن كەزدەستى.

- ساپار بارىسىندا ءبىز سيريالىق قوعامنىڭ بارلىق سەكتورلارىن قامتيتىن سەرىكتەستىك پەن تيىمدىلىككە نەگىزدەلگەن ۇكىمەت قۇرۋ، سونداي- اق ينۆەستيتسياعا جول اشاتىن ەكونوميكالىق دامۋ جوسپارىن ىسكە قوسۋ، ستراتەگيالىق سەرىكتەستىك ورناتۋ جانە حالىقتىڭ ءومىر ءسۇرۋ دەڭگەيىن جاقسارتۋ جونىندەگى ۇلتتىق كوزقاراسىمىزدى جەتكىزدىك، - دەپ مالىمدەدى اساد اش- شايباني الەۋمەتتىك جەلىدە.

بۇعان جاۋاپ رەتىندە ساۋد ارابياسىنىڭ «كورول سالمان اتىنداعى قۇتقارۋ جانە گۋمانيتارلىق كومەك ورتالىعىنىڭ» (KSRelief) دەلەگاتسياسى جۇما كۇنى داماسكىگە باردى، وندا گۋمانيتارلىق جانە مەديتسينالىق ىنتىماقتاستىقتى تالقىلاۋ ءۇشىن سيريا دەنساۋلىق ساقتاۋ ءمينيسترى ماحەر اش- شاراامەن كەزدەستى.

سيريا مەن ساۋد ارابياسى اراسىنداعى اۋە كوپىرىنىڭ ءبىر بولىگى رەتىندە 3 KSRelief ۇشاعى گۋمانيتارلىق كومەكپەن داماسك اۋەجايىنا كەلىپ جەتتى.

8 - جەلتوقساندا سيريانىڭ بۇرىنعى پرەزيدەنتى باشار اساد تاقتان تايدىرىلعاننان بەرى حايات تاحرير اش- شام باستاعان وپپوزيتسيالىق توپتار اراب ەلدەرى مەن حالىقارالىق قاۋىمداستىقتى «ەلدى بارلىق سيريالىقتاردىڭ مۇددەسى ءۇشىن باسقاراتىنىنا» سەندىرۋگە تىرىسىپ جاتىر.

سەنبى كۇنى سيريانىڭ سىرتقى ىستەر ءمينيسترى «تۇراقتىلىقتى، قاۋىپسىزدىكتى، ەكونوميكانى قالپىنا كەلتىرۋدى قولداۋ جانە نىق سەرىكتەستىك ورناتۋ ءۇشىن» الداعى كۇندەرى كاتارعا، بىرىككەن اراب امىرلىكتەرىنە جانە يوردانياعا باراتىنىن مالىمدەدى.