سيريادا باشار اساد كەتكەننەن كەيىن العاش رەت پارلامەنتتىك سايلاۋ وتەدى

استانا. KAZINFORM - داۋىس بەرۋ 15-20 -قىركۇيەك ارالىعىندا وتەدى، دەپ حابارلايدى Kazinform مەنشىكتى ءتىلشىسى.

سيريا بيىل قىركۇيەكتە باشار اساد رەجيمى قۇلاعاننان كەيىنگى العاشقى پارلامەنتتىك سايلاۋدى وتكىزۋگە نيەتتى. بۇل تۋرالى جوعارعى سايلاۋ كوميتەتىنىڭ ءتوراعاسى مۇحامماد تاحا ءال- احماد پرەزيدەنت احماد اش- شاراامەن كەزدەسۋىنىڭ قورىتىندىسى بويىنشا مالىمدەدى، دەپ حابارلايدى SANA.

كەزدەسۋ بارىسىندا سيريا قوعامى ءتۇرلى سەكتورلارىنىڭ وكىلدەرىمەن كەڭەسۋ نەگىزىندە دايىندالعان ۋاقىتشا سايلاۋ زاڭىنا ەنگىزىلگەن نەگىزگى تۇزەتۋلەر تالقىلاندى. پرەزيدەنت اش- شاارا داۋىس بەرۋدى بۇكىل ەلدە وتكىزۋ قاجەتتىگىن اتاپ ءوتىپ، اۋماقتىق ءبولىنۋدىڭ كەز كەلگەن يدەياسىن جوققا شىعارىپ، مۇنىڭ سيريا حالقىنىڭ ەركىنە قايشى ەكەنىن مالىمدەدى.

— سايلاۋ پروتسەسى اسكەري قىلمىسكەرلەردى قولداعان نەمەسە كونفەسسياارالىق الاۋىزدىقتى قوزدىرۋعا ۇلەس قوسقان ادامداردى شىعارۋى كەرەك، — دەپ اتاپ ءوتتى ءال- احماد.

ەنگىزىلگەن تۇزەتۋلەرگە سايكەس، حالىق جينالىسىنداعى (پارلامەنت) دەپۋتاتتاردىڭ جالپى سانى 150-دەن 210-عا دەيىن ارتادى. ونىڭ 70- ءىن پرەزيدەنت تاعايىندايدى، ال قالعان 140-ى سايلانادى.

— 70 دەپۋتاتتىق پرەزيدەنت كۆوتاسى جوعارى بىلىكتى مامانداردى تارتۋعا جانە مۇمكىن بولاتىن تەڭگەرىمسىزدىكتەردىڭ ورنىن تولتىرۋعا جۇمسالادى، — دەپ ناقتىلادى كوميتەت باسشىسى.

مانداتتاردى پروۆينتسيالار اراسىندا ءبولۋ 2011 -جىلعى حالىق ساناعى نەگىزىندە جۇزەگە اسىرىلادى. ورىندار پروۆينتسيالار اراسىندا حالىق سانىنا سايكەس بولىنەدى جانە جەرگىلىكتى قاۋىمداستىق پەن زيالى قاۋىم وكىلدەرى ءۇشىن وكرۋگتەر بويىنشا جىكتەلەدى.

ءال-احماد تۇسىندىرگەندەي، قازىرگى داۋىس بەرۋ ۇلگىسى وتپەلى كەزەڭنىڭ ەرەكشە جاعدايلارىنا بەيىمدەلگەن اشىق جانە فۋنكتسيونالدى سايلاۋ ەلەمەنتتەرىن بىرىكتىرەدى.

پرەزيدەنت ۋاقىتشا سايلاۋ جۇيەسى تۋرالى جارلىققا قول قويعاننان كەيىن جوعارعى سايلاۋ كوميتەتىنە كىشى كوميسسيالاردى قۇرۋ ءۇشىن ءبىر اپتا ۋاقىت قاجەت، سودان كەيىن ولار سايلاۋ ورگاندارىن قۇرۋ ءۇشىن 15 كۇن ۋاقىت قاجەت بولادى.

اۆتور

زارينا تۋعانبايەۆا